Чарговая спроба ўгаварыць мужа скончыць галадоўку не ўдалася.
Алена Каваленка 12 сакавіка выйшла з пакоя для спатканняў «Валадаркі» ў слязах. Яна кажа, што Сяргей выглядае яшчэ слабейшым, і гэта не дзіва, бо, паводле яе падлікаў, усяго муж галадае ўжо больш за 60 дзён: «Не збіраецца кідаць галадоўку, хоць ужо выглядае проста жахліва. Вельмі балюча на яго глядзець, бо яму ўжо цяжка і рухацца, і словы вымаўляць. Нават кожны крок даецца яму з цяжкасцю. Сказаў, што важыць 51 кілаграм, учора яго ўзважвалі. Тэмпература цела 35,2 градуса, гэта вельмі нізкая тэмпэратура. Ціск 60 на 90. Нешта яны там круцяць наконт шпіталізацыі — дакладна яму так і не прапаноўвалі шпіталізацыі. Адзін лекар сказаў, што ў яго ўсё нармальна, а другі выбег за ім, як яго павезлі, што трэба шпіталізацыя. Што яшчэ сказаць?
Мне балюча бачыць, як ён памірае, і сорамна за ўсіх нас, што мы нічога не робім.Мне проста сорамна за нашу нацыю. А ягоныя патрабаванні застаюцца тыя самыя — ён патрабуе вызвалення, бо лічыць сябе невінаватым».
Паводле Алены Каваленкі, яе муж яшчэ цікавіцца навінамі ў сям’і і ў палітычным жыцці краіны. Найбольш Алену непакоіць тое, што ў мужа падае тэмпература цела — яшчэ ўчора было 35,7 градуса, цяпер — 35,2 градуса. Турэмныя лекары кажуць, што сочаць за станам галадоўшчыка, але Алена адзначае, што яму так і не робяць прамыванне страўніка, не ставяць кропельніцы. «Магчыма, чакаюць, пакуль страціць прытомнасць, тады пачнуць дзейнічаць», — мяркуе Алена Каваленка.
Намеснік старшыні КХП БНФ Юрась Беленькі паведаміў, што падаваў у рэспубліканскую пракуратуру заяву з просьбай арганізаваць тэрміновую шпіталізацыю Сяргея Каваленкі: «Яны ў курсе сітуацыі. Дзяжурны пракурор абяцаў пакласці на стол генпракурору заяву.
Наша просьба простая: каб яго паклалі ў палату пад нагляд доктара.Бо, не дай бог, здарыцца нейкі збой, то ці паспеюць зрабіць нейкія рэабілітацыйныя дзеянні ў дачыненні да Сяргея?»
Адказу ад пракуратуры Юрась Беленькі не мае. Таксама актывіст звяртаўся ў Беларускі Чырвоны крыж па тэрміновую дапамогу. «Мне адказалі, што прышлюць пісьмовы адказ», — кажа Юрась Беленькі.
* * *
Сяргей Каваленка асуджаны на 2 гады і месяц за парушэнне ўмоваў адбыцця «хатняй хіміі», якую ён атрымаў за вывешванне бел-чырвона-белага сцяга на ёлцы ў Віцебску.
Каментары