Kreml investuje nieabmiežavanyja resursy ŭ raskoł biełaruskaj apazycyi. Pieršym spakusiŭsia Frałoŭ. Piacizorkavy hatel «Załatoje kolca» ŭ minułuju subotu prymaŭ haściej z usioj SND. Na II Eŭrazijski forum źjechałasia 150 palitykaŭ, palitolahaŭ i aktyvistaŭ niaŭradavych arhanizacyj ź Biełarusi, Ukrainy, Małdovy, Hruzii, inšych krain Sadružnaści. Pryjom byŭ vyklučny: kali sup, dyk ź ikroju, kali kańjak, dyk rakoju. Siarod udzielnikaŭ forumu było niašmat viadomych palitykaŭ. Armieniju pradstaŭlaŭ vice-śpikier parlamentu, Ukrainu — žmienia kučmistaŭ i kiraŭnik frakcyi Julii Cimašenki ŭ Viarchoŭnaj Radzie. Ale typovym udzielnikam forumu byŭ taki sabie kandydat u mery horadu Čadyr-Łunha ad bloku «Adzinaja Hahaŭzija».
Arhanizataram forumu byŭ Fond efektyŭnaj palityki (FEP), jaki ŭznačalvaje Hleb Paŭłoŭski — palittechnalahičnaja kantora z ahidnaj reputacyjaj. Forum nia byŭ pryvatnaj inicyjatyvaj manipulistyčnaha think-tanku. Navat hatel, dzie haściavaŭ forum, naležyć Administracyi prezydenta Rasiei. U pracy forumu ŭziała ŭdzieł pamočnica Pucina Džachan Pałyjeva.
Treba adznačyć, što NGO kštałtu FEP ciesna zraślisia ź dziaržaŭnymi strukturami Rasiei. Časam ciažka zruzumieć, dzie asnoŭnaje miesca pracy typaŭ kštałtu Madesta Kolerava — u Administracyi prezydenta ci ŭsio jašče ŭ tym ci inšym «fondzie», dzie jon pačynaŭ svaju karjeru.
Vybar biełaruskich udzielnikaŭ byŭ vielmi krasamoŭny: Hajdukievič i Frałoŭ. Techničny kandydat Łukašenki ŭ 2001 h. i źniščalnik «Narodnaj voli» z adnaho boku. I hienerał, jaki na vybarach u pałatu pradstaŭnikoŭ u Horadni zaniaŭ treciaje miesca z troch mahčymych.
U zaprašeńniach forum reklamavaŭsia jak «sustreča palitykaŭ, jakija pradstaŭlajuć demakratyčnyja siły». Tema forumu była akreślena całkam cyvilizavana jak «Demakratyja i multykulturalizm u Eŭrazii». Mianie naściarožvała, praŭda, što zaprašeńni biełaruskim udzielnikam pryjšli ŭ roznych varyjantach. Adnym «u Eŭrazii», druhim — «na Eŭraŭschodzie». «Što za błytanina?», — spytaŭsia ja za kielicham kańjaku Kiryłu Tanajeva, kiraŭnika prahramaŭ FEPu. «Nia ŭsie adnolkava staviacca da hetych terminaŭ», — adkazaŭ jon.
Maskoŭskaje razumieńnie demakratyi krasamoŭna adbiłasia ŭ rezalucyi forumu. Jana asudžaje «parušeńni demakratyi i pravoŭ čałavieka va Ŭkrainie i Hruzii». Ni słova pra Biełaruś.
Anansavanyja dakłady nikoha z haspadaroŭ nie cikavili. Frałova, jaki nia ŭpisvaŭsia ŭ adviedzienyja piać chvilinaŭ, naturalna pahnali z trybuny. Ale jon paśpieŭ uchvalić pabudovu hazapravodu praz Bałtyjskaje mora ŭ abchod našaj krainy jak šlach da demakratyzacyi Biełarusi. za ŭsim hetym uvažliva sačyli pradstaŭniki pasolstva Biełarusi ŭ Rasiei.
Jak u hetym łohavie akazaŭsia pasłaniec «Našaj Nivy»? Nievypadkova. Maskva źbiraje infarmacyju, vyłučaje samyja roznyja koły. Šukaje kantaktaŭ, stvaraje klijenckaje koła. Robić heta dosyć hruba, toporno.
«My vielmi chacieli b bližej paznajomicca z nacyjanalna nastrojenymi intelektuałami Biełarusi. Davajcie źbiaremsia tut u Maskvie pad kaniec miesiaca, — prapanavaŭ pamočnik staršyni dumskaha kamitetu pa spravach SND. — U hetym niama sensu, pakul vy nie ŭsprymajecie biełaruskich demakratyčnych palitykaŭ, — vietliva admoviŭsia ja. — Heta ž niesurjoznyja ludzi, — kiŭnuŭ jon u bok hienerała Frałova, jaki padymaŭ čarku ŭ kampanii svajho junaha maskoŭskaha palittechnolaha. — A vas my tak cenim. — Nie, heta niemahčyma, pakul niama raŭnapraŭnaha dyjalohu, — rašuča namiaknuŭ ja. — Kali Vy nia chočacie ŭ Maskvie, davajcie sustreniemsia ŭ Prazie», — zazirnuŭ mnie ŭ vočy adkazny rabotnik. Maŭlaŭ, my za canoj nie pastaim.
Skiravanaja na SND dziejnaść FEPu i analahičnych kantoraŭ intensyfikujecca. Pieršy eŭrazijski forum prajšoŭ 30 červienia — 1 lipienia. Treci zaplanavany na śniežań. FEP farmuje stałyja analityčnyja struktury. Asobnyja biełaruskija palitolahi ŭžo pracujuć na jaho. Delehacyi ź Miensku ciahnucca ŭ Fond Paŭłoŭskaha amal štotydzień. Palityki, ekanamisty, palitolahi. Ambitnym intelektuałam Fond vydaje knihi.
Rasieja i raniej razhladała SND svajoj niepadzielnaj zonaj upłyvu. Ale kali raniej jana kantaktavała tolki z uładaj, jakoj by taja ni była, ciapier jana vybudoŭvaje suviazi z hramadzianskaj supolnaściu, jak jana jaje razumieje. Ukrainskaja revalucyja advučyła Kreml kłaści ŭsie svaje niešmatlikija jajki ŭ adzin koš. Novaja taktyka bolš hnutkaja, jana sulić bolš poŭny kantrol. U biełaruskim vypadku heta taksama vyhladaje jak padrychtoŭka da zamieny Łukašenki na «bolš sučasna dumajučaha palityka».
Na što robicca staŭka? Zaŭvažnyja dźvie perspektyvy. Kreml pracuje na raskoł biełaruskaj apazycyi i na stvareńnie ŭ Biełarusi prarasiejskaje siły. Pieršaje da druhoha viadzie.
Pieršaje robicca padsyčeńniem ambicyj asobnych palitykaŭ. Dla druhoha stvarajecca klijenckaja sietka, pryčym asablivaja ŭvaha nadajecca tym marhinalnym palitykam i intelektuałam, jakija byli b absalutna zaležnyja ad maskoŭskaha resursu.
I voś užo ŭsiajadnaja «Narodnaja Vola» drukuje artykuł taho samaha Frałova, kalehi Hajdukieviča pa maskoŭskich pajezdkach, u jakim naviazvajecca vobraz Milinkieviča jak rusafoba.
Novaja palityka Maskvy — vyklik biełaruskamu niezaležnamu hramadztvu i pravierka jaho na hramadzianskuju śpiełaść.
Ciapier čytajuć
«U kapciuroch HPU». Stahodździe niebiaśpiečnaj naiŭnaści i daremnych maraŭ biełaruskaj emihracyi3
Kamientary