У канцы 2021 года ў Вільні на праспекце Гедыміна адкрыўся бар «Пагоня» з гербам на ўваходзе. Але ў пачатку гэтага года ўстанова змяніла назву на Poliklinika. «Наша Ніва» даведалася ва ўладальніка, што стала прычынай.
Уладальнік установы, літовец Рыціс Крыцэнас, кажа, што адкрыць бар яго натхнілі падзеі 2020—2021 гадоў у нашай краіне, пасля якіх у Вільню прыехала шмат беларусаў.
«Калі беларусы пачалі ўцякаць з краіны, я пазнаёміўся з многімі з іх і падумаў, што трэба адкрыць бар для беларусаў», — кажа Рыціс.
Прычынай змены назвы ўладальнік называе вялікую колькасць негатыву з боку літоўскіх нацыяналістаў, а таксама скарачэнне колькасці беларусаў у Літве.
«Нацыяналісты запусцілі хвалю негатыву, звязанага з «ліцвінізмам» і пашпартам Новай Беларусі. Негатыву было вельмі шмат. Не было сэнсу пакідаць назву. Запосціш што-небудзь у сацсетках — і нацыяналісты адразу нападаюць», — прызнаецца Рыціс.
Уладальнік адзначае, што беларусы працягваюць прыходзіць у бар і пасля перайменавання. А вось частку літоўцаў, на яго думку, назва адштурхоўвала з-за негатыўнага фону вакол ліцвінізму, пра які сталі больш казаць у літоўскіх СМІ.
Таксама Рыціс адзначыў, што з-за міграцыйнай палітыкі Літвы колькасць беларусаў у Вільні скарачаецца.
«Міграцыйная палітыка складаная, многія з'язджаюць у Польшчу, таму бар не змог бы выжыць, калі б працягваў канцэнтравацца толькі на беларусах. Трэба было мяняць канцэпцыю».
Рыціс адзначае, што асабліва шмат хейту з'явілася прыблізна за паўгода да рашэння пра перайменаванне бара.
Вінаватымі ў такім развіцці сітуацыі ён лічыць як літоўцаў, так і беларусаў у Літве.
«Беларусы ў Літве і той жа штаб Святланы Ціханоўскай маглі б неяк рэагаваць [па тэме ліцвінізму]. Але ў выніку ні з літоўскога, ні з беларускага боку няма нармальнай інфармацыі. Нясуць нейкую лухту, і ніхто не можа за сябе пастаяць. А я ўжо стаміўся ўсім нешта даказваць, таму і перайменаваў установу», — сказаў уладальнік бара ў каментары «Нашай Ніве».
Трэба адзначыць, што па тэме ліцвінізму ладзіліся круглыя сталы з удзелам беларускіх і літоўскіх гісторыкаў. А Святлана Ціханоўская называла гэта штучна створанай праблемай, якую раздзьмухваюць, каб пасварыць літоўцаў і беларусаў.
Цяпер чытаюць
За мінулы год насельніцтва Беларусі скарацілася яшчэ на 53 тысячы чалавек19
Каментары
ачу, станіслававічус!