Ва Украіне арыштаваны беларус, вінавацяць у незаконным зборы інфармацыі
У Прыморскім раённым судзе Адэсы разглядаецца крымінальная справа па абвінавачанні ураджэнца Гомеля ў незаконным выкарыстанні спецыяльных тэхнічных сродкаў атрымання інфармацыі.
Усё пачалося вясной 2018 года, калі найбуйнейшы ва Украіне аператар мабільнай сувязі «Київстар» звярнуў увагу на тое, што ў працы яго абсталявання з'явіліся знешнія праблемы ў выглядзе невядомага выпраменьвання. Аператар звярнуўся з заявай у Службу бяспекі Украіны. Спецыялісты правялі адпаведныя мерапрыемствы і выявілі месца крыніцы радыёвыпраменьвання, якая перашкаджала нармальнай працы абсталявання аператара мабільнай сувязі. Незаконная крыніца выпраменьвання з прыкметамі актыўнага комплексу маніторынгу сетак сотавай сувязі размяшчалася ў Адэсе ў адным з памяшканняў дома № 55 па вуліцы Вялікая Арнауцкая. Туды і прыйшлі з ператрусам аператыўнікі і следчы СБУ.
У ходзе ператрусу праваахоўнікі выявілі больш за дзясятак адзінак розных тэхнічных прылад, камп'ютарнай тэхнікі, носьбітаў інфармацыі, сім-карты і мабільныя тэлефоны. Той, хто ўсталяваў гэта абсталяванне, атрымліваў доступ да інфармацыі карыстальнікаў паслуг аператара «Київстар». А вось з якой мэтай — карыслівай або шпіёнскай, следства высветліць не змагло.
Крымінальная справа была заведзена па ч.2 арт. 359 КК Украіны (незаконныя набыццё, збыт або выкарыстанне спецыяльных тэхнічных сродкаў атрымання інфармацыі). Санкцыя гэтага артыкула — пазбаўленне волі на тэрмін ад 4 да 7 гадоў.
Адзіным затрыманым аказаўся грамадзянін Беларусі. Вядома, што ён ураджэнец Гомеля, раней не судзімы. У дачыненні да беларуса крымінальная справа расследавалася і была накіравана ў суд з абвінавачваннем у здзяйсненні злачынства па ч.1 арт. 359 КК Украіны. Яму пагражае пакаранне ад штрафу да пазбаўлення волі на тэрмін да 4 гадоў.
Цяпер чытаюць
Жонка Статкевіча расказала, пра што паспела паразмаўляць з ім13
Каментары