Украінка спрабавала ўвезці ў Беларусь 100 тысяч даляраў без дэкларацыі
Брэсцкая транспартная пракуратура выдала санкцыю на заключэнне пад варту 41-гадовай іншаземкі, якая спрабавала незаконна ўвезці ў Беларусь буйную суму валюты.
Інцыдэнт, як паведамляецца, адбыўся 28 ліпеня. Факт утойвання валюты выявілі супрацоўнікі Брэсцкай мытні падчас праверкі легкавіка, які заязджаў з Польшчы.
У машыне знаходзіліся замежныя грамадзяне — жанчына і двое мужчын. Кожны з іх задэклараваў пэўныя сумы, але жанчына перадала свайму спадарожніку 100 тысяч даляраў, бо не мела дакумента, які пацвярджае паходжанне гэтых грошай.
Паводле гэтага факта Брэсцкая мытня распачала крымінальную справу паводле ч. 2 арт. 228 КК Беларусі, грошы канфіскавалі.
Жанчыне выставілі абвінавачанне ў незаконным перамяшчэнні праз мытную мяжу Еўразійскага эканамічнага саюза буйной сумы. Санкцыя артыкула прадугледжвае пакаранне ад штрафу да пяці гадоў пазбаўлення волі.
Пра грамадзянства жанчыны пракуратура не паведамляе, але з прыкладзенага фота, зробленага на мытні, можна меркаваць, што гаворка ідзе пра грамадзянку Украіны.
Каментары