AAN pryznała aryšt Alesia Bialackaha «advolnym»

Pracoŭnaja hrupa AAN pa zatrymańniach (WGAD) zaklučyła, što aryšt kiraŭnika pravaabarončaha centra «Viasna» i vice-prezidenta Mižnarodnaj Fiederacyi za pravy čałavieka Alesia Bialackaha byŭ advolnym.

Zaklučeńnie pravaabaroncy «supiarečyć artykułu 20, parahraf 1, Usieahulnaj dekłaracyi pravoŭ čałavieka i artykułu 22 Mižnarodnaha pakta ab hramadzianskich i palityčnych pravach».

Rašeńnie Rabočaj hrupy AAN pryniata pa vynikach paviedamleńnia, adpraŭlenaha Absiervatoryjaj pa abaronie pravoŭ pravaabaroncaŭ WGAD 2 krasavika 2012 hoda i asprečvaje zakonnaść zaklučeńnia Bialackaha. Absiervatoryja pa abaronie pravoŭ pravaabaroncaŭ - sumiesnaja prahrama Mižnarodnaj Fiederacyi za pravy čałavieka (FIDH) i Suśvietnaj Arhanizacyi suprać katavańniaŭ (OMCT).

U svaim rašeńni Rabočaja hrupa AAN pa samavolnych zatrymańniach padkreśliła, što «jak pakazvaje krynica paviedamleńnia,

centralnaj u hetaj spravie źjaŭlajecca zajava sp-ra Bialackaha ab tym, što srodki, atrymanyja na zamiežny bankaŭski rachunak, byli častkaj sistemy finansavańnia niaŭradavaj arhanizacyi «Viasna», jakoj urad admoviŭ u rehistracyi i jakuju jon sprabavaŭ raspuścić».

Dalej Rabočaja hrupa AAN pa samavolnych zatrymańniach padkreśliła, što «kryminalnaje zakanadaŭstva Biełarusi, prymianienaje ŭ spravie h-na Bialackaha, nie ŭklučaje pravaabarončuju dziejnaść u śpis zaniatkaŭ, jakija padlahajuć vyzvaleńniu ad padatkaŭ», u toj čas jak dziaržavy-ŭdzielnicy Pakta majuć «nie tolki niehatyŭnyja abaviazacielstvy nie ŭmiešvacca ŭ stvareńnie asacyjacyj abo ich dziejnaść, ale i pazityŭnyja abaviazacielstvy pa pryniaćci mier [...] dla spryjańnia pracy asacyjacyj dziakujučy dziaržaŭnamu finansavańniu abo vyzvaleńni ad padatkaŭ srodkaŭ, što atrymlivajucca z-za miažy».

Rabočaja hrupa taksama zajaviła što «pošuk krynic finansavańnia, zrobleny sp-m Bialackim, kab zabiaśpiečyć samo isnavańnie i praciah dziejnaści «Viasny» znachodzicca ŭ adpaviednaści z [...] artykułam 20, parahraf 1 Usieahulnaj dekłaracyi pravoŭ čałavieka i artykułam 22 Mižnarodnaha pakta ab hramadzianskich i palityčnych pravach» i zaklučyła, što

«pałažeńni kryminalnaha zakanadaŭstva, jakija prymianiajucca ŭ spravie sp-ra Bialackaha, nie ŭličvali vyšejzhadanyja mižnarodnyja standarty» i što, adpaviedna, Biełaruś parušyła svaje mižnarodnyja abaviazacielstvy.

Takim čynam, Rabočaja hrupa AAN pa samavolnych zatrymańniach pastanaviła, što zaklučeńnie Bialackaha było samavolnym i źjaviłasia vynikam ažyćciaŭleńnia im univiersalna pryznanych pravoŭ čałavieka, a adpaviedna, što jano padpadaje pad katehoryju II samavolnych zaklučeńniaŭ, u adpaviednaści z typałohijaj, pryniataj Rabočaj hrupaj (kali pazbaŭleńnie voli stanovicca vynikam ažyćciaŭleńnia pravoŭ i svabod, harantavanych artykułami 7, 13, 14, 18, 19, 20 i 21 Usieahulnaj dekłaracyi pravoŭ čałavieka i artykułami 12, 18, 19, 21, 22, 25, 26 i 27 Mižnarodnaha pakta ab hramadzianskich i palityčnych pravach).

Rabočaja hrupa AAN pa samavolnych zatrymańniach dadała, što

«ŭ vypadku paviedamleńniaŭ ab parušeńni pravoŭ čałavieka [...], u tym liku praśledavańniach [...], unutranyja ŭłady abaviazanyja pravieści rasśledavańnie, i śledstva pavinna być niezaležnym, jak na instytucyjanalnym uzroŭni, tak i na praktycy, i chutkim».

«Rašeńnie Rabočaj hrupy AAN - heta znakavaja pieramoha, tak jak jano pryznaje, što zaklučeńnie Alesia Bialackaha samavolna z punktu hledžańnia mižnarodnaha prava, i padkreślivaje prava na finansavańnie niezaležnych NDA», - zajaviła siońnia prezident FIDH Suer Bełchasen. «Aleś Bialacki pavinien być nieadkładna vyzvaleny, i hanieńni suprać «Viasny» i inšych pravaabaroncaŭ pavinny być spynienyja», - dadała jana.

Na dumku hienieralnaha sakratara OMCT Džeralda Stejbraka, «nieabchodna damahacca, kab hetaje rašeńnie pryviało da palapšeńnia situacyi pravaabaroncaŭ i NDA ŭ Biełarusi i ŭ inšych krainach».

U žniŭni 2011 hoda Aleś Bialacki byŭ aryštavany i abvinavačany va «ŭtojvańni dachodaŭ u asabliva bujnym pamiery» pa art. 243, č. 2 Kryminalnaha Kodeksa Biełarusi. 24 listapada, paśla amal 4 miesiacaŭ papiaredniaha źniavoleńnia, sud prysudziŭ jaho da 4,5 hadoŭ kałonii strohaha režymu, kanfiskacyi majomaści - u tym liku pamiaškańnia, vykarystoŭvanaha pad ofis «Viasny» - i štrafu ŭ 757.526.717 biełaruskich rubloŭ (pryblizna 70.000 jeŭra) . 24 studzienia 2012 hoda Mienski haradski sud paćvierdziŭ prysud. 29 sakavika 2012 hoda toj ža sud pryniaŭ novaje rašeńnie, prysudziŭšy jaho vypłacić jašče 140.366.151 rubloŭ (kala 12.700 jeŭra) u dadatak da ŭžo vypłačanaha ŭ studzieni 2012 hoda štrafu.

Pry pryniaćci hetaha rašeńnia Rabočaja hrupa AAN kiravałasia paviedamleńniem, atrymanym ad Absiervatoryi pa abaronie pravoŭ pravaabaroncaŭ, a taksama adkazam Respubliki Biełaruś, u jakim śćviardžałasia, što zaklučeńnie i prysud Bialackamu źjaŭlajucca zakonnymi, adpaviadajuć nacyjanalnamu zakanadaŭstvu i nie parušajuć mižnarodnyja abaviazacielstvy krainy.

Rašeńnie Rabočaj hrupy AAN pa samavolnych zatrymańniach zasnavana na mižnarodnym pravie i było vyniesiena mižnarodnym nahladalnym orhanam, jaki składajecca ź niezaležnych ekśpiertaŭ, pa vynikach spabornickaj pracedury z uciahvańniem Respubliki Biełaruś. Hetaja rezalucyja pasłužyć asnovaj dla dalejšych krokaŭ da vyzvaleńnia Alesia Bialackaha.

• 0
• 0
• 0
• 0
• 0
• 0
• 0
• 0