Chronika

Sasima, jak Bahryma, zdajuć u sałdaty

Aktyvista niezarehistravanaj arhanizacyi «Zubr» Mikitu Sasima zatrymali ŭviečary 7 kastryčnika za raspaŭsiud ulotak z zaklikam udzielničać u Dni salidarnaści dy advieźli ŭ specpryjomnik-raźmierkavalnik na Akreścina. 10 kastryčnika jon byŭ de-jure asudžany na troje sutak aryštu «za niecenzurnyja vyrazy ŭ hramadzkim miescy». Adnak milicyjanty — śviedki abvinavačańnia — hetaha nie paćvierdzili. Paśla vyzvaleńnia 10 kastryčnika Sasima znoŭ zatrymali, advieźli ŭ Baranavicki rajvajenkamat, dzie ŭručyli pazoŭ u vojska.

2000 dalaraŭ štrafu za nabaženstva

Administratara pratestanckaj carkvy «Novaje žyćcio» Vasila Jureviča 7 kastryčnika sud Maskoŭskaha rajonu Miensku pakaraŭ štrafam u 150 bazavych vieličyń (3 młn 825 tys.) za praviadzieńnie nabaženstva. Ahułam Jureviču ŭžo prysudzili kala 6000 dalaraŭ (u ekvivalencie) štrafu.

Cisnuć na prafsajuzy

Supracoŭniki jurydyčnaha adździełu Haradzienskaha harvykankamu 4 kastryčnika praviarali dziejnaść bazavych arhanizacyjaŭ Biełaruskaha niezaležnaha prafsajuzu na AAT «Horadnia-Azot». Dla pravierki dakumentaŭ prafsajuzu harvykankamaŭskija čynoŭniki źviarnulisia da namieśnika dyrektara pa idealahičnaj pracy.

Siabroŭ prafsajuzu REP z RUP «Kanstruktarskaje biuro dakładnaha elektronnaha mašynabudavańnia optyka-mechaničnaha abstalavańnia» 10 kastryčnika apytvali ŭ prakuratury Leninskaha rajonu Miensku pa 40 chvilin kožnaha. Administracyja pradpryjemstva ŭ červieni adklikała jurydyčny adras supołki, matyvujučy heta małoj kolkaściu čalcoŭ. Paśla skarhi ŭ haradzkuju prakuraturu rašeńnie było admieniena. Rajonnaja prakuratura pravodziła hetkim čynam jašče adnu pravierku kolkaści čalcoŭ supołki.

Staršyniu prafsajuzu REP Hienadzia Fiadyniča vyklikali 10 kastryčnika ŭ prakuraturu, dzie jon davaŭ tłumačeńni nakont infarmacyi ŭ prafsajuznym biuleteni «Ekspriess-info» №22 za 8 žniŭnia. Pavodle BAŽ, supracoŭnica prakuratury Śviatłana Hančarova sumniavałasia, što treba raspaŭsiudžvać nehatyŭnuju infarmacyju pra sacyjalna-ekanamičnuju sytuacyju ŭ krainie.

U Hancavičach

Niedziaržaŭnaj hazecie «Hancavicki čas» 6 kastryčnika rajonny vuzieł elektrasuviazi admoviŭ u raźmiaščeńni na miascovym radyjo reklamnaj abviestki pra padpisku.

Skarhu Bukasa nie zadavolili

Namieśnik prakurora Mienskaj vobłaści ŭ liście ad 29 vieraśnia nie zadavoliŭ skarhu hałoŭnaha redaktara hazety «Borisovskije novosti» Anatola Bukasa na papiaredžańnie, vyniesienaje jamu prakuroram Barysava. Prakuratura ŭpeŭnienaja, što žurnalist nia maje prava nia tolki publikavać materyjały spravy, jašče nie zavieršanaj sudom, ale j svajo mierkavańnie pra jaje.

U Biełaaziorsku

6 kastryčnika na kvateru da aktyvistki BSDP («Hramada»), deputatki Biełaaziorskaha harsavietu Natalli Akaronki źjavilisia sudovyja vykanaŭcy: Bieraściejski rajonny sud zavočna prysudziŭ jaje da štrafu ŭ miljon rub. Adnak abłasny sud admianiŭ hetaje rašeńnie, bo Akaronka nie mahła być u sudzie z pavažnaj pryčyny. Ale sudovyja vykanaŭcy ŭsio ž pryjšli apisvać majomaść.

Zatrymańni ŭ Viciebsku. Skanfiskavany «Arche»

U Viciebsku 6 kastryčnika padčas raspaŭsiudžvańnia demakratyčnaje presy zatrymany aktyvisty KCHP—BNF Alaksandar Sałaŭjan i Ŭładzimier Pleščanka, a taksama biespartyjny Barys Chamajda. U toj samy dzień u Chamajdy apisali majomaść za niaspłačanyja štrafy. 7 kastryčnika milicyjanty kanfiskavali ŭ jaho ŭsie asobniki «BDH. Diełovoj haziety», miascovaj hazety «Vybar» i časopisu «Arche» dla ekspertyzy.

Sprava Skrabca ŭ sudzie

Spravu palitviaźnia Siarhieja Skrabca 7 kastryčnika pieradali ŭ Viarchoŭny sud.

Zatrymańni za «Narodnuju volu»

U Horadni 7 kastryčnika milicyjanty zatrymali prafsajuznaha aktyvista Ivana Romana, jaki razdavaŭ rabočym Zavodu aŭtaahrehataŭ «Narodnuju volu». U adździaleńni na jaho skłali pratakoł.

Levanieŭski źviartajecca ŭ sud

Palitviazień Valer Levanieŭski 7 kastryčnika źviarnuŭsia ŭ Kanstytucyjny sud z prośbaj vypravić sytuacyju, jakaja skłałasia sa skarhami viaźniaŭ: jon śćviardžaje, što nie pracuje norma Kanstytucyi, pavodle jakoj hramadzianin Biełarusi maje prava abskardzić u sudzie luboje nakładzienaje na jaho pakarańnie.

Sud nad Labiedźkam i Šuškievičam

U Bieraści 11 kastryčnika adbyŭsia sud nad lideram AHP Anatolem Labiedźkam i lideram BSDH Stanisłavam Šuškievičam. Ich abvinavacili ŭ arhanizacyi niesankcyjavanaha schodu 9 lipienia padčas vyłučeńnia delehataŭ na Kanhres. A.Labiedźka na tym schodzie navat nia byŭ: jaho zatrymali na padjeździe da miesca praviadzieńnia.

AŠ

• 0
• 0
• 0
• 0
• 0
• 0
• 0
• 0