У справаздачнасці групы Raiffeisen за 2024 год адлюстраваныя вынікі продажу долі ў Прыёрбанку. З гэтых даных вынікае, што цана здзелкі склала 215 мільёнаў еўра пры агульным кошце банка па капітале ў 599 мільёнаў еўра, піша Myfin.by.
Ацэначна доля «Райфайзэн груп» у капітале Прыёрбанка — гэта 526 мільёнаў еўра (зыходзячы з пакета ў 87,74%). Гэта значыць, што беларускі актыў прадалі з дысконтам у 60%.
Беларускія аўдытары, апытаныя Myfin.by, называюць такі дысконт «экстрэмальным». Само па сабе тое, што банк прадаецца з дысконтам, — нармальна. Але для рэгіёну СНД усё ж рэдкасць, калі кошт банка ацэньваецца ніжэй, чым 0,5 уласнага капіталу.
Аднак жа, на думку крыніцы з інвестыцыйнага фонду, дысконт у 60 % цалкам адпавядае практыкам, якія склаліся на расійскім рынку ў адносінах да выхаду «недружалюбных» інвестараў, якія пажадалі пакінуць рынак. Так, цяпер дысконт вызначаны на ўзроўні 60% ад незалежнай ацэнкі актываў, пацверджанай экспертызай.
Акрамя таго, прадавец або купец павінен выплаціць у бюджэт 35%-ны падатак (адначасова або ў растэрміноўку) ад ацэначнага кошту актыву. У выпадку з продажам Прыёрбанка абмежаваліся, аднак, дысконтам у 60%.
29 лістапада мінулага года група Raiffeisen завяршыла продаж кампаніі Soven 1 Holding Limited 87,74% акцый АТ «Прыёрбанк», узгоднены ў верасні 2024 года. У сувязі з гэтым з кансалідаванага выніку групы выключаны як сам банк, так і яго даччыныя кампаніі — «Райфайзэн лізінг» і ТАА «Прыёрлайф».
Цяпер чытаюць
Бяспалаў канчаткова рассварыўся з Ціханоўскім: Для яго добры толькі адзін чалавек — Пракоп'еў70
Каментары