Svoj lod hreje

Mienskaje «Junactva» na svajoj placoŭcy vyjhrała try matčy zapar i vyjšła ŭ paŭfinał Kantynentalnaha chakiejnaha kubku.

Pierad pačatkam čverćfinalnaha turniru, što prajšoŭ u Miensku 14—16 kastryčnika, trener «Junactva» Michaił Zacharaŭ u interviju «Priessbołu» zajaviŭ: kali kamanda nie prabjecca ŭ nastupny raŭnd, ničoha kiepskaha nie adbudziecca. Maŭlaŭ, my addajom pryjarytet nacyjanalnamu pieršynstvu. Takoje staŭleńnie da eŭraturniru tłumačycca prosta. U mižsezońnie dvuchrazovaha čempijona krainy pakinuŭ dziasiatak hulcoŭ. Dyj Kantynentalny kubak nie karystajecca vialikaj pašanaj u chakiejnych superdziaržavaŭ. Čechija, Finlandyja, Švecyja, Słavakija jaho ihnarujuć. Aściarožnyja vykazvańni sp.Zacharava byli taksama vyklikanyja tym, što ŭ supierniki «Junactvu» pa čverćfinalnaj hrupie trapilisia davoli mocnyja supierniki — «Kazcynk-Tarpeda» (Kazachstan) dy apanent pa Adkrytym čempijanacie Biełarusi kijeŭski «Sokał». Kamandy, vartyja jak minimum hulni ŭ paŭfinale. Ale losavańnie, zasnavanaje na hieahrafičnym pryncypie, źviało ŭsich u adnu hrupu.

U piatnicu mienčuki lohka raspravilisia ci nie z hałoŭnym svaim apanentam — kazaskim «Kazcynkam-Tarpeda»: 4:0. Zrešty, kazaskim klub źjaŭlajecca pa miescy prapiski — Uść-Kamienahorsk. Za kamandu hulajuć tolki dva pradstaŭniki karennaje nacyi, astatnija ŭsie majuć słavianskija proźviščy. Mo tamu «Kazcynk» i zapisaŭsia ŭ vyšejšuju lihu (dyvizijon «Uschod») rasiejskaha čempijanatu. Kali ž surjozna, u kazastanskich stepach hodnych supiernikaŭ dla hulni ŭ chakiej niama.

U subotu 15 kastryčnika «Junactva» hulała z «Chakaj», što pradstaŭlaje aŭtanomnuju vobłaść Arahon — paŭnočny ŭschod Hišpanii. Pakul słova «Chaka» bolš viadomaje nie jak nazva chakiejnaja kamandy, a jak nazva horadu sa słaŭnym histaryčnym minułym. U 860 h., na dośvitku Rekankisty, u jaho vakolicach hraf Asnar nanios parazu maŭram, potym za maŭraŭ uziaŭsia znakamity Syd. U siaredzinie CHI st. horad staŭ pieršaj stalicaj Arahonskaha karaleŭstva — adnoj z apor baraćby suprać arabaŭ. U 1479 h. dziakujučy dynastyčnamu sajuzu pamiž Isabel Kastylskaj i Fernanda Arahonskim paŭstała siońniašniaja Hišpanija. A Chaka, jak Navahradak, pieratvaryłasia ŭ cichi pravincyjny haradok z nasielnictvam u 12 tysiač čałaviek.

Na Pirenejach chakiej — reč amatarskaja, i ŭ čempijanacie krainy niama i dziasiatka kamandaŭ. Usie hulcy čempijona Hišpanii «Chaki» niedzie jašče pracujuć i na treniroŭki prychodziać paśla pracy. Navat zamiežniki — Siarhiej Harkuša, Daniił Dzidkoŭski, Nienad Milinkavič — nijakija nie lehijanery, a hastarbajtery, što ŭ volny ad pracy na hišpanskich pradpryjemstvach čas vyrašyli pahulać u chakiej. Taki pryncyp kamplektavańnia kamandy nakładaje adbitak na jaje zamiežnyja kamandziroŭki. Ukrainski trener «Chaki» Alaksandar Kulikoŭ ledź naźbiraŭ hulcoŭ na try piaciorki. Nia zdoleŭ pryjechać u Miensk hišpanski palicyjant Chuan Irueła, jaki ŭ volny ad pravaachoŭnaje dziejnaści čas hulaje za «Chaku». U časy terarystyčnaje pahrozy praca palicejskaha ŭ Hišpanii nadta zapatrabavanaja.

Supraciŭlalisia arahoncy pieršyja dvanaccać chvilin hulni. Paśla na praciahu adnoj chviliny biełarusy dvojčy (Arciom Vołkaŭ i Viktar Kaściučonak) prymusili Chase Alonsa vyciahvać šajbu z varotaŭ. Na 18-j chvilinie «Junactva» zabiła treciuju šajbu, u druhim peryjadzie — jašče try. Davodzić lik da dvuchznačnaha vychavancy M.Zacharava nia stali, spyniŭšysia na 8:0.

U siaredzinie druhoha peryjadu hałkiper hišpanskaha klubu atrymaŭ mocny ŭdar šajbaj u masku. Pastajaŭ niekalki dziasiatkaŭ sekundaŭ. Da jaho pa čarzie padjaždžali tavaryšy pa kamandzie, arbitry, lapali pa plačy: nu jak ty, bratok, žyvy? Žyvy. Chase Alonsa znajšoŭ siły praciahnuć hulniu.

«Junactva», jakoje hulała ŭ subotu ŭ sympatyčnych sinie-čyrvonych švedrach ź miłymi biełaruskamu voku bieł-čyrvona-biełymi ŭstaŭkami, praviało sapraŭdnuju majstar-klasu amataram z Arahonu. Ale što ŭziać z amatarskaha klubu?

Zakinuć adzinuju šajbu bramniku «Junactva» Ściapanu Haračeŭskich arahoncy zdoleli tolki ŭ seryi paślamatčavych bulitaŭ. Pavodle rehlamentu, bulity prabivajucca, niahledziačy na vynik matču. Robicca heta dziela vidoviščnaści.

U subotu «Kazcynk» pieramoh «Sokał», i matč «Junactva» z ukrainskaj kamandaj pieratvaraŭsia ŭ farmalnaść. Ale mienčuki, na radaść hledačam, vyjhrali j tut — 2:1.

Paŭfinalny raŭnd Kantynentalnaha kubku projdzie ŭ Słavienii z 18 pa 20 listapada. Supiernikami «Junactva» buduć miascovy «Akroni», «Ryha-2000» dy francuski «Hrenobl». Finał kubku projdzie ŭ vuhorskim Siokiešfechervary (13—16 studzienia). Viadomyja ŭžo try kamandy-finalistki — vuhorski «Ałba Vołan», švajcarski «Ciurych» i taljacinskaja «Łada». Praŭda, apošniaja maje ciapier vialikija prablemy ź finansami. Nijakija štučnyja abarony i nadumanyja pošliny rasiejskaha aŭtamabilnaha rynku nie dali stanoŭčaha vyniku, i «Aŭtavaz» — sponsar «Łady» — skaračaje sponsarskija vydatki, u tym liku j asyhnavańni na sport. Tak što klub, za jaki vystupaje biełarus Aleh Biełkin, staić pierad pahrozaj raspadu. I nia fakt, što voźmie ŭdzieł u vuhorskim finale.

Nastupny ž vialiki chakiej u Miensku čakajecca ŭ śniežni, kali Biełaruś prymie ŭdzielnikaŭ junackaha čempijanatu pa chakiei ŭ dyvizijonie «V», a ajčynnaja zbornaja pasprabuje viarnucca ŭ elitu najmacniejšych.

• 0
• 0
• 0
• 0
• 0
• 0
• 0
• 0