Радыё Свабода: Беларускі памежнік нелегальна перайшоў мяжу з Украінай
Інцыдэнт здарыўся 29 чэрвеня ў 13:20. Але вядома пра яго стала пасля таго, як апублікавалі адпаведнае судовае рашэнне: беларускага памежніка пакаралі арыштам, піша «Радыё Свабода».
Грамадзянін Беларусі, які служыць старшыной па матэрыяльным забеспячэнні ў Брэсцкай памежнай групе, перасек мяжу па-за пунктам пропуску на тэрыторыі Шацкай грамады Ковельскага раёна Валынскай вобласці ў кірунку Дубок (Беларусь) — Хрыпск (Украіна). Яго затрымаў патруль украінскіх памежнікаў і склаў акт аб парушэнні паводле ч. 1 артыкула 204-1 Кодэкса Украіны аб адміністрацыйных правапарушэннях.
Памежніка пакаралі арыштам на двое сутак з 29 чэрвеня. Магчыма, ён ужо вызвалены і вярнуўся дадому. Згодна з рашэннем суда, ён таксама мусіў сплаціць 496 грыўняў судовага збору.
У той жа час у судовым рашэнні няма тлумачэння затрыманага беларускага памежніка, як, чаму і навошта ён перайшоў беларуска-ўкраінскую мяжу.
Пазней Дзяржаўны памежны камітэт абвергнуў гэту інфармацыю.
«Дзяржаўны памежны камітэт афіцыйна паведамляе, што інцыдэнтаў, звязаных з ваеннаслужачымі органаў пагранічнай службы, не было: ніводны беларускі памежнік мяжу з Украінай не перасякаў. Усе беларускія памежнікі знаходзяцца на месцах службы і выконваюць задачы па ахове дзяржаўнай мяжы», — гаворыцца ў паведамленні.
Каментары