«Rasiejski ambasadar zabyŭ, što znachodzicca ŭ niezaležnaj Biełarusi»

Były namieśnik ministra zamiežnych spravaŭ Biełarusi Andrej Sańnikaŭ prakamentavaŭ ustanovačnaje interviju rasijskaha pasła Surykava.

«Ambasadar Surykaŭ, mabyć, zabyŭ, što jon znachodzicca nie dzie‑niebudź u Ałtajskim krai, a ŭ niezaležnaj Biełarusi. Takija zajavy, pa‑pieršaje, nie ŭłaścivyja dypłamatam, a pa‑druhoje, ich možna rasceńvać, jak zamach na suvierenitet dziaržavy», — zajaviŭ były namieśnik ministra zamiežnych spraŭ Biełarusi, mižnarodny kaardynatar Chartyi'97 Andrej Sańnikaŭ, kamientujučy zajavu rasiejskaha ambasadara ŭ Biełarusi Alaksandra Surykava pra vierahodnaść raźmiaščeńnia ŭ Biełarusi rasiejskich jadziernych ab`iektaŭ. (Poŭny tekst interviju rasiejskaha pasła, ź jakoha možna zrazumieć, jak u Rasiei siońnia ŭsprymajuć Biełaruś i što dla Rasiei najbolš važnaje, možna pračytać tutaka.)

U 1991‑1994 hady Andrej Sańnikaŭ udzielničaŭ u pieramovach pa jadziernym razzbrajeńni Biełarusi. Na jaho dumku, rasiejski ambasadar naŭrad ci moh zrabić takuju zajavu biez sankcyi rasiejskaha kiraŭnictva, a značyć, da hetych zajaŭ treba stavicca vielmi sur`iozna. «Až da pierahladu statusu rasiejskich vajskovych ab`iektaŭ na terytoryi Biełarusi», — ličyć Sańnikaŭ.

«Biełaruś u svoj čas zrabiła važki ŭniosak va ŭmacavańnie mižnarodnaj biaśpieki, pryniaŭšy na siabie abaviazalnictvy, jak pa zvyčajnych, tak i pa jadziernych uzbrajeńniach, i mienavita heta moža słužyć asnovaj dla dalejšaha ŭmacavańnia našaj biaśpieki. Stanovicca vidavočnym, što znajści harantyi biaśpieki možna tolki ŭ jeŭrapiejskim kantekście, bolš dakładna, u jeŭraatłantyčnym. Rasieja čarhovym razam paćviardžaje, što źjaŭlajecca dla niezaležnaj dziaržavy krynicaj panižeńnia biaśpieki, jak enierhietyčnaj, tak i vajennaj», — adznačaje Andrej Sańnikaŭ.

U toj samy čas, adznačaje mižnarodny kaardynatar Chartyi'97, u ramkach Jeŭrapiejskaha Źviazu hetyja pytańni ź`iaŭlajucca prerahatyvaj kožnaj asobnaj dziaržavy. I kali niama zhody dziaržavy i niama ahulnaj zhody Jeŭraźviaza, to scenar raźmiaščeńnia vajskovych baz abo vajskovych ab`iektaŭ na terytoryi krain‑siabraŭ JEZ nie moža być realizavany.

«Admoviŭšysia ad mahčymaści raźmiaščeńnia jadziernaj zbroi na svajoj terytoryi na pačatku 90‑ch hadoŭ, Biełaruś nie tolki zrabiła važki ŭniosak u miru va ŭsim śviecie, ale i vyvieła siabie za dužki mahčymaha supraćstajańnia jadziernych dziaržaŭ — Rasiei i Złučanych Štataŭ. Ciapier ža słovami vyšejšaha pradstaŭnika Rasiei ŭ Biełarusi, ambasadara Surykava havorycca pra mahčymaść ŭciahvańnia našaj krainy ŭ kanfrantacyju i honku ŭzbrajeńniaŭ, jakija znoŭ aznačylisia», — ličyć dypłamat.

• 0
• 0
• 0
• 0
• 0
• 0
• 0
• 0