Ідэолагі расказваюць народу жахі пра інтэрнэт і перасцерагаюць ад выкарыстання ChatGPT

Большая частка дакладу аб «экстрэмізме ў моладзевым асяроддзі» прысвечаная пералічэнню таго, што дзяржава разумее пад экстрэмізмам і пакаранню за такія дзеянні. У тым ліку гэта «абраза прадстаўніка ўлады», «распаўсюд загадзя хлуслівых звестак пра палітычнае, эканамічнае, сацыяльнае, вайсковае або міжнароднае становішча Рэспублікі Беларусь».

Асобна ў метадычцы прагаворваецца, чаму беларусаў масава судзяць за лайкі і рэпосты і чаму нават прагляд інфармацыйных рэсурсаў, абвешчаных «экстрэмісцкімі», дзейныя ўлады лічаць парушэннем арт. 19.11 КаАП «Распаўсюд інфармацыйнай прадукцыі, уключанай у рэспубліканскі спіс экстрэмісцкіх матэрыялаў, а таксама выраб, выданне, захоўванне альбо перавозка з мэтай распаўсюджвання такой інфармацыі». Вось як гэта тлумачаць прапагандысты:

«Увесь кантэнт, які адпраўляюць іншыя людзі, або прагледжаныя файлы, размешчаныя ў чатах «Тэлеграм», месенджар па змоўчванні захоўвае ў папку Telegram Desktop. Шлях да яе залежыць зыходзячы з аперацыйнай сістэмы. Аналагічна аўтаматычнае захаванне файлаў адбываецца і ў месенджары Viber. Захоўванне матэрыялаў у прыватнасці мае на ўвазе пад сабой фактычнае знаходжанне на прыладзе (мабільныя тэлефоны, планшэты, камп'ютары і г.д.) файлаў, прызнаных экстрэмісцкімі».

Гэта нібыта «стварае склад адміністрацыйнага правапарушэння, а менавіта захоўванне матэрыялаў з мэтай распаўсюджвання».

Ідэолагі мяркуюць, што менавіта «моладзь як самая сацыяльна неабароненая група насельніцтва, якая больш за ўсё паддаецца знешняму ўздзеянню, з'яўляецца найбольш актыўным аб'ектам уцягвання ў экстрэмісцкую дзейнасць».

Чыноўнікі лічаць, што «ключавымі фактарамі моладзевага экстрэмізму» з'яўляюцца:

• уплыў бацькоў, якія адрозніваюцца радыкальнымі перакананнямі;
• уплыў групы аднагодкаў, якія з'яўляюцца прыхільнікамі экстрэмісцкіх поглядаў;
• уплыў аўтарытэтных асоб, якія знаходзяцца ў коле зносін падлетка;
• стрэс, які пацягнуў за сабой дэзынтэграцыю ў грамадстве;
• уласныя ўяўленні і маральныя ўстаноўкі, асобасныя псіхалагічныя асаблівасці, псіхічнае напружанне.

Яшчэ ідэолагаў турбуюць «моладзевыя субкультуры дэструктыўнай накіраванасці», але такія на тэрыторыі Гомельскай вобласці ў цяперашні час адсутнічаюць, сцвярджаецца ў метадычцы.

У ёй выкарыстоўваецца расійская інфаграфіка пра моладзевыя субкультуры, самымі небяспечнымі сярод якіх названыя футбольныя фанаты і фрыкі. Таксама даюцца «асноўныя рэкамендацыі па прафілактыцы ўключэння ў дэструктыўныя субкультуры».

Павялічыць

Што тычыцца тэмы кібератакі, то, як сказана ў метадычцы, Беларусь знаходзіцца на 3‑м месцы ў рэйтынгу краін СНД, якія часцей за ўсё падвяргаюцца кібератакам. Такія вынікі даследавання, праведзенага летась.

Кожная пятая атака ў Беларусі прыпадае на дзяржсектар (22%). На другім месцы — сфера прамысловасці (14%), а на трэцім радку — фінансавая галіна (11%).

«Шмат нападаў таксама накіраваныя на сектар тэлекамунікацый, сферы навукі і адукацыі (8%). Кожная другая кібератака (57%) прыводзіць да ўцечкі канфідэнцыйных даных. Радзей яны парушаюць асноўную дзейнасць (16%) або нясуць прамыя фінансавыя страты (8%). Больш за палову скрадзеных звестак складаюць персанальныя звесткі і камерцыйная таямніца», — сказана ў матэрыялах.

Асобна ідэолагі перасцерагаюць ад выкарыстання штучнага інтэлекту ў працы з дакументамі:

«Нават калі штучны інтэлект выкарыстоўваецца на карысць, трэба быць асцярожным. Калі работнік арганізацыі думае, што загрузіць дакумент у чат GPT і ён усё хутка зробіць, то гэта прамы шлях да ўцечкі канфідэнцыйных даных. Дакументы адправяцца на серверы ў іншай дзяржаве, і законы нашай краіны ўжо не могуць гарантаваць іх бяспеку».

У сваю чаргу, рэсурс магілёўскіх праваабаронцаў Mayday.team азнаёміўся з падобнай метадычкай, якая разлічаная на працу з інтэлігенцыяй і ў якой інтэрнэт як з'ява ўсімі сіламі дэманізуецца. Прапагандысты даказваюць, што

«інтэрнэт ствараўся ў амерыканскіх вайсковых лабараторыях — і з тых часоў… працуе як зброя. Як зброя супраць нас. Спадарожнікавы інтэрнэт забяспечвае сувязь на полі бою. Сацыяльныя сеткі дазваляюць збіраць групы людзей і ананімна кіраваць імі на адлегласці. Крыптавалюты — без магчымасці адсочваць іх, каб аплачваць куратараў такіх сетак».

У якасці прыкладу прыводзіцца зіма 2023 года, калі праз сацыяльныя сеткі «паспрабавалі нацкаваць членаў інтэрнэт-супольнасці «ПВК Родан» на футбольных фанатаў». Паводле версіі Акадэміі кіравання пры Лукашэнку, якая падрыхтавала агітматэрыялы, гэта быў адзін з трэнінгаў, адно з самых натуральных палявых вучэнняў, каб вывесці зумераў на вуліцы і счапіць са спартыўнымі «ультрас».

«Інтэрнэт з поля бою, дзе гаспадары ўсяго — англасаксы, дарос ужо і да інструмента рэальнага ўплыву на жывых людзей. Любое націсканне на любой клавіятуры — гэта адначасова яшчэ і ліст англасаксаў… Кожны сучасны гаджэт дакладвае «ў цэнтр» (або ў Лэнглі, або ў «Вашынгтонскі абкам») пра ўсё, што адбываецца не толькі ўнутры яго, але і вакол. Такім чынам заходнікі — пры жаданні — могуць ведаць пра ўсё, чаму аддае перавагу беларускі, напрыклад, прапагандыст», — застрашваюць інтэлігенцыю агітатары.

Яшчэ з гэтых матэрыялаў можна даведацца, што Вікіпедыя як мінімум «з 2008 года рэдагуецца Федэральным бюро расследаванняў (ФБР) і Цэнтральным разведвальным упраўленнем (ЦРУ)».

• 0
• 0
• 11
• 11
• 0
• 0
• 2
• 0