Беларускія біятланісты прапусцяць спаборніцтвы дзеля ўдзелу ў выбарах
Біятланістаў зборнай адклікалі ў Беларусь, яны не будуць удзельнічаць у гонках Кубка Расіі ў суботу і нядзелю.
Біятланісты зборнай Беларусі прапусцяць суботнія і нядзельныя гонкі ў межах чэмпіянату і Кубка Расіі ў Яраслаўскай вобласці.
Спартоўцы паедуць на радзіму, але з неспартыўнай задачай: узяць удзел у выбарах. Беларусы не выступяць у спрынтарскіх гонках і мас-стартах.
«Беларусы адпраўляюцца выбіраць прэзідэнта краіны, і мы іх не ўбачым у бліжэйшыя выхадныя», — паведамляе «Матч ТВ».
Пра тое, што з-за выбараў давядзецца прапускаць гонкі, раней расказвала біятланістка Ганна Сола.
«У нас зараз ідуць выбары, не ведаю, ці паспеем паласаваць, магчыма, давядзецца прапускаць гонкі, каб ехаць галасаваць. Але наш прэзідэнт сказаў, што найлепшы голас — гэта фініш з сцягам», — казала біятланістка пасля перамогі на этапе Кубка Расіі.
Нагадаем, пасля пачатку паўнамаштабнай вайны зборная Беларусі была адхілена ад усіх міжнародных спаборніцтваў па біятлоне пад эгідай Міжнароднага саюза біятланістаў. Кіраўніцтва IBU займае жорсткую пазіцыю: там неаднаразова заяўлялі, што беларусаў вернуць на Кубак свету толькі пасля заканчэння вайны.
Апошнія некалькі гадоў зборная Беларусі ўдзельнічае толькі ў сумесных спаборніцтвах з расіянамі, якіх таксама адхілілі ад міжнародных стартаў.
Каментары