На кліматычнай канферэнцыі ААН у Бразіліі здарыўся пажар — усіх удзельнікаў давялося эвакуяваць
Полымя перакінулася з кітайскага павільёна на суседнія.
Учора на тэрыторыі канферэнцыі COP30 у Белеме ў адным з павільёнаў пачаўся пажар. Усе дэлегаты былі эвакуяваныя, піша Bild.
Полымя, па паведамленнях, перакінулася з кітайскага павільёна на суседнія: у прыватнасці, агонь заўважылі ў павільёне аховы здароўя і навукі.
Прадстаўнікі нямецкіх экалагічных арганізацый паведамілі ў СМІ, што эвакуацыя прайшла добра: удзельнікаў канферэнцыі адразу вывелі на адкрытую прастору. Ніхто не пацярпеў, агонь хутка ўдалося патушыць.
«Ён ужо пад кантролем, пажарная служба штата Пара знаходзіцца на месцы», — сказаў міністр турызму Сэлса Сабіну па бразільскім тэлебачанні.
Пажар адбыўся ў перадапошні дзень двухтыднёвай кліматычнай канферэнцыі ААН COP30, на якой перагаворшчыкі з прыкладна 190 краін працягвалі інтэнсіўна абмяркоўваць ключавыя пытанні, такія як фінансаванне абароны клімату і гандлёвыя меры.
Каментары