Nasielnictva Minska nie raście, ale pahladzicie, jak prybaviłasia kolkaść žycharoŭ u Novaj Baravoj i inšym pryharadzie

Nasielnictva Minska skaraciłasia, a što z rajonam?

Pik žycharoŭ Minska, pavodle Biełstata, zafiksavali 1 studzienia 2020 hoda. Tady ŭ stalicy naličvałasia 2 020 600 haradžan. Pa stanie na 1 studzienia 2025 hoda ŭ Minsku žyło 1 996 730 čałaviek. Takim čynam, za apošnija piać hadoŭ nasielnictva stalicy skaraciłasia na 23 900 čałaviek.

Na heta mahli paŭpłyvać jak pandemija, tak i dźvie chvali emihracyi. Ale, kab karcina vyhladała bolš poŭnaj, varta źviarnuć uvahu na toje, jak za hety ž pieryjad źmianiłasia nasielnictva Minskaha rajona.

Užo bolš za dziesiać hadoŭ vakoł horada budujuć bujnyja mikrarajony, u tym liku sa ščylnaj šmatpaviarchovaj zabudovaj, jakija adnosiacca da rajona.

Za apošnija 15 hadoŭ nasielnictva rajona vyrasła amal na 120 tysiač čałaviek: z 161 tysiačy u 2010‑m da 280 tysiač u 2025-m.

Dla paraŭnańnia, za papiarednija 14 hadoŭ (z 1996 pa 2010) rost skłaŭ usiaho 18 tysiač čałaviek: z 143 tysiač u 1996‑m da 161 tysiačy ŭ 2010-m.

Kali brać pieryjad apošnich piać hadoŭ, to nasielnictva rajona za hety čas pavialičyłasia na 28 tysiač čałaviek. Takim čynam, kali ŭličyć źmianšeńnie nasielnictva ŭ samim Minsku i pryrost u rajonie, to atrymajecca, što de-fakta nasielnictva staličnaj ahłamieracyi choć i nie mocnymi tempami, ale ŭsio ž raście (plus 4200 čałaviek).

Asnoŭny rost idzie za MKADam

Kolkaść žycharoŭ u Minskim rajonie pierš za ŭsio pavialičvajecca za košt nasielenych punktaŭ, jakija znachodziacca ŭ niepasrednaj blizkaści da miežaŭ stalicy.

Tak, naprykład, nasielnictva vioski Kopišča (rajon Novaja Baravaja) dasiahnuła 22 tysiačy čałaviek. Mikrarajon praciahvajuć aktyŭna zabudoŭvać, pa prybliznych padlikach, da 2030 hoda ŭ Kopiščy budzie žyć bolš za 40 tysiač čałaviek.

Pavialičyć

U toj ža čas nasielnictva Zasłaŭja, jaki źjaŭlajecca horadam-spadarožnikam Minska, ale nie prymykaje niepasredna da jaho, za apošnija piać hadoŭ, naadvarot, krychu skaraciłasia. Kali ŭ 2020‑m tam žyli 17 674 čałavieki, to ciapier — 17 317.

Inšaja «vioska» ź dziasiatkami tysiač žycharoŭ — Baraŭlany. U 2022 hodzie navat chadzili razmovy pra toje, kab abjadnać viosku z ahraharadkom Lasny, pasiołkam Vopytny i vioskaj Laskoŭka ŭ adzin horad. Pa stanie na 2022 hod u hetych nasielenych punktach žyli bolš za 42 tysiačy čałaviek, i nasielnictva praciahvaje raści. Tym nie mienš rabić z hetych nasielenych punktaŭ adziny horad paličyli niemetazhodnym.

Znoŭ pra nasielenyja punkty, jakija bližej za ŭsio znachodziacca da miažy Minska, aktyŭna zahavaryli ŭ 2025 hodzie.

Dniami stała viadoma, ci buduć uklučany ŭ skład stalicy Kopišča, Vialikaje Ścikleva, Hatava, Baraŭlany i Sienica. Na architekturna-horadabudaŭničaj radzie padkreślili: rašeńni ab pašyreńni miežaŭ prymajucca tolki pa ŭzhadnieńni z Łukašenkam i pry najaŭnaści ekanamičnaha abhruntavańnia dla abjadnańnia. U vyniku ŭłady vyrašyli nie ŭklučać ich u miežy Minska.

Łukašenka — zaciaty praciŭnik rostu nasielnictva stalicy

Za svaju karjeru Łukašenka nieadnarazova vykazvaŭsia pra toje, što treba strymlivać rost nasielnictva Minska.

Tak, naprykład, u 2011‑m jon staviŭ płanku 1,8 miljona žycharoŭ:

«Treba aryjentavacca na toje, što ŭ Minsku nie pavinna pražyvać bolš za 1,8 miljona čałaviek. Miljon vosiemsot tysiač čałaviek — i nie bolš. Bo siońnia ŭžo ni prajechać ni prajści pa Minsku, zaŭtra — zahazavanaść, taŭchanina, z usioj respubliki źbiarom u Minsku ludziej, i my pieranasielim horad».

Pavialičyć

Paźniej jon usio ž padniaŭ płanku da 2 miljonaŭ, dadaŭšy, što nielha jaje pierasiahnuć. Paźniej palityk jašče nieadnarazova vykazvaŭsia na hetuju temu.

Farmalna nasielnictva Minska paśla nievialikaha skaračeńnia na praciahu apošnich piaci hadoŭ nie pieraadolvaje vyznačanuju Łukašenkam płanku ŭ 2 miljony žycharoŭ.

Ale z ulikam taho, jak šmat žylla było pabudavana ŭ nasielenych punktach, jakija niepasredna prylahajuć da horada, u Minskaj ahłamieracyi žyvie bolš za 2,1 miljona čałaviek.

Razam z tym adznačym, što dziaržaŭnaja statystyka moža nie ŭličvać poŭnaj karciny emihracyi paśla pratestaŭ i poŭnamaštabnaj vajny va Ukrainie.

A što z nasielnictvam u inšych bujnych haradach i prylehłych rajonach

Siarod abłasnych centraŭ u troch ź piaci nazirajecca spad nasielnictva.

U Homieli pa stanie na pačatak 2020 hoda žyli 510 tysiačy čałaviek i jašče 70 tysiač u Homielskim rajonie. Praź piać hadoŭ situacyja vyhladaje tak: Homiel — 501 tysiača, Homielski rajon — 69 tysiač.

Ahułam u Homieli i rajonie stała na 10 700 žycharoŭ mienš.

U Mahilovie pa stanie na pačatak 2020 hoda było 357 tysiač žycharoŭ i jašče 42 tysiačy ŭ Mahiloŭskim rajonie. Praź piać hadoŭ nasielnictva Mahilova skaraciłasia da 353 tysiačy, a rajona — da 39 tysiač.

Ahułam u Mahilovie i rajonie za piać hadoŭ stała na 7100 žycharoŭ mienš.

Viciebsk pa stanie na pačatak 2020 hoda naličvaŭ 365 tysiač žycharoŭ, i jašče 36 tysiač žyli ŭ Viciebskim rajonie. Praź piać hadoŭ nasielnictva Viciebska skaraciłasia da 359 tysiač čałaviek, a rajona — da 34 tysiač (minus 2 tysiačy).

Ahułam u Viciebsku i rajonie za piać hadoŭ stała na 7900 žycharoŭ mienš.

Pavialičyć

U dvuch abłasnych centrach na zachadzie krainy nasielnictva, naadvarot, raście

U Hrodnie pa stanie na pačatak 2020 hoda žyli 357 tysiač čałaviek, i jašče 50 tysiač naličvałasia ŭ Hrodzienskim rajonie.

Praź piać hadoŭ nasielnictva Hrodna vyrasła da 364 tysiačy, a voś u Hrodzienskim rajonie skaraciłasia da 48 tysiač.

Ahulnaje nasielnictva pavialičyłasia na 4900 čałaviek.

U Breście pa stanie na pačatak 2020 hoda žyli 340 tysiač čałaviek, i jašče, akruhlajučy, 46 tysiač u Bresckim rajonie.

Praź piać hadoŭ Brest naličvaje ŭžo 346 tysiač čałaviek, a Brescki rajon — tyja samyja 46 tysiačy, ale z drobnym pryrostam.

Ahułam nasielnictva Bresta i rajona za piać hadoŭ vyrasła na 6500 čałaviek.

Pavialičyć

Atrymlivajecca, što najbolšy pryrost siarod bujnych haradoŭ i ich rajonaŭ za apošnija piać hadoŭ adbyŭsia ŭ Breście i Hrodnie, a nie ŭ Minsku i Minskim rajonie. Kali pieraličyć rost nasielnictva ŭ pracentnych suadnosinach, to ŭ Breście i Hrodnie kolkaść žycharoŭ za apošniuju piacihodku vyrasła nieparaŭnalna bolš, čym u staličnym rehijonie.

• 3
• 0
• 0
• 1
• 0
• 0
• 1
• 0