Сяргея Ціханоўскага пасля турмы цяжка пазнаць ФОТА

Сяргей Ціханоўскі выйшаў на волю 20 чэрвеня 2025 года. Гэта стала магчымым у выніку візіту ў Мінск спецпрадстаўніка прэзідэнта ЗША Дональда Трампа Кіта Келога. Былы палітвязень выехаў з Беларусі.

Павялічыць

Сяргею Ціханоўскаму 46 гадоў. Ён нарадзіўся ў Горках, а вырас у Гомелі, дзе скончыў філалагічны факультэт мясцовага ўніверсітэта. Потым ён заняўся бізнэсам. Ладзіў канцэрты, адкрываў начныя клубы ў Мазыры і Гомелі, валодаў сеткай салонаў сотавай сувязі і відэастудыяй, што здымала рэкламу для папулярных брэндаў. 

У 2019 годзе Ціханоўскі стварыў канал «Краіна для жыцця», каб, як ён сам казаў, змагацца з бязмежжам чыноўнікаў. Менш чым за год канал стаў адным з самых папулярных у беларускім Youtube.

Блогер актыўна ездзіў па рэгіёнах, сустракаўся з падпісчыкамі і проста мясцовымі жыхарамі, браў у іх інтэрв'ю. Людзі распавядалі Сяргею аб сваіх праблемах, часта крытыкавалі чыноўнікаў і ўлады.

Сяргей Ціханоўскі стаў адной з ключавых фігур драматычных падзей 2020 года. Адзін з самых папулярных палітычных блогераў краіны вырашыў балатавацца ў прэзідэнты, аднак перад самым пачаткам выбарчай кампаніі яго арыштавалі, і ён не змог падаць дакументы. У выніку кандыдаткай стала ягоная жонка Святлана Ціханоўская, а Сяргей пасля арышту уключыўся ў кампанію ў якасці кіраўніка яе штаба і даверанай асобы. Пікеты ў падтрымку Ціханоўскай збіралі небывалую колькасць людзей па ўсёй краіне.

29 мая 2020 года на легальным перадвыбарчым пікеце ў Гродне Ціханоўскага затрымалі пасля правакацыі сілавікоў.

Праз два месяцы Лукашэнка публічна заявіў, што Ціханоўскага затрымалі па яго распараджэнні. Ён абвінаваціў Сяргея ў тым, што той спрабаваў арганізаваць у Беларусі Майдан.

Улады жорстка пакаралі Ціханоўскага за тое, што яму ўдалося змабілізаваць простых людзей да палітычнай актыўнасці. Сяргея судзілі ў закрытым рэжыме проста ў гомельскім СІЗА. У снежні 2021 года яму прысудзілі 18 гадоў калоніі ўзмоцненага рэжыму па чатырох палітычных артыкулах — ч. 1 арт. 293 (арганізацыя масавых беспарадкаў), ч. 3 арт. 130 (распальванне сацыяльнай варожасці), ч. 2 арт. 191 (перашкода працы ЦВК), ч. 1 арт. 342 (арганізацыя дзеянняў, якія груба парушаюць грамадскі парадак). Пазней яму дадалі яшчэ паўтара года за нібыта злоснае непадпарадкаванне адміністрацыі калоніі. Прызнаваць віну Сяргей катэгарычна адмовіўся.

Ціханоўскага трымалі ў поўнай ізаляцыі ад свету. Больш за два гады пра яго не было ніякай інфармацыі. На волі за мяжой яго чакалі сын Карней і дачка Агнія. І жонка Святлана Ціханоўская.

• 30
• 1
• 3
• 0
• 3
• 5
• 2
• 0