БАТЭ паставіў на месца нарвежскі «Русенборг» ФОТЫ + ВІДЭА галоў
У другім кваліфікацыйным раўндзе Лігі чэмпіёнаў у супернікі БАТЭ выпаў нарвежскі «Русенборг». Вось зусім не скажаш, што нашаму чэмпіёну шанцуе з лёсаваннем. І на месцы «Пяста», і на месцы «Русенборга» маглі быць значна прасцейшыя апаненты. Але БАТЭ за сваю еўракубкавую гісторыю праходзіў і не такія каманды.
Першая гульня зноў прайшла ў Барысаве. Калі ў матчы з «Пястам» БАТЭ часам пакідаў зусім цяжаке ўражанне, то на гэты раз усё было значна весялей.
У склад вярнуўся пасля дыскваліфікацыі Станіслаў Драгун, што значна палепшыла якасць гульні ў цэнтры поля. А на месца Ясэ Туомінена выйшаў Неманья Міліч, які зарабіў пенальці ў гульні з «Пястам» у Глівіцах.
На матч былі прададзеныя ўсе білеты, але аншлагу, на жаль, зноў не атрымалася. Мабыць, уласнікі абанементаў на сезон не ўсе дайшлі да стадыёна.
З Нарвегіі ў Беларусь прыехала з дзясятак фанатаў, але іх на агульным фоне не было чуваць.
«Русенборг» — вядомая з канца 90-х каманда, яна неаднаразова гуляла ў Лізе чэмпіёнаў, дзе перамагала «Рэал» і «Барусію». На сёння чэмпіёны Беларусі і Нарвегіі прыкладна аднаго ўзроўню.
Гульня для БАТЭ пачалася звышудала. Ужо на чацвёртай хвіліне падчас розыгрышу кутняга ў варатарскай пляцоўцы быў збіты Захар Волкаў. Да мяча падышоў Ігар Стасевіч, які ў такіх выпадках не звыкся дараваць — 1:0.
БАТЭ і далей валодаў ініцыятывай, але гол атрымаў у свае вароты. Зноў галявая атака пачалася з кутняга. Суперніка ўпусціў Яўген Яблонскі і Андэрс Конрадсэн перайграў з блізкай адлегласці Чычкана — 1:1.
У другім тайме ж была процілеглая сітуацыя. Яго з атак пачаў «Русенборг», аднак на 51-й вымаў мяч са сваіх варот. Гэта Ігар Стасевіч аддаў чарговую гросмайстарскую перадачу, Максім Скавыш адарваўся ад абаронцаў і спакойна перакінуў мяч у вароты — 2:1. Літаральна праз хвіліну гледачы традыцыйна ўсталі з месцаў, каб ушанаваць памяць Анатоля Капскага. Больш галоў у матчы не было.
Такі лік, канечне, пакідае для «Русенборга» месца для манеўру, але аптымізму надае тое, што гульня ў БАТЭ выглядае больш цэльнай, чым з «Пястам».
Матч у адказ адбудзецца 31 ліпеня ў Тронхейме. Пачатак а 20:00.
«Паднябеннага збіваў былы начальнік калоніі». Вось што расказваюць пра палітвязня, які загінуў за кратамі ў 36 гадоў4
Каментары