52‑гадовы Грант Дзінк стаўся вядомым у кастрычніку 2005 году, калі ён быў прызнаны вінаватым «у зьнявазе турэцкай нацыі» і прысуджаны да шасьці месяцаў зьняволеньня ўмоўна за газэтны артыкул, прысьвечаны масавым забойствам армянаў у Асманскай Турэччыне ў 1915 годзе.
Турэцкая паліцыя заявіла, што маладзён, якога затрымалі па падазрэньні у забойстве выбітнага журналіста армянскага паходжаньня Гранта Дзінка, прызнаў сваю віну.
Падазраванага выдаў бацька, які пазнаў яго па фатаграфіях з камэраў знадворнага назіраньня. У зьвязку з справай затрыманыя яшчэ 12 чалавек.
Грант Дзінк быў рэдактарам газэты «Агос», якая выходзіць на армянскай і турэцкай мовах, і лічыўся адным з самых уплывовых лідэраў армянскай дыяспары ў Турцыі. Ён быў застрэлены ў пятніцу ля ўваходу ў рэдакцыю. Ягонае забойства скаланула грамадзкасьць Турцыі й выклікала гнеў у армянскай дыяспары і ў самой Арменіі.Прэм’ер‑міністар Турцыі Рэджэт Эрдаган некалькі разоў выступіў з асуджэньнем забойства.
Прэзыдэнт Армэніі Робэрт Качаран таксама асудзіў забойства і выразіў надзею, што арганізатары й выканаўцы злачынства будуць знойдзеныя і прыцягнутыя да адказнасьці. Сьпікер армянскага парлямэнту выказаўся больш жорстка: ён сказаў, што Турцыі няма чаго і марыць пра сяброўства ў Эўразьвязе.
Дзінк сьцьвярджаў, што канфрантацыя ў стасунках між Турцыяй і Армэніяй толькі ўскладняе праблему і не спрыяе ейнаму вырашэньню.
Ён ня раз выказваў трывогу за сваё жыцьцё. У адной з апошніх газэтных калёнак ён пісаў, што вымушаны ўвесь час азірацца ў чаканьні пагрозы, «торгаючы галавой ва ўсе бакі, як голуб».
Дзінк падкрэсьліваў, што ён грамадзянін Турцыі і хацеў бы бачыць сваю краіну больш дэмакратычнай, адкрытай і сучаснай. Ён падтрымліваў імкненьне Турцыі стацца сябрам Эўразьвязу, бо меркаваў, што прыняцьцё эўрапейскіх стандартаў дапаможа краіне ацаніць трагедыю, перажытую армянамі ў 1915 годзе.
У самой Турцыі журналісты і палітыкі гнеўна асудзілі забойства Гранта Дзінка, назвалі яго палітычным. У краіне прайшлі акцыі пратэсту
Цяпер чытаюць
Беларус раптоўна і без дай прычыны знік у 2006 годзе, а праз 19 гадоў знайшоўся ў вёсцы пад Смаленскам2
Каментары