Расейскі гісторык і журналіст Мікалай Сванідзэ лічыць, што Аляксандар Лукашэнка і Ўладзімер Макей ніколі не пагодзяцца на аб’яднаньне з Расеяй, піша Радыё Свабода.
Пра гэта ён распавёў у інтэрвію радыё «Эхо Москвы», адказваючы на пытаньне «чаму не атрымліваецца аб’яднаньне Расеі і Беларусі?».
«Я магу растлумачыць, хоць гэта досыць банальна, — сказаў Сванідзэ. — Ёсьць некалькі фактараў, два з іх найважнейшыя. Ня хочуць. І ня хочуць адразу і чалавек, і цэлая сацыяльная група. Чалавек — гэта Лукашэнка Аляксандр Рыгоравіч. Які губляе ўсё. Яму нічога ня могуць прапанаваць такога, што б загладзіла, нэўтралізавала, папоўніла страты ўлады ў Беларусі. Над ім, як над Пуціным — Гасподзь Бог.
У Пуціна вялікая краіна, у Лукашэнкі — маленькая краіна. Але сувэрэнная. Усё роўна ўжо, колькі там мільёнаў жыве. І які там ВУП. І яму нічога нельга прапанаваць такога, што б гэта яму замяніла.
А ён чалавек улады. Ён чалавек, які кіруе Беларусьсю значна даўжэй, чым Пуцін кіруе Расеяй. І, вядома, адабраць у яго гэтую ўладу — не, ён на гэта ня пойдзе. Я не прадстаўлю, у якую пазыцыю яго трэба паставіць, каб на гэта пайшоў.
І другое. Ёсьць сацыяльная група і вельмі ўплывовая, гэта эліта беларуская. Якая натуральна існуе. І якая таксама ня пойдзе на тое, каб памяняць сваё месца эліты на месца служанкі або на месца ў вітальным пакоі эліты расейскай. Таму што там яны ўсе першыя.
І міністар замежных справаў Беларусі, ён размаўляе на роўных зь міністрамі замежных справаў буйных эўрапейскіх і іншых дзяржаваў. Ён як роўны з роўнымі размаўляе.
А тут ён будзе стукацца ў дзьверы якога-небудзь начальніка дэпартамэнта ў МЗС і прыносіць скрынку цукерак яго сакратарцы. Каб яна яго пусьціла. Яму гэта трэба? Не. Усё. Яны ўжо ўдыхнулі паветра ўлады. І ўжо даўно дыхаюць гэтым паветрам. Яны ня пойдуць на тое, каб памяняць сваё першую ролю на 11-ю. Ніколі».
Цяпер чытаюць
Найбуйнейшую сетку фастфуду ў Беларусі адкрыў выхадзец з КДБ3
Каментары