Лінкявічус: Для беларускага ўрада АЭС — гэта гонар, а для нас бяда
Літва не мае «вялікіх ілюзій» адносна Беларускай АЭС. Але калі беларускі бок зможа зрабіць максімальна магчымае ў плане бяспекі, то гэта дапаможа дыялогу з Еўрасаюзам. Пра гэта кіраўнік МЗС Літвы Лінас Лінкявічус заявіў падчас размовы з беларускімі журналістамі ў Мінску, паведамляе Tut.by.
— У нас розныя пункты гледжання [з беларускім бокам на АЭC]. У вашага ўрада я чуў выказванні, што «гэты праект [АЭС] — наш гонар». Дык я адкрыта ім сказаў, што для вас гэта гонар, а для нас — бяда. Больш за тое, калі прыбраць палітыку, то застанецца геапалітыка, а эканамічнага абгрунтавання будаўніцтва станцыі няма, але гэта ваша рашэнне. Але мы можам паспрабаваць зразумець, што трэба для таго, каб радыкальна палепшыць бяспеку АЭС — гэта не толькі карысць для Літвы, але і пытанне бяспекі для вашых грамадзян, — заявіў Лінкявічус.
Па словах літоўскага міністра, адным з рашэнняў можа быць варыянт, калі міжнародныя эксперты «прыедуць і выдзеляць самыя асноўныя стандарты бяспекі, якія павінны быць выкананы перад запускам станцыі».
— Наша ацэнка наконт АЭС не зменіцца. Але трэба яшчэ раз ацаніць сейсмічныя рызыкі, рэагаванне на паводкі, вялікія катастрофы і гэтак далей. На сённяшніх сустрэчах [з Румасам і Макеем] я адчуў, што ёсць разуменне. Добра, калі будзе ўвасоблена ў жыццё, — сказаў кіраўнік МЗС Літвы.
Лінас Лінкявічус таксама адзначыў, што павышэнне бяспекі АЭС можа дапамагчы разблакіроўцы перамоў паміж Беларуссю і ЕС па прыярытэтах партнёрства. Але міністр падкрэсліў: пункт гледжання Літвы на БелАЭС Еўрасаюз падзяляе.
— Калі будзе гатоўнасць рабіць максімальна магчымае ў плане бяспекі АЭС, то гэта дапаможа і дыялогу з ЕС. У нас ёсць агульнае разуменне з ЕС і Еўракамісіяй па гэтым пытанні. Яны падтрымліваюць такі прагматычны погляд на рэчы — хоць нешта, але зрабіць. Трэба аб'ектыўна глядзець: рэактар пабудаваны, засталося завезці паліва — і ўсё запрацуе. Для ЕС гэта таксама прэцэдэнт, як у будучыні размаўляць з краінамі, якія будуць будаваць такія аб'екты на мяжы з ЕС, — заявіў Лінкявічус.
Каментары