17-гадовы стартапер Бурбіцкі намякае, што Лібер прабраўся да яго ў кватэру і раскідаў рэчы
Гісторыя з 17-гадовым стартаперам з Баранавіч Аляксеем Бурбіцкім, які абвінаваціў Паўла Лібера ў замоўчванні факта ўзлому платформы «Новая Беларусь», набыла новы паварот. Пасля публікацый пра сябе ў СМІ Аляксей Бурбіцкі, па яго словах, сутыкнуўся з пагрозамі, блакіроўкай інстаграма і нават пагромам кватэры.
«Дзякуй за блакіроўку майго асноўнага акаўнта, Павел Лібер. Калі вы будзеце працягваць рабіць тое, што вы робіце, наступствы для вас будуць яшчэ горшыя», — пагражае хлопец, суправаджаючы відэа кадрамі з нібыта свайго разгромленага жытла.
На відэа можна пабачыць неахайна расстаўлены абутак, крэслы і каробку, што валяюцца на падлозе, некалькі адкрытых шуфлядак і шафу з беспарадкам унутры. На першы погляд можа падацца, што ў кватэры проста даўно не было генеральнай прыборкі. Але Бурбіцкі настойвае: «Гэта проста пераходзіць усе межы. Паліцыя разбярэцца».
Варта адзначыць, што ўжо праз 15 хвілін пасля публікацыі яго відэа набрала некалькі сотняў лайкаў, пры тым што дагэтуль мае менш за 50 праглядаў.
Таксама Бурбіцкі скардзіцца, што пасля публікацый у СМІ сутыкнуўся з хейтам і пагрозамі, якія ананімныя аўтары дасылаюць яму ў тэлеграме і інстаграме. Некалькі з іх ён пераслаў журналісту «Нашай Нівы». Усе яны носяць нецэнзурны характар, а галоўны іх пасыл у тым, што Аляксею на пару з блогерам Сяргеем Пятрухіным будзе вельмі дрэнна, калі ён не спыніць публікаваць відэа з крытыкай Паўла Лібера.
Хлопец кажа, што збіраецца звяртацца ў паліцыю, пры гэтым нібыта атрыманыя ананімныя пагрозы ўжо выдаліў. На просьбу журналіста «Нашай Нівы» паказаць скрыншоты з паведамленнямі-пагрозамі Бурбіцкі зліўся: «Я выдаліў. Не хачу ўсё гэта захоўваць».
Нагадаем, 19 мая на канале блогера Сяргея Пятрухіна выйшла відэа, у якім ён даў слова 17-гадоваму Аляксею Бурбіцкаму з Баранавіч — герою, які «адкрыта пагадзіўся распавесці аб праблеме, не хаваючы твару». У роліку ён зачытаў абвінавачванні на адрас Паўла Лібера і каманды ў тым, што яны адмыслова ўтаілі факт узлому платформы «Новая Беларусь» і зліву асабістых даных карыстальнікаў. Пры гэтым у якасці пруфаў уцечкі былі далучаныя скрыншоты, на якіх можна пабачыць адкрытыя даныя пра польскія бізнэсы.
Бурбіцкі таксама сцвярджаў, што з 2024 года працаваў на Лібера як праграміст, яле гэта аказалася хлуснёй.
«Аляксей у нас ніколі не працаваў», — пракаментаваў Павел Лібер «Нашай Ніве». Аляксей Бурбіцкі на запыт рэдакцыі адмовіўся падаваць іншыя пацверджанні працы на «Новую Беларусь», акрамя тых, што ён прадэманстраваў на ютуб-канале Пятрухіна:
«Усё, што ў мяне было, я ўсё расказаў Сяргею Пятрухіну, якому давяраю. Больш мне дадаць няма чаго. Усе доказы я яму таксама даў».
Варта дадаць, што шуміха пра ўзлом «Новай Беларусі» падымаецца не першы раз: раней гэтую інфармацыю распаўсюджвалі каналы, звязаныя з беларускай міліцыяй, а таксама блогер-канспіролаг Віталь Кандраценка (Вірус). Як тады, так і цяпер, каманда «Новай Беларусі» абвергла гэты факт.
Што за 17-гадовы стартапер, які выліў цэбар хлусні на Лібера на радасць беларускім спецслужбам
17-гадовы стартапер заявіў, што базу карыстальнікаў «Новай Беларусі» ўзламалі. Лібер адказвае: абвінавачванне абсурднае
Пятрухін не здаецца: хоча, каб КР заслухала 17-гадовага «стартапера». Але без яго бацькоў гэтага рабіць нельга
Цяпер чытаюць
«Пасля Новага года можам апынуцца на вуліцы». Наведаліся ў шэлтар, які дае дах над галавой палітвязням, вымушаным пакінуць Беларусь9
«Пасля Новага года можам апынуцца на вуліцы». Наведаліся ў шэлтар, які дае дах над галавой палітвязням, вымушаным пакінуць Беларусь
Зніклы Анатоль Котаў быў партнёрам самага высокапастаўленага беларускага разведчыка, які пераехаў у Польшчу. Тут можа быць ключ да разгадкі яго знікнення7777
Каментары