Калядныя, юраўскія, купальскія, хрэсбінныя, салдацкія... Складанка аўтэнтычнага фалклёру «Спевы Беларусі»
Гадавыя земляробчыя працы і святы каляндарнага кола беларусаў, знакавыя падзеі жыццёвага цыкла: нараджэнне—шлюб—нараджэнне дзяцей—смерць чалавека — заўсёды суправаджаліся песнямі. Складанка «Спевы Беларусі» — спроба сабраць пад адну вокладку найбольш яскравыя іх узоры.
«У дахрысціянскую эпоху каляндарна-абрадавыя святы ў Беларусі былі першапачатковай формай адліку часу, — піша ў прадмове да дыску фалькларыстка Таццяна Песнякевіч. — Кожная пара года мела адпаведныя абрады і іх песеннае суправаджэнне».
«Спевы Беларусі» — своеасаблівая фолк-энцыклапедыя, бо тут прэзентаваныя ці нІ ўсе рэгіёны краіны — ад Мазыра да Гродна і ад Палесся да Падняпроўя. А таксама усе папулярныя віды калядарна-абрадавых і сямейна-абрадавых песень — хрэсбінныя, бяседныя, калядныя, веснавыя, юраўскія, купальскія, жніўныя...
«Гэта збор аўтэнтычнага фальклору, які наўрад ці пачуеш на «Славянскім базары», хіба калі-нікалі такое можна паслухаць на фэстах у мястэчках», — кажа прадусарка Арына Вележ.
«Спевы Беларусі» — толькі адзін з тамоў амбітнага праекту, «Беларускай музычнай калекцыі» з 16 дыскаў. Яго збірае Арына Вележ супольна з фалькларыстамі Таццянай Песнякевіч, Сяргеем Глушко і Студэнцкім фальклорным таварыствам. Яны плануюць сабраць у «Калекцыі» выбітныя ўзоры беларускай музычнай спадчыны. Ужо выйшаў дыск сярэднявечнай музыкі ў выкананні «Старога Ольсы», зборнік духоўных спеваў «Музыка беларускіх храмаў», дыск постфолку і кружэлка беларускага музычнага авангарду. Яшчэ пабачаць свет зборка музыкі беларускага Рэнесансу, дыск спеваў ХVII-ХІХ ст. у выкананні Віктара Скорабагатава, дыск стылізацый пад музыку 1920-х, этна-джазу, а таксама найлепшае з белрока 1980—90-х. Усе дыскі серыі аб'яднаныя і фізічна: на карэнчыку кожнага будзе пададзена па фрагменце старажытнай мапы. Слухач, які сабраў усе дыскі, зможа цешыцца з абрысу ВКЛ узору ХVI ст.
«Спевы Беларусі» аздобленыя таксама па-англійску. Чаму? «Наш праект і на экспарт, найперш у Нямеччыну і Польшчу, дзе існуе попыт на беларускі фальклор, — кажа Арына Вележ. — У дадатак адзіны вытворца DVD-дыскаў у Беларусі, кампанія Vigma, павярнулася абліччам да айчыннай музыкі. І яны таксама зацікаўленыя ў прасоўванні гэтай музыкі ў Еўропе».
Кружэлка выйшла накладам у 1500 асобнікаў.
Спевы Беларусі/Authentic Songs of Belarus. «Вігмагруп», Мінск, 2009.
Літовец Віталіюс Моцкус заняў пасаду Стрыжака ў «Байсоле». Хто гэта такі?34
Каментары