Музей Быкава ў Гродне закрыўся: экспазіцыя пераязджае ў музей Багдановіча
Апошнія гады музей Васіля Быкава на вуліцы Савецкай перажываў не найлепшыя часы з-за адсутнасці спонсараў. У пачатку 2019 года стала вядома, што ён зачыняецца, а багатая экспазіцыя пераязджае ў музей Максіма Багдановіча, піша Hrodna.life.
Музей праіснаваў каля 20 гадоў, ён знаходзіўся ў пакоі плошчай 15 квадратных метраў на вуліцы Савецкай. Гараджане ў музеі бывалі рэдка, бо пра яго амаль ніхто не знаў і папулярызацыяй ніхто не займаўся. А паглядзець там было на што: вялікая калекцыя кніг Быкава, асабістыя рэчы пісьменніка, рэдкія здымкі і іншае.
«Трапіць у музей ужо нельга, мы зачыніліся, — распавядае былы бухгалтар музея Яўгенія Багданава. — Усю экспазіцыю перавозім у музей Максіма Багдановіча. Захварэў наш наглядчык, ляжыць. Плаціць арэнду і камунальныя паслугі нам проста было няма чым. Дзяржава не дапамагала, у месяц у нас выходзіла 90 рублёў. Мы хадзілі ў выканкамы па дапамогу, але нічога не дамагліся».
Плануецца, што ў музеі Максіма Багдановіча экспазіцыя прысвечаная Васілю Быкаву адкрыецца вясной.
Вядомы беларускі пісьменнік Васіль Быкаў пражыў у Гродне больш за 20 гадоў і напісаў тут шмат твораў, якія чытаюць і шануюць ва ўсім свеце.
Цяпер чытаюць
Сталі вядомыя новыя дэталі ў маштабнай справе арганізатараў канцэртаў4
Каментары