“Слаўнафту” чакае прыватызацыя
Расейскія акцыі беларуска-расейскай нафтавай кампаніі “Слаўнафта” будуць прададзеныя. Гэтую інфармацыю пацьвердзілі ва ўрадзе Расеі.
Гэта апошняя з буйных нафтавых кампаніяў Расеі, што належала дзяржаве. Расейскі ўрад меў у ёй 74,95% акцыяў на агульную суму ня менш за 1,3 млрд. даляраў. Гэтыя грошы маюць дапамагчы Крамлю выплаціць пазыкі заходнім крэдыторам у 2003 г. Налета Расея мусіць выплаціць 17,3 млрд. даляраў па замежнай запазычанасьці (10,8 млрд. — асноўная запазычанасьць, астатняе — нарослыя працэнты). Між тым, бюджэтных грошай хапае толькі на працэнты.
Праект продажу ўжо ўзгоднены паміж Міністэрствамі дзяржмаёмасьці і энэргетыкі ды Расейскім фондам фэдэральнай маёмасьці.
Асноўнымі прэтэндэнтамі на акцыі “Слаўнафты” выявіліся кампанія “Сібнафта” (Раман Абрамовіч і Алег Дзерыпаска) і “Міжпрамбанк” (Сяргей Пугачоў). Праўда, пішуць расейскія аналітыкі, грошай на пакупку ўсяго пакету акцыяў не набярэ ніводзін з прэтэндэнтаў.
Яшчэ адна расейская нафтавая кампанія, “ТНК”, ужо мае сваю долю ў “Слаўнафце”. У яе таксама ёсьць апэтыт на кантрольны пакет і няма грошай. Таму яна, верагодна, далучыцца да аднаго з названых вышэй прэтэндэнтаў або “Юкасу”.
У Беларусі застаецца меншасны пакет на 10,8 % акцый. Верагоднасьць удзелу беларускага боку ў гандлі расейскімі аналітыкамі нават не разглядаецца.
А.Ш.
Цяпер чытаюць
«Дзед будзе глядзець асабіста. Калі яму спадабаецца…» Зянковіч расказаў, як з ім запісвалі першае інтэрв'ю ў СІЗА КДБ1
Каментары