Najlepšy chakieist kamandy Łukašenki staŭ najbujniejšym zabudoŭščykam stalicy
Kampanija Paŭła Biełaha maje ź dziasiatak učastkaŭ pad zabudovu.
«Voś hetych šarłatanaŭ na rynku budaŭnictva być nie pavinna. Jany zusim ničoha nie razumiejuć u budaŭnictvie. Jon niedzie tam topčacca kala Ładućki ci Łukašenki, pakazvajučy, što jon samy rodny i blizki, paśla idzie da niejkaha ministra, i jon užo pačynaje vakoł jaho kruhami biehać».Pra kaho byli hetyja słovy sa zvarotu Alaksandra Łukašenki da nacyjanalnaha schodu?
Dobrasumlennyja zabudoŭščyki, — tłumačyŭ Łukašenka, — heta «nie tyja, jakija prychodziać, biaruć resursy našych bankaŭ, jak pasiaredniki najmajuć budaŭničuju firmu — «Prambud» ci jaki trest, — i jana im buduje. Jany potym pradajuć kvatery i jašče trymajuć ceny na samym vysokim uzroŭni na rynku, atrymlivajuć zvyšprybytak. Heta narmalna?!»
Inšymi słovami,
kiraŭnik dziaržavy vystupiŭ suprać zabudoŭščykaŭ, jakija nie majuć ułasnych budaŭničych mahutnaściaŭ, a najmajuć dziaržaŭnyja tresty.U vyniku prybytak atrymlivaje nie dziaržava, a pryvatnik.
Naprykład, hrupa kampanij «Tapas» letaś zdała ŭ ekspłuatacyju žyły dom pa vulicy Knoryna ŭ Minsku. Hienieralnym padradčykam byŭ dziaržaŭny MAPID. Ale ci raspaŭsiudzicca hnieŭ Łukašenki na hetaha zabudoŭščyka?
Kampanija «Tapas» atrymała pad zabudovu vyhadnyja ŭčastki nie tolki na Knoryna, a i ŭ samych prestyžnych rajonach Minska. U kiraŭnictvie kampanii 33-hadovy Pavieł Bieły — syn Alaksandra Biełaha. Nie, nie taho Sašy Biełaha, jakoha prasłaviŭ telesieryjał «Bryhada». Heta naš, minski Bieły — chakieist, što pamianiaŭ svajo proźvišča ź Levianštejn na prymietnik koleru. Jahony syn taksama staŭ chakieistam. I nie tolki.
Ad biblijateki da Kamaroŭki
Vizitoŭka «Tapasa» — pabudavany małapaviarchovy žyły kompleks na vulicy Jaźminavaj u Minsku. Hety rajon — za Nacyjanalnaj biblijatekaj, pobač sa Ślapianskaj vodnaj sistemaj — pa prestyžnaści sastupaje tolki Drazdam, dzie žyvuć čynoŭniki i inšyja asoby, nabližanyja da Łukašenki.
Kvatery tut kuplajuć za paŭmiljona dalaraŭ, a susiednija katedžy — za $1—2 miljony.
Śpis abjektaŭ «Tapasa» nie nadta doŭhi. Kampanija jašče zajmałasia rekanstrukcyjaj adnaho z histaryčnych damoŭ na staličnaj vulicy Revalucyjnaj, a taksama adkryła handlovy centr «Pasaž» u prybytkovym miescy pobač z Kamaroŭskim rynkam.
«Dla tych, chto varty najlepšaha»
Infarmacyja na sajcie «Tapasa» śviedčyć, što na dadzieny momant kampanija viadzie budaŭnictva jašče dvuch žyłych kompleksaŭ, taksama ŭ rajonie Nacyjanalnaj biblijateki.
Amal dabudavany «ParkSici» ŭjaŭlaje saboj piać žyłych budynkaŭ vyšynioj 5—6 pavierchaŭ. U ich źmiaščajucca 88 prastornych kvater. Płošča samych małych — amal 80 m2. Žyllo nazyvajecca elitnym, tamu i kaštuje ad $2300 za m2. «Heta sapraŭdny padarunak dla tych, chto cenić styl, kamfort i vysokuju jakaść žyćcia. Žyllo dla tych, chto varty najlepšaha», — havorycca ŭ rekłamnym buklecie.
«Akvamaryn» — nabor jašče z čatyroch žyłych damoŭ. 192 kvatery i niekalki pientchausaŭ z adkrytymi terasami buduć znachodzicca pobač ź siadzibaj Vańkoviča.
Rost aktyvaŭ
Na štohadovaj vystavie «Nieruchomaść» «Tapas» upieršyniu vystaviŭ svoj stend. Jak akazałasia, na terytoryi Minska kampanija zajmieła ŭžo amal dziasiatak pierśpiektyŭnych učastkaŭ pad zabudovu!
Niepadaloku ad Nacyjanalnaj biblijateki, nasuprać pravasłaŭnaha Doma miłasernaści, «Tapas» prajektuje kompleks taŭnchausaŭ «Francyska» «z abliččam u styli zachodniejeŭrapiejskaj kłasiki z elemientami maderna».Nahadajem, taŭnchaus — dvuch¬ ci trochpaviarchovy dom, jaki składajecca ź niekalkich šmatuzroŭnievych kvater ź izalavanym uvachodam i ahulnymi bakavymi ścienami. Ad niepažadanych haściej žychary «Francyska» zmohuć schavacca za kantrolna¬prapusknym punktam.
Tamsama, u rajonie vulicy Jaźminavaj, «Tapas» źbirajecca pabudavać 15 katedžaŭ. Pasiołak jašče nie atrymaŭ nazvy. Pa žadańni zamoŭcy mohuć być uźviedzienyja jak katedžy pa indyvidualnych prajektach, tak i taŭnchausy.
Inšyja abjekty raskidanyja pa ŭsioj stalicy. Naprykład,
u mikrarajonie «Ržaviec» (niepadalok ad «MinskAreny») «Tapas» prajektuje žyły kompleks «Brasłaŭski». Ad daminanty — 23-paviarchovaj viežy — u dva baki buduć razychodzicca 15-paviarchovyja padjezdy.Z voknaŭ budynka bačnyja vadaschovišča «Drazdy», staŭ Lebiadziny i pieršy staličny akvapark.
Kala stancyi mietro «Instytut kultury» na vulicy Mahiloŭskaj «Tapas» zapłanavaŭ uščylnieńnie. Na miescy vajenkamata, jaki budzie źniesieny, maje być pabudavany 10¬paviarchovy žyły dom. Žychary rajona entuzijazmu nie vykazvajuć, ale nie ŭsio zaležyć ad ich.
Narešcie,
žyły kompleks «Družny», jaki adrazu ž paŭstaje pierad vačyma kožnaha, chto zajazdžaje ŭ Minsk z bresckaj trasy, taksama pierajšoŭ da «Tapasa».Pieršy dom tam amal dabudavała biełaruskaniepalskaja kampanija «SintezBiełniep Bud». Dziela spraviedlivaści adznačym, što takoj kolkaści pretenzij ad navasiołaŭ nie było, badaj, ni ŭ adnaho sa staličnych damoŭ. Elektryčnaści i haračaj vady nie było na praciahu hoda, praz ščyliny pa kvaterach hulaŭ viecier, a adkrytyja łodžyi zavalvała śnieham… Budavać nastupnyja puskavyja kompleksy budzie «Tapas». Pa słovach supracoŭnikaŭ kampanii, učastak byŭ vykupleny ŭ budaŭnikoŭ-papiarednikaŭ.
Vyhadnaja pazicyja
U čym sakret pośpiechu «Tapasa»? Jak kampanija, jakaja jašče niekalki hadoŭ tamu ničym nie vyłučałasia na fonie kankurentaŭ, zdoleła atrymać ź dziasiatak prestyžnych učastkaŭ?Mnohija niebiespadstaŭna źviazvajuć hetyja fakty z asobaj namieśnika dyrektara kampanii. Im pracuje 33¬hadovy biznesmen, a raniej pierśpiektyŭny chakieist Pavieł Bieły.
Jahonaha baćku Alaksandra i dvuch dziadźkaŭ (Uładzimira i Juryja) mohuć uzhadać spartovyja zaŭziatary sa stažam. Troje bratoŭ u saviecki čas byli chakieistami. Ich tahačasnaje proźvišča — Levianštejn.
Ź ciaham času Alaksandr Levianštejn pieratvaryŭsia ŭ Alaksandra Biełaha. Pad novym imiem jon paśpieŭ papracavać hienieralnym dyrektaram Fiederacyi chakieja Biełarusi, a paśla — na takoj samaj pasadzie ŭ minskim «Dynama».
Jahony syn Pavieł tym časam padavaŭ nadziei. Jaho paklikali hulać u Rasiju. Praŭda, u składzie ni čarapavieckaj «Sievierstali», ni ŭfimskaha «Sałavata Jułajeva» jon tak i nie zamacavaŭsia. Daviałosia viartacca ŭ Biełaruś, kab u 2007 zakončyć prafiesijnuju karjeru praz traŭmu śpiny. Ale heta byŭ tolki pačatak inšaha chakiejnaha ŭzdymu.
Pavieł apynuŭsia ŭ składzie zbornaj Alaksandra Łukašenki, pryčym na pazicyi napadajučaha. Jahonym partnioram pa linii ataki staŭ sam kiraŭnik dziaržavy.
Bieły zakidvaje šajby adnu za adnoj, tym samym prynosiačy daloka nie amatarskaj kamandzie pierakanaŭčyja pieramohi ŭ hulniach z chakiejnymi nieprafiesijanałami. A sam tym časam buduje prybytkovy biznes.
…Žyły kompleks «Akvamaryn» musić być dabudavany ŭ trecim kvartale 2015 hoda. Na toj samy čas u Biełarusi zapłanavanyja prezidenckija vybary.
«Dla mianie hałoŭnaje, kab jany ŭsio paśpieli zrabić da vybaraŭ, bo mała jak tam raskład potym źmienicca…» —pieražyvaje adzin z budučych žylcoŭ «Akvamaryna» na tematyčnym forumie «Tapasa» ŭ internecie.
Kamientary