Беларускі праваабаронца Алесь Бяляцкі, які ад 4 жніўня знаходзіцца за кратамі, можа быць намінаваны на літоўскую Прэмію свабоды, якую прызначаюць за дасягненні і ўнёсак асоб і арганізацый у справу абароны правоў чалавека, развіцця дэмакратыі, заахвочвання міждзяржаўнага супрацоўніцтва ў барацьбе за свабоду выбару і суверэнітэт народаў Усходняй і Цэнтральнай Еўропы. Гэтую інфармацыю агучыў міністр замежных спраў Літвы Аўдронюс Ажубаліс.
Такую ідэю станоўча ацаніў і міністр юстыцыі Літвы Рэмігіюс Шымашус.
Прэмія памерам 5 тыс. еўра ў год будзе вылучацца праваабаронцам Усходняй і Цэнтральнай Еўропы. Прэтэндэнтаў абярэ спецыяльная камісія, якая штогод 23 лістапада павінна будзе прадстаўляць парламенту меркаванні аб прэтэндэнце. Саму прэмію будзе прызначаць парламент да 23 снежня, узнагароду будуць уручаць 13 студзеня — у Дзень абаронцаў свабоды Літвы.
Нагадаем, што Бяляцкі быў арыштаваны пасля таго, як Літва і Польшча падалі звесткі аб яго банкаўскіх рахунках на сваёй тэрыторыі. Яму пагражае да сямі гадоў турмы.
На рахунках Бяляцкага акумуляваліся грошы для дапамогі палітвязням у Беларусі і іх сем’ям. Трымаць грошы ў беларускіх банках было нерэальна.
Цяпер чытаюць
«Усё так ці інакш будзе вырашацца на полі бою». Чым будзе займацца новая кіраўніца Місіі дэмакратычнай Беларусі ва Украіне?13
Каментары