МЗС Славакіі прыгразіла, што праз удары па нафтаправодзе «Дружба» пацярпіць сама Украіна
Міністр замежных спраў Славакіі Юрай Бланар заявіў, што атакі УСУ па нафтаправодзе «Дружба», па якім расійская нафта паступае ў Славакію, супярэчаць інтарэсам яго краіны і могуць прывесці да дэфіцыту дызеля ва Украіне.
Паводле яго слоў, нафтаперапрацоўчы завод Slovnaft з’яўляецца важным пастаўшчыком паліва ў рэгіёне: каля 10% штомесячнага спажывання дызеля ва Украіне забяспечваецца менавіта ім.
Украінскі бок, адзначыў Бланар, прыняў гэтую інфармацыю да ўвагі.
Міністр падкрэсліў, што Славакія плануе абмеркаваць сітуацыю з украінскім урадам.
«Мы разумеем складанасці для Украіны, але для нас гэтая інфраструктура вельмі важная. Асабліва, калі бачым, што сама Украіна рызыкуе застацца без дастатковай колькасці паліва», — сказаў ён.
Міністры замежных спраў Венгрыі і Славакіі таксама афіцыйна паскардзіліся Еўракамісіі, падкрэсліўшы, што атакі пагражаюць бяспецы энергетычных паставак у рэгіёне і могуць стварыць праблемы нават для самой Украіны.
Каментары