Новае СІЗА павінна быць пабудаванае на ўскраіне Мінска цягам пяці гадоў.
Новае СІЗА павінна быць пабудаванае на ўскраіне Мінска цягам пяці гадоў.
Комплекс будынкаў і збудаванняў следчага ізалятара № 1 і рэспубліканскай агульнасаматычнай бальніцы павінен быць пабудаваны і ўведзены ў эксплуатацыю ў 2010–2015 гадах у прамысловай зоне Калядзічы на ўскраіне Мінска. Гэта прадугледжана ўказам прэзідэнта № 288 ад 7 чэрвеня, тэкст якога размешчаны на сайце Нацыянальнага цэнтра прававой інфармацыі.
У цяперашні час СІЗА № 1 размешчаны ў цэнтры сталіцы, на вуліцы Валадарскага. На яго тэрыторыі знаходзіцца Пішчалаўскі замак пабудовы 1825 года.
Паводле ўказа, будаўніцтва будзе ажыццяўляцца ў два этапы паралельна з распрацоўкай, экспертызай і зацвярджэннем неабходнай праектнай дакументацыі. У 2010–2011 гадах намечана пабудаваць рэспубліканскую агульнасаматычную бальніцу, а таксама стварыць інжынерную і транспартную інфраструктуру да яе. У 2012–2015 гадах — будынкі і збудаванні следчага ізалятара і неабходную інфраструктуру.
Заказчыкам праектавання і будаўніцтва комплексу вызначана МУС, генеральнай падраднай арганізацыяй — ААТ «Мінскпрамбуд», генеральнай праектнай арганізацыяй па распрацоўцы праектнай дакументацыі на будаўніцтва будынкаў і збудаванняў следчага ізалятара, а таксама інжынернай і транспартнай інфраструктуры да яго — інстытут «Белдзяржпраект».
Указам прэзідэнта Міністэрства ўнутраных спраў вызваляецца ад вяртання страт сельскагаспадарчай вытворчасці, выкліканых забраннем сельскагаспадарчых земляў для выкарыстання іх з мэтай будаўніцтва комплексу, інжынернай і транспартнай інфраструктуры, неабходнай для яго забеспячэння.
Зараз Пішчалаўскі замак знаходзіцца ў аварыйным стане. Ён закансерваваны. На гэтыя працы было выдаткавана 440 млн. рублёў. У сувязі з вывядзеннем будынку з эксплуатацыі ў СІЗА № 8 у Жодзіне (Мінская вобласць) пераведзена амаль 900 чалавек. У мінскім следчым ізалятары ў цяперашні час утрымліваецца амаль 1.350 падследных і асуджаных.
У сувязі з гэтай навіной «Ежедневнік» паведамляе, што ёсць планы ператварыць Валадарку ў эксклюзіўны гатэль. У многіх гарадах Еўропы старыя турмы, непрыдатныя па сваім першасным прызначэнні, былі ператвораны ў падобныя гасцініцы.
Цяпер чытаюць
Дачка суддзі, якая жыўцом згарэла ў судзе ў Слуцку ў 1967-м, расказала, як склалася жыццё іх сям’і пасля гучнай трагедыі7
Каментары