ЗША і Саудаўская Аравія падпісалі рэкордную здзелку па зброі на $142 мільярды ў першы дзень візіту Трампа на Блізкі Усход
Белы дом заяўляе, што ў першы дзень візіту прэзідэнта Дональда Трампа на Блізкі Усход паміж ЗША і Саудаўскай Аравіяй было падпісана «найбуйнейшае пагадненне аб продажы абароннай прадукцыі ў гісторыі».
Акрамя гэтага былі заключаныя і іншыя эканамічныя здзелкі. Пасля Эр-Рыяда Трамп накіруецца ў Катар і ААЭ, піша Бі-бі-сі.
У заяве Белага дома гаворыцца, што кошт зброевага пагаднення паміж краінамі склаў 142 мільярды даляраў і ўключае пастаўку Саудаўскай Аравіі «сучаснага баявога абсталявання і паслуг прыкладна ад паўтара дзясятка амерыканскіх абаронных кампаній».
Пагадненне заключана ў пяці катэгорыях:
- Развіццё ВПС і касмічныя магчымасці
- Паветраная і супрацьракетная абарона
- Марская і прыбярэжная бяспека
- Бяспека межаў і мадэрнізацыя сухапутных войскаў
- Мадэрнізацыя інфармацыйна-камунікацыйных сістэм
Пакет таксама ўключае «маштабную падрыхтоўку і падтрымку для нарошчвання патэнцыялу ўзброеных сіл Саудаўскай Аравіі, уключаючы ўмацаванне саудаўскіх вайсковых акадэмій і ваенна-медыцынскіх службаў».
Акрамя таго, у прэс-рэлізе Белага дома пералічваюцца іншыя пагадненні, дасягнутыя ў аўторак.
У прыватнасці, Саудаўская Аравія абавязалася інвеставаць у ЗША 600 мільярдаў даляраў. Адна з абласцей інвестыцый — гэта цэнтры апрацоўкі дадзеных штучнага інтэлекту па ўсёй тэрыторыі ЗША.
Амерыканскія тэхналагічныя кампаніі, у сваю чаргу, абавязаліся інвеставаць 80 мільярдаў даляраў у «перадавыя пераўтваральныя тэхналогіі ў абедзвюх краінах».
Таксама ЗША будуць экспартаваць у Саудаўскую Аравію газавыя турбіны і энергетычныя тэхналогіі на суму 14,2 мільярда даляраў і пасажырскія самалёты Boeing 737-8 на суму 4,8 мільярда даляраў.
Краіны таксама дамовіліся аб супрацоўніцтве паміж энергетычным і горназдабыўным сектарамі эканомікі.
Пакуль Дональд Трамп сустракаўся з кіраўніцтвам дзяржавы, у прыватнасці з кронпрынцам Махамедам бін Салманам, перамовы з найбуйнейшымі прадстаўнікамі саудаўскага бізнесу вялі сябры амерыканскай дэлегацыі: дарадца Трампа мільярдэр Ілан Маск, генеральны дырэктар кампаніі OpenAI Сэм Альтман і кіраўнік кампаніі-гіганта па вытворчасці камп’ютарных чыпаў Nvidia Джэнсэн Хуанг.
Гэта першы афіцыйны замежны візіт Трампа з пачатку новага прэзідэнцкага тэрміну. У найбліжэйшыя дні ён плануе наведаць яшчэ дзве краіны Блізкага Усходу: Катар і ААЭ.
Цяпер чытаюць
Каментары