Kolki sioleta tracili na viasielli ŭ Biełarusi? Sabrali realnyja ličby tych, chto pabyvaŭ u ZAHSie
Što ž dla biełarusaŭ bazavy minimum, a što — šykoŭny maksimum?
Najbolš ścipłym kaštarysam padzialiłasia ŭ tyktoku dziaŭčyna, padpisanaja jak Dianissia. Joj z mužam viasielle abyšłosia ŭ 3774 rubli. Za standartnuju cyrymoniju ŭ ZAHSie jany zapłacili 126 rubloŭ (furšet tam paciahnuŭ jašče ŭ 120 rubloŭ), za zaručalnyja piarścionki — 1750 rubloŭ. Vobrazy žanicha i niaviesty kaštavali 332 i 516 rubloŭ. Fatohraf uziaŭ usiaho 250 rubloŭ. Za restaran dla maładažonaŭ i ich baćkoŭ addali 680 rubloŭ.
Tyktokierka Nastaśsia z Bresta pabrałasia šlubam kala tydnia tamu. Usich padradčykaŭ jana braniravała jašče hod tamu — adrazu, jak jaje małady čałaviek zrabiŭ prapanovu ruki i serca. Kaža, što dziakujučy hetamu atrymałasia sekanomić, bo kožny siezon usie padymajuć ceny.
— My adrazu pastavili dla siabie ramki, za jakija my ni ŭ jakim razie nie budziem vychodzić. Na toj momant našaj stollu była suma $7000. Ale my navat nie chacieli nabližacca da hetaj sumy, chacieli zrabić usio tańniej.
Ale Nastaśsia pryznajecca, kali jany padličyli ŭsie svaje vydatki na viasielle, dyk pabačyli, što pieravysili svoj limit — atrymałasia $7500. Kaža, što ni ab čym nie škaduje i što trymałasia sapraŭdy viasielle mary. Haściej było 57.
U kamientaryi pryjšła jašče adna vieraśnioŭskaja niaviesta z Bresta: «U nas było viasielle dva tydni tamu. Addali $14 tysiač, było 55 čałaviek. Dumali ŭkłaścisia ŭ $8 tysiač, ale nie atrymałasia».
Taćciana ź Minska patraciła taksama kala $7500 (było 25 čałaviek). Vobraz niaviesty kaštavaŭ $860 (z ulikam arendnaj sukienki za $650), a žanicha — kala 330.
Arenda siadziby abyšłasia ŭ $1100, dekor — u $670, kiejterynh — $1600. Viadučy atrymaŭ $750, fatohraf — $450, ryłsmejkier — $62. Viasielny tort paciahnuŭ $130.
Jašče adna dziaŭčyna ź Minska pabrałasia šlubam u žniŭni. Jana raić tym, chto tolki płanuje viasielle, aryjentavacca chacia b na $5000.
Sama niaviesta ličyć svajo viasielle biudžetnym — na śviata dla 30 čałaviek vydatkavali $4800.
— Vobraz žanicha źbirali na «Vajłdberyz» i ŭ «Sportmajstaru». Razam vyjšła 759 rubloŭ. Vobraz niaviesty — sukienka, tufli, źmiennyja basanožki (kab nohi na abcasach nie stamilisia), sumačka — 1265 rubloŭ.
Bukiet kaštavaŭ 150 rubloŭ, butańjerku da jaho dali ŭ padarunak.
Para apłačvała pastanoŭku viasielnaha tancu — addali 410 rubloŭ.
Piarścionki, adzin ź jakich rabili na zamovu, kaštavali kala 2890 rubloŭ. Fatohraf uziaŭ $140:
— Jakaść fota admietnyja, fatohraf prosta supier. Ja liču, jon vielmi tanna ŭziaŭ za svaju pracu.
Hanarar viadučaha i dydžeja skłaŭ $300.
Za arendu bankietnaj zali ŭ Ždanovičach para nie płaciła, bo ŭ restarana nie było takoj pasłuhi. U vyniku žanich i niaviesta prosta zrabili pa mieniu zamovu ježy na nieabchodnuju sumu. Jakaściu ježy i absłuhoŭvańnia dziaŭčyna taksama całkam zadavolenaja.
Tort rabiła siastra niaviesty — maładziony dali joj 150 rubloŭ za pracu, a nieabchodnyja pradukty apłaciła chrosnaja niaviesty.
— Tak tort by vyjšaŭ nam niedzie 850 rubloŭ.
Zahadzia nabyvali atrybuty dla konkursaŭ i nievialikija padarunki haściam — heta paciahnuła 477 rubloŭ.
Kab adpačyć paśla viasiella, muž žonka braniravali dla siabie na try dni domik za Minskam. Atrymałasia 1084 rubli za arendu.
Alina taksama śviatkavała viasielle ŭ Minsku — śviata abyšłosia ŭ $11 tysiač.
Pražyvańnie i zbory ŭ hateli kaštavali $250. Vobraz niaviesty — $750, žanicha — $370. Za piarścionki addali $1300. Arenda placoŭki, furšet i bankiet paciahnuli $4800, dekor — $450.
Padradčyki za svaje pasłuhi ŭziali ahułam $2240. Modny tort ź jahadami abyšoŭsia ŭ $300.
Svaim dośviedam padzialiłasia arhanizatarka viasiellaŭ u Minsku Jaŭhienija Doŭhaja. Jana raspaviała, što ŭ siarednim jaje zakazčyki sioleta tracili na viasielle kala $12 tysiač (heta suma pry ŭmovie, što haściej 50 čałaviek).
Napačatku siezona žančyna ahučvała i maksimalny kaštarys — $25 tysiač. Siudy ŭvachodzili ažno niekalki fatohrafaŭ, ryłsmejkier, videamantažor i navat dva videaapieratary z kvadrakoptarami, jakija majuć dazvoł na paloty.
Taksama ŭ hety košt uvachodzili dva viadučyja, adzin ź jakich niejki topavy z Maskvy (taki biare ažno $4000). Na mieniu zakładvałasia $5000 i $7000 na dekor. Nu a tančyli b hości pad kavierbend.
Ale Jaŭhienija ŭdakładniła, što pry žadańni, kaniečnie, možna zrabić i bolš doraha.
Imavierna, sapraŭdy byli i bolš darahija viasielli. Tak u akaŭncie viasielnaj placoŭcy Royal_hall źjaviłasia videa z bankietu, dzie žanich zrabiŭ siurpryz niavieście, i ŭ niejki momant zamiest kavierbenda na scenie źjaviŭsia papularny rasijski hurt The Hatters.
«Za hetyja hrošy možna kupić mašynu». Viasielle za $20 tysiač vyklikała buru abmierkavańniaŭ i asudžeńniaŭ
«$10 tysiač — samy minimum». Niaviesta ŭ razhublenaści ad cen na «ścipłaje» viasielle i nie viedaje, ci vartaje jano taho
Kolki sioleta kaštuje zrabić viasielle ŭ Minsku? Realnyja ličby ad tych, chto niadaŭna schadziŭ u ZAHS
Cichanoŭskaja pra muža: Uvieś jahony śviet pierakuleny22
Kamientary
Da ty nie bojsia, ja vsio opłaču...