Ацяпленне ў спажыўцоў першай чаргі ў Гродне пачнуць адключаць з 15 красавіка, паведамілі ў Гродзенскім гарадскім выканаўчым камітэце.
Паводле нарматываў, ацяпленне ў жыллёвым фондзе пачынаюць адключаць, калі сярэднясутачная тэмпература паветра трымаецца на ўзроўні +8 ℃ і больш цягам 3 сутак.
У гарвыканкаме Гродна адзначылі, што згодна з прагнозам сіноптыкаў, у бліжэйшыя дні ў горадзе чакаецца больш за +20 ℃, а да пятніцы — і ўсе +26 ℃.
«Каб не дапусціць «ператопаў» і нерацыянальнага выкарыстання паліўна-энергетычных рэсурсаў, Гродзенскі гарадскі выканаўчы камітэт узгадніў адключэнне сістэм ацяплення з 15 красавіка», — паведамілі ў выканкаме.
У першую чаргу ацяпленне адключаць у грамадскіх і адміністрацыйных будынках, прамысловых арганізацыях; затым — у агульнагарадскіх лазнях, тэатрах, установах адукацыі (за выключэннем школ і дзіцячых садкоў), інтэрнатах, жыллёвым фондзе.
У апошнюю чаргу цяпло перастануць падаваць у гасцініцы, бібліятэкі, дзяржаўныя архівы, музеі, установы сацыяльнага забеспячэння, медыцынскія, лячэбна-прафілактычныя, школьныя і дзіцячыя дашкольныя ўстановы адукацыі, спецыялізаваныя вучэбна-спартыўныя ўстановы.
Цяпер чытаюць
Жонка Статкевіча расказала, пра што паспела паразмаўляць з ім13
Каментары