На дарэвалюцыйных будынках збіраліся разабраць аварыйныя ўчасткі сцен, а ў выніку адзін з фасадаў абрынуўся цалкам.
Пра гэта паведамляе тэлеграм-канал Urban Hrodna.
Дамы 31 і 33 па Вялікай Траецкай вуліцы, пабудаваныя ў канцы XIX — пачатку XX стагоддзя, выкупілі ў 2022 годзе. Новы ўласнік, гродзенская фірма «ФрутПак», збіралася адкрыць у іх рэстаран са сцэнай для канцэртаў, а ў падвале — пякарню.
Паводле дакументацыі, распрацаванай мясцовай будаўнічай фірмай «АРС Дэко», дзе пасаду намесніцы дырэктара займае былая галоўная архітэктар Гродна Вольга Барэйка, будынкі былі ў аварыйным стане, у іх быццам бы практычна адсутнічалі падмуркі.
У час рэканструкцыі збіраліся іх аб'яднаць і аднавіць гістарычнае аблічча — дэталі дэкору, страчаныя ў савецкі час, балконы, устанавіць драўляныя дзверы і вітрыны, а таксама вярнуць брамы, якія вялі з двара на вуліцу. Аварыйныя ўчасткі сцен павінны былі дэмантаваць і аднавіць з захаваннем габарытаў і вонкавага выгляду з «роднай» керамічнай цэглы.
Рэканструкцыя пачалася ў 2025 годзе, але ўжо пасля пачатку разборкі сцен дамоў фасад дома № 31 раніцай 2 чэрвеня цалкам абваліўся. Цэгла прабіла агароджу будоўлі і рассыпалася на праезную частку. У выніку здарэння ніхто не пацярпеў.
Гэта нярэдкі выпадак, калі ў час рэканструкцыі, выпадкова, а менавіта праз адсутнасць нармальнага ўмацавання ненадзейных канструкцый, разбураецца больш, чым прадугледжана па праекце. Гэтая прыкрая сітуацыя робіць рэканструкцыю больш таннай і простай для заказчыка, праекціроўшчыкаў і падрадчыкаў.
Таксама звяртае на сябе ўвагу тое, што такія гарады як Гродна і Брэст апанавала эпідэмія аварыйных гістарычных будынкаў, якія быццам не маюць аніякіх падмуркаў, паказваюць знос канструкцый пад 100% і, адпаведна, з'яўляюцца аварыйнымі, але прастаялі больш за стагоддзе і не мелі ніякіх знешніх прыкмет разбурэння аж да таго моманту, як іх не пачалі «рэканструяваць», разбіраючы да падмуркаў.
У Гродне знеслі чарговы дом у гістарычным цэнтры. На грамадскім абмеркаванні інфармацыю пра знос утаілі ад людзей
Праект, па якім знішчылі гістарычныя казармы ў Гродне, узнагародзілі ў намінацыі «архітэктурная спадчына»
У Лошыцкай сядзібе разабралі будынкі бровара, хоць абяцалі не чапаць
«Бачым, што гэта не завод, а палац». У Гродне поўным ходам ідзе рэканструкцыя будынкаў былога бровара
Цяпер чытаюць
«Гэта была жывая камера сачэння». Што рабіла віцяблянка Кацярына, каб вызваліцца праз 5 гадоў замест прысуджаных 12 гадоў10
Каментары