Горад у Германіі прапанаваў жыхарам даносіць адно на аднаго па прыкладзе «майстра даносаў». Тыя масава абурыліся
«Штазі пашырае дзейнасць».
Як піша нямецкі часопіс Bild, улады нямецкага горада Наймюнстэр (на поўначы Германіі) у сацсетках папрасілі жыхароў часцей звяртаць увагу на выпадкі няправільнай паркоўкі і паведамляць пра гэта ў паліцыю разам з фатаграфіяй парушэння.
У якасці прыкладу для пераймання быў прыведзены 18-гадовы хлопец Ніклас Матэі, вядомы многім у Германіі па мянушцы «майстар даносаў», які толькі за мінулы год напісаў на сваіх землякоў ужо 4227 скаргаў за розныя віды парушэнняў — ад няправільнай паркоўкі да галінкі, якая ўпала на дарогу, ці ўжывання гучнага пыласоса.
«Паведамляйце нам аб незаконнай паркоўцы. Хіба ў кожным з нас не жыве маленькі «майстар даносаў»? Калі вы заўважылі парушэнне, то можаце скласці скаргу праз фармуляр на нашым сайце і адправіць яе нам на email, пажадана з фотаздымкамі», — напісала адміністрацыя Наймюнстэра.
Рэакцыя жыхароў не прымусіла сябе доўга чакаць. Як адзначае Bild, заклік чыноўнікаў натыкнуўся на рэзка негатыўную рэакцыю гараджан, якія пісалі ў каментарах, што «гэта брыдка», што «гэты горад — проста дно», што «гэта нагадвае дзейнасць Штазі» і шмат чаго іншага.
Улады горада ў адказ на крытыку заявілі, што «падобная рэакцыя іх здзівіла, бо яны ўжо дзесяць гадоў прапаноўваюць жыхарам магчымасць карыстацца афіцыйным парталам для скарг на розныя парушэнні».
Таксама яны адзначылі, што не запрашалі «майстра даносаў» у Наймюнстэр (хоць той і паабяцаў, што туды прыедзе, перадае Bild).
Нагадаем, што 18-гадовы Ніклас Матэі жыве ў горадзе Грэфенхайніхен (на ўсходзе Германіі) і сам называе сябе ў сацсетках «майстрам даносаў». Хлопец публічна хваліў спецслужбы Кітая і «Штазі» — рэпрэсіўны орган Міністэрства дзяржбяспекі ГДР, які кантраляваўся савецкім КДБ.
«Абсалютны кантроль я лічу правільным. Гэта дапамагае таму, каб людзі лепш думалі, ці парушаюць яны закон. З тым, хто выконвае закон, нічога не можа здарыцца, — сказаў юнак газеце Welt. — Ужо павінна быць нешта накшталт «Штазі». Не ў такім маштабе. У іх было псіхалагічнае прыгнечанне. Такіх метадаў не павінна быць. Але абсалютны кантроль, я думаю, гэта нармальна».
«Новая «Штазі» павінна сачыць толькі за грамадскай прасторай і караць за парушэнні. Але я дыстанцуюся ад такіх метадаў, як «псіхалагічнае прыгнечанне» і таму падобных», — дадаў ён у інтэрв'ю Bild.
Цяпер чытаюць
Хто той неадэкватны беларус, які ляснуў дзіцятка галавой аб падлогу ў маскоўскім Шарамеццеве8
Каментары
Закон мусяць выконвацца таму што людзі масава разумеюць карысць ад іх. А не з-за таго, што іх масава прымушаюць.
Не павінны людзі выконваць кожны чых чыноўніка на паперцы. У выніку дрэнных рашэнняў праблемы мусяць быць у чыноўніка, а не ў людей, якіх прымусілі гэта выконваць.