Ministerstva finansaŭ Biełarusi inicyjuje pavyšeńnie stavak akcyzaŭ na aŭtamabilnaje paliva, paviedamiŭ pradstaŭnik naftapierapracoŭčaj haliny.
Pavodle jaho słoŭ, hetaja prapanova matyvavanaja nieabchodnaściu pavialičyć dachody biudžetu. Miarkujecca, što staŭki akcyzaŭ na bienziny mohuć uzraści na 20%, na dyzielnaje paliva — na tracinu.
Akcyz zajmaje značnuju dolu ŭ canie paliva. "U canie tony dyzpaliva akcyz zajmaje 14%, u canie tony bienzinaŭ u zaležnaści ad marki — ad 16 da 24%",— zaznačyŭ surazmoŭca BiełaPAN.
Nahadajem, što ŭ Biełarusi dziejničaje dziaržaŭnaje rehulavańnie cen na paliva. U hetych umovach, miarkujuć halinovyja ekśpierty, isnuje ryzyka taho, što va ŭmovach strymlivańnia ŭradam inflacyi pavyšany akcyz laža na plečy vytvorcaŭ.
"Spadziajemsia, našy intaresy pry razhladzie hetaha pytańnia (ab pavieličeńni stavak akcyzaŭ) buduć uličvacca", — vykazaŭ nadzieju pradstaŭnik naftapierapracoŭčaj haliny.
Varta zaznačyć, što pastupleńni ad akcyzaŭ na paliva robiać značny ŭkład u dachody biełaruskaha biudžetu.Tak, u materyjałach da biudžetu na 2013 hod było ŭkazana, što za košt akcyzaŭ na aŭtamabilnaje paliva ŭ kansalidavany biudžet pavinna pastupić 4,37 trłn. rubloŭ. Ahulnyja pastupleńni ad akcyzaŭ u biudžet byli praduhledžany na ŭzroŭni 16,43 trłn. rubloŭ. Takim čynam, akcyzy na paliva famirujuć bolš jak čverć akcyznych pastupleńniaŭ kansalidavanaha biudžetu. Pry hetym udzielnaja vaha akcyzaŭ u ahulnych padatkovych dachodach kansalidavanaha biudžetu składaje pryblizna 10%.
Zhodna sa źmienami ŭ Padatkovy kodeks Biełarusi, jakija ŭvajšli ŭ siłu 1 studzienia hetaha hoda, staŭki akcyzaŭ (za tonu) na bienziny z aktanavaj ličbaj 95 i vyšejšaj vyznačany na ŭzroŭni 1.231,5 tys. biełaruskich rubloŭ, z aktanavaj ličbaj ad 91 da 95 — 1.544 tys. rubloŭ, z aktanavaj ličbaj da 91 — 1.751,1 tys. rubloŭ, na dyzpaliva — 991,8 tys. rubloŭ.U pačatku 2013 hoda staŭki akcyzaŭ na naftapradukty ŭzraśli na 20%.
Jak paviedamlałasia raniej, ceny na aŭtamabilnaje paliva ŭ Biełarusi sioleta byli pavyšany ŭ studzieni, padaražańnie skłała (u zaležnaści ad najmieńnia naftapraduktaŭ) ad 4 da 6,7%.
Kancern "Biełnaftachim" rastłumačyŭ, što pierahlad cen byŭ "praviedzieny ŭ metach častkovaj kampiensacyi (vytvorcam. — BiełaPAN.) pavieličeńnia na 20% stavak akcyzaŭ na naftapradukty ŭ 2013 hodzie, čatyrochrazovaha rostu taryfaŭ na čyhunačnyja pieravozki naftapraduktaŭ pa terytoryi, a taksama ŭ metach paetapnaha zbližeńnia cen na tavary ŭ krainach Mytnaha sajuza".
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?5
Kamientary