У рэспубліканскім дзіцячым турніры па спартыўнай гімнастыцы «Кубак Маўглі» возьмуць удзел 350 дзяцей ад 2 да 6 гадоў. Пра гэта паведаміў кіраўнік дзіцячага дашкольнага клуба аздараўленчай спартыўнай гімнастыкі «Маўглі» Анатоль Ашуркоў 27 мая на прэс‑канферэнцыі ў Мінску.
Спаборніцтвы праводзяцца ўжо другі раз, але сёлета ў іх удзельнічаюць не толькі мінчане, але і дзеці з Мінскага раёна, Барысава і Гомеля.
Усе ўдзельнікі падзелены на тры ўзроставыя групы: у першую, самую малалікую, уваходзяць дзеці 2—3 гадоў, у другую — ад 3 да 4,5 года, у трэцюю — дзеці, якім больш за 4,5 года.
Сярод навін гэтага года — нумары з удзелам бацькоў. Усяго дзеці падрыхтавалі каля 30 нумароў. Крытэрыямі ацэнкі выступленняў будуць гімнастычныя рухі, сінхроннасць, музычнасць, раскрыццё сюжэта і дэкарацыі, адзначыў Ашуркоў.
«У гэтым турніры для дзяцей галоўнае — удзел. Мы разумеем, што фраза «Хутчэй, вышэй, мацней!» пакуль не для іх. Самая галоўная задача спаборніцтваў — пераканаць бацькоў у неабходнасці дзіцячай гімнастыкі», — расказаў журналістам выканаўчы дырэктар прадстаўніцтва НАК у Мінску, алімпійскі чэмпіён Леанід Тараненка.
Турнір пройдзе на веладроме культурна‑спартыўнага комплексу «Мінск‑Арэна» 30 мая. Паколькі мерапрыемства будзе доўжыцца не менш чым чатыры гадзіны, для гледачоў з маленькімі дзецьмі будзе працаваць «зона актывацыі», дзе дзеці змогуць пагуляць.
У наступным годзе турнір плануецца зрабіць міжнародным. Арганізатарам ужо паступілі заяўкі ад трэнераў з Малдовы і Расіі, таксама будуць падключацца еўрапейскія краіны. На наступных спаборніцтвах у праграму будуць уключаны практыкаванні на гімнастычных снарадах.
Цяпер чытаюць
Папулярную тыктокерку з Лунінца, якая ратавала бяздомных жывёлінаў, асудзілі за палітыку2
Каментары