Як змяніць беларускія нумары на літоўскія. Што трэба і колькі каштуе працэдура?
Расказваем, як паставіць на ўлік у Літве машыну з Беларусі.
Хто можа зарэгістраваць аўто ў Літве?
Беларусы, якія жывуць у Літве па часовым або пастаянным ДНЖ, маюць права паставіць свае беларускія аўтамабілі на літоўскі ўлік. Калі ДНЖ яшчэ няма, то атрымаць літоўскія нумары не атрымаецца.
Першы важны момант, на які варта звярнуць увагу, гэта дата рэгістрацыі вашага аўтамабіля ў Беларусі. Аўтамабіль павінен быць куплены вамі мінімум за 6 месяцаў да даты пераезду ў Літву, калі быць дакладней, даты атрымання ДНЖ.
Першыя крокі
Рэгістрацыяй транспартных сродкаў у Літве займаецца Regitra (аналаг нашага рэгістрацыйнага аддзялення ДАІ).
Але паколькі ваш аўтамабіль лічыцца таварам з трэціх краін, перад рэгістрацыяй неабходна прайсці экспертызу на адпаведнасць аўтамабіля еўрапейскім стандартам.
Экспертызу праводзіць арганізацыя пад назвай Tuvlita. За легкавы аўтамабіль трэба заплаціць 90 еўра. Калі ваш аўтамабіль ад пачатку быў прызначаны для еўрапейскага рынку, то працэдуру можна назваць фармальнай.
Калі вы ўласнік аўто з ЗША, машыну трэба будзе даабсталяваць супрацьтуманнай фарай на тыльнай частцы аўто.
Пасля экспертызы трэба прайсці тэхагляд, кошт паслугі — 23 еўра. Ён трохі адрозніваецца ад беларускага тэхагляду, але неістотна.
Наступны этап — купля літоўскай страхоўкі. Яна мусіць быць выпісаная да таго, як вы будзеце падаваць дакументы ў Regitra.
У залежнасці ад страхавой кампаніі яна можа каштаваць ад 150 да 300 еўра на год.
Што далей
Маючы на руках сертыфікат адпаведнасці аўто еўрапейскім стандартам (экспертызу), тэхагляд і страхоўку, можна адпраўляццца на зверку VIN-нумару і падачу дакументаў на выдачу тэхпашпарту.
Выдаткі на рэгістрацыю (тэхпашпарт і нумары) складаюць каля 35 еўра.
У залежнасці ад узроўню экалагічнасці аўто, з вас могуць узяць экалагічны падатак. Яго сума залежыць ад аб'ёмаў шкодных выкідаў і можа складае ад 13,5 да 540 еўра. За новыя і больш-менш сучасныя аўтамабілі падатак нулявы.
Падатак на шкодныя выкіды трэба плаціць толькі адзін раз пры пастаноўцы на ўлік. Штогадовага падатку на аўто ў Літве няма.
Нягледзячы на тое, што працэдура пастаноўкі на ўлік беларускага аўтамабілі можа здавацца складанай, змяніць краіну прапіскі можна за адзін дзень.
Беларусы, якія нядаўна праходзілі гэтую працэдуру кажуць, што на ўсё сыходзіць 4-5 гадзін.
Што з беларускім тэхпашпартам і нумарамі?
Беларускі тэхпашпарт забірае Regitra. З нумарамі, як паказвае практыка, можа быць па-рознаму. У адных іх забіраюць на захоўванне разам з тэхпашпартам, а іншым пакідаюць на руках.
Калі беларус раптам захоча вярнуць аўтамабілю беларускую прапіску, то з гэтым няма праблем. Уласніку трэба будзе зноў звярнуцца Regitra, зняць аўтамабіль з літоўскага ўліку, пасля чаго яму вернуць беларускія дакументы і нумарныя знакі.
Паколькі атрыманне літоўскіх нумароў не азначае аўтаматычнае зняцце аўтамабіля з уліку ў Беларусі, вам давядзецца штогод плаціць за яго транспартны падатак на радзіме.
Ці існуюць нейкія абмежаванні?
Паколькі пры такой рэгістрацыі аўто беларусы вызваляюцца ад аплаты мытных плацяжоў, беларускія аўтамабілі на літоўскай рэгістрацыі нельга прадаваць цягам 12 месяцаў ад даты першай рэгістрацыі ў Літве.
Калі вы захочаце прадаць аўтамабіль раней, то гэта зрабіць магчыма, але давядзецца заплаціць 10% мыта і 21% ПДВ.
Цяпер чытаюць
«Гэта шлях адзіночкі». Беларус большую частку жыцця праводзіць у вандроўках — наведаў ужо амаль 500 аб’ектаў ЮНЕСКА1
Каментары