Мінчука, які кінуў недакурак у Вечны агонь, асудзілі па крыміналцы за хуліганства
41-гадовы мужчына, выпіўшы дома піва і каньяку, паехаў з сяброўкай прагуляцца па цэнтры сталіцы. Каля манумента Перамогі мужчына закурыў, а пасля выкінуў недакурак у Вечны агонь, пішуць Мінск-навіны.
Неўзабаве да мінчаніна падышлі супрацоўнікі міліцыі і сказалі, што ён затрыманы за здзяйсненне хуліганства. Пасля ў дачыненні да яго завялі крымінальную справу. Віну грамадзянін цалкам прызнаў, у зробленым раскаяўся.
— Абвінавачваны працуе мантажнікам у прыватнай кампаніі, — пракаментавала памочнік пракурора Партызанскага раёна Алена Панамарова, якая выступала па крымінальнай справе дзяржаўным абвінаваўцам.
— Суд прызнаў яго вінаватым у наўмысных дзеяннях, якія груба парушаюць грамадскі парадак і выражаюць яўную непавагу да грамадства, што адрозніваюцца сваёй сутнасцю выключным цынізмам (хуліганстве), і на падставе ч. 1 арт. 339 КК прызначыў пакаранне ў выглядзе штрафу 50 базавых велічынь (2 100 рублёў).
Каментары