Aksamitny siezon: dzie možna adpačyć i kolki daviadziecca patracić

Jakija kirunki plažnaha adpačynku aktualnyja hetaj vosieńniu?

Pa słovach dyrektara turahienctva Travel House Juryja Surkova, adnoj z najbolš pryvabnych krain dla adpačynku ŭ aksamitny siezon dla biełarusaŭ zastajecca Turcyja.

— Da kanca kastryčnika — pačatku listapada ŭ Antalii vielmi kamfortnaje nadvorje, a Mižziemnaje mora jašče ciopłaje. Na kurortach Čarnamorskaha ŭźbiarežža budzie ŭžo prachałodna, ale da siaredziny kastryčnika tut možna niabłaha adpačyć, — kaža ekśpiert.

U Jehipiet i Arabskija Emiraty možna śmieła adpraŭlacca na adpačynak da kanca listapada. Taksama dla plažnaha turyzmu ŭ aksamitny siezon padychodziać Kipr i Kryt, Sicylija, paŭdniovaja častka Ispanii (Kosta-Błanka, Valensija) i jašče Haa (Indyja), dzie siezon pačynajecca ź siaredziny kastryčnika.

— Sioleta kampanija «Biełavija» arhanizavała šerah pramych rejsaŭ ź Minska ŭ Kitaj, Vjetnam i Šry-Łanku, a taksama anansavała rejsy ŭ Tajłand. Hetyja krainy taksama vydatna padychodziać dla adpačynku ŭ aksamitny siezon, — adznačyŭ Juryj Surkoŭ.

Top avijaturaŭ i košt adpačynku pa-za Šenhienskaj zonaj

Pa-raniejšamu najbolš zapatrabavanymi kirunkami padarožžaŭ z mahčymaściu adpačyć na marskich kurortach zastajucca Turcyja, Jehipiet i Arabskija Emiraty.

Tak, tur u Turcyju na dvaich ź pieralotam čartarnym rejsam i raźmiaščeńniem u trochzorkavym hateli na 6 načej biez charčavańnia abydziecca ŭ kastryčniku ad 1198 jeŭra pa kursie Nacbanka, a za adpačynak u Šarm-el-Šejchu na dvaich za tydzień daviadziecca vykłaści nie mienš za 2100 dołaraŭ z ulikam charčavańnia.

Prykładna ŭ stolki ž abydziecca tydzień znachodžańnia na kurorcie Šardža ŭ AAE ŭ dvuch-trochzorkavym hateli (śniadanki ŭklučany).

Čartarnyja rejsy na kitajski vostraŭ Chajnań, jaki abmyvajecca Paŭdniova-Kitajskim moram, turapieratary prapanujuć pa canie ad 5298 dołaraŭ (pa kursie Nacbanka) na dvaich. U hetu sumu ŭvachodziać košt čartara i 8 načej u čatyrochzorkavym hateli sa śniadankami.

Prykładna na tysiaču dołaraŭ tańniej abydziecca tur na dvaich u Vjetnam (vostraŭ Fukuok) z vyletam ź Minska i pražyvańniem u trochzorkavym hateli (10 načej, śniadanki ŭklučany).

Tym, chto choča adpačyć na Šry-Łancy, dastupnyja tury z vyletam ź Minska pa canie ad 2637 dołaraŭ na dvaich. U košt uvachodziać čartar i pražyvańnie ŭ dvuchzorkavym hateli na kurorcie Chikaduva (7 načej, biez charčavańnia).

Adpačynak u Tajłandzie pakul dastupny z vyletam z Maskvy — takoje padarožža na dvaich abydziecca minimum u 1560 jeŭra pa kursie z pražyvańniem u trochzorkavym hateli na vostravie Pchukiet (9 načej, śniadanki ŭklučany).

Top avijaturaŭ u krainy Šenhienskaj zony

Dastatkova papularnym u biełarusaŭ źjaŭlajecca adpačynak na Kipry, jaki abydziecca tańniej, čym u mnohich inšych krainach. Adnak jość niuans: trapić bieź vizy možna tolki na tureckuju častku vostrava. Dla adpačynku ŭ Respublicy Kipr spatrebiacca nacyjanalnaja abo šenhienskaja viza.

Biełaruskija turapieratary prapanujuć adpačynak (z vyletam ź Minska) u takich haradach, jak Aja-Napa, Protaras, Pafas, Łarnaka pa canie ad 1860 dołaraŭ (pa kursie Nacbanka) na dvaich ź pieralotam i pražyvańniem u dvuchzorkavym hateli (5 načej, biez charčavańnia).

Pry najaŭnaści šenhienskaj vizy ŭ kastryčniku možna adpačyć na kurortach Ispanii — košt tura z vyletam ź Vilni abydziecca ad 4136 biełaruskich rubloŭ na dvaich (7 načej u čatyrochzorkavym hateli sa śniadankami i viačerami).

Taksama ŭładalnikam šenhienu dastupny plažny adpačynak na vostravie Sicylija. Taki tur z vyletam ź Vilni abydziecca minimum u 5800 rubloŭ na dvaich (8 načej, śniadanki ŭklučany).

Aŭtobusnyja tury: kudy možna adpravicca?

Varyjantaŭ dla tych, chto addaje pieravahu padarožničać aŭtobusam, značna bolš. Adnak varta ŭličvać, što z ulikam zatoraŭ na miežach i vialikich adlehłaściej takaja pajezdka moža akazacca davoli ciažkaj.

Bieź vizy ŭ kastryčniku možna źjeździć u Hruziju (kurorty Batumi, Kabuleci). Praŭda, nie varta raźličvać na ciopłaje mora i sonca, bo tempieratura pavietra ŭ hety čas redka padymajecca vyšej za plus 20 hradusaŭ. Pajezdka na 9 dzion na mory (biez uliku darohi) abydziecca ŭ siarednim kala 400 dołaraŭ pa kursie na čałavieka. U hetu sumu zvyčajna ŭklučajucca ekskursii i śniadanki.

Taksama bieź vizy dastupny ekskursijny tur u Abchaziju (vyjezd ź Minska) z adpačynkam na mory ŭ Suchumi. Takaja pajezdka abydziecca ŭ 1048 biełaruskich rubloŭ na čałavieka (10 načej).

Pry najaŭnaści šenhienskaj vizy ŭ kastryčniku možna adpravicca ŭ niezvyčajny aŭtobusny tur u Partuhaliju z adpačynkam na akijanskim uźbiarežžy i ekskursijami pa maršrucie ruchu (Polšča, Hiermanija, Ispanija, Šviejcaryja). Košt 14‑dzionnaha padarožža składaje ad 2646 rubloŭ na čałavieka.

Taksama dastupnyja aŭtobusnyja ekskursijnyja tury ŭ Italiju z adpačynkam na mory (Sarenta, Rymini). Košt — ad 1838 biełaruskich rubloŭ na čałavieka za 12 načej.

• 0
• 1
• 0
• 0
• 0
• 1
• 0
• 0