Пад выглядам «Беларускага Гаюна» ў чатах для знаёмства людзям пішуць сілавікі
Тэлеграм-канал «Беларускі Гаюн» высветліў, што ў чат-ботах знаёмстваў актывізаваліся сілавікі Лукашэнкі, якія пад выглядам заяўкі на зносіны прапануюць ім напісаць «калі ты не абыякавы да сваёй дзяржавы і прагнеш у жыцці толькі міру і гатовы аказаць любую дапамогу».
У асабістых паведамленнях акаўнт пачынае распавядаць байкі, што нібыта ён прадстаўнік «Гаюна» і такім чынам шукае крыніцы.
Далей гэты «прадстаўнік» патрабуе чалавека напісаць яго асабістыя даныя: прозвішча, імя, дзень і месца нараджэння, адкуль, дзе вучыліся, дзе працуе і хобі.
«Беларускі Гаюн» падкрэслівае, што ніколі і нікому не піша ў асабістыя паведамленні і ўжо сапраўды не шукае крыніц у чат-боце знаёмстваў «Дайвінчык». Адзіная крыніца сувязі з маніторынгавай групай — гэта бот: @HajunBYbot
Таксама ніколі і ні пры якіх абставінах не запытвае асабістыя даныя — навошта ведаць сапраўднае імя і, барані божа, хобі?! Тое, што гэты «прадстаўнік» запытвае, называецца дасье.
Тэлеграм-канал падкрэслівае, што не трэба пісаць ніякім акаўнтам, якія прадстаўляюцца «Гаюнам» у нейкіх чатах.
Але калі ўсё ж напісалі ці ён напісаў вам, то робяцца наступныя крокі:
1. Паведамляць у @hajunbybot, што сілавікі прыкідваюцца «Гаюнам» з такога акаўнта.
2. Блакаваць гэты фэйкавы акаўнт.
3. Калі акаўнт на Telegram змяшчаў або ўтрымліваў асабістыя даныя (фота або імя з прозвішчам) — то варта выдаліць акаўнт і стварыць новы. Асабліва датычыць тых, хто ўжо паспеў нешта расказаць сілавікам у асабістых паведамленнях.
Каментары