Lidar mietał-hurta Gods Tower źbirajecca bałatavacca ŭ prezidenty 

Lidar lehiendarnaha homielskaha mietał-hurta Gods Tower Uładzisłaŭ Navažyłaŭ (sceničny psieŭdanim Łeśli Najf) abjaviŭ u sacsietkach pra namier bałatavacca na pasadu prezidenta Biełarusi. 

Muzykant stvaryŭ ułasny sajt, na jakim apublikavana jaho pieradvybarnaja prahrama. Jon, u pryvatnaści, piša: «Kali ja stanu prezidentam, pieršym čynam vydam ukaz ab pabudovie ŭ Biełarusi kasmadroma i praviadzieńni ŭłasnaj Alimpijady. Akramia taho, my zapatrabujem viarnuć nam usie našy spradviečnyja ziemli ad Ajdacha da Płutona. My nie staniem raźmieńvacca na tanki, samaloty i kulamioty. My pabudujem svaju Zorku Śmierci z čarkaj i skvarkaj! Hałoŭnaje što? Hałoŭnaje, kab skafandr nie cisnuŭ! A tam i da ekanomiki dabiaremsia». 

Łeśli Najf pazicyjanuje siabie jak «byłoha kaśmičnaha pirata». «U nas buduć samyja vialikija ŭradžai, mižhałaktyčnyja traktary i Vialiki chakiejny kałajdar!» — abiacaje jon. 

Adnym z punktaŭ pieradvybarnaj prahramy muzykanta źjaŭlajecca lehalizacyja karupcyi. «Nielha ihnaravać fakt pieranasyčanaści našaha hramadstva karupcyjaj. Ja pryznaju, što heta pryrodžanaja chvaroba. Tamu, u adroźnieńnie ad inšych palitykanaŭ, ja prapanoŭvaju karupcyju lehalizavać. My pabudujem damy karupcyi, cełyja vulicy ryžych lichtaroŭ, dzie čynoŭniki zmohuć zajmacca karupcyjaj u paradku indyvidualnaha pradprymalnictva. Takim čynam, my papoŭnim biudžet i znojdziem srodki na budaŭnictva kasmadromaŭ na vioscy, a taksama na madernizacyju kaśmičnaha fłotu», — piša Łeśli Najf. 

Na pasadzie prezidenta jon taksama maje namier raźvivać kaśmičnuju prahramu. «Abhruntavana śćviardžaju, što na hety momant sprava kasmanaŭtyki ŭ našaj krainie znachodzicca ŭ hłybokaj čornaj dzircy, tamu adrazu paśla majho prychodu da ŭłady asihnavańni na hetuju halinu narodnaj haspadarki buduć šmatkroć pavialičanyja.

Ja chaču, kab kožny biełarus moh pry žadańni źlapać rakietapłan u padvale z najaŭnych detalaŭ bytavoj i sielskahaspadarčaj techniki.

Dla hetaha my surjozna pierahledzim ahulnanacyjanalnuju prahramu adukacyi na karyść astranomii, prykładnoj kasmanaŭtyki i damašniaha rakietabudavańnia. U vyniku luby biełarus budzie zdolny pry dapamozie samahonnaha aparatu vyrablać samy sapraŭdny hieptył i akiślalnik!», — piša muzykant. 

U kamientary BiełaPAN Uładzisłaŭ Navažyłaŭ rastłumačyŭ, što jaho kampanija — «nie bolš čym sproba paśmiajacca nad vybarami ŭ Biełarusi».

«Kali z dapamohaj ŚMI zrobim rezanans, to čamu b nie? Šansy — niavažna, hałoŭnaje — pasprabujem razhajdać łodku, dakładniej, razvarušyć bałota. Mietady pieradvybarnaj kampanii i technałohii my prymienim situacyjnyja, radykalnyja, ale biezbalučyja. Biełarusy zanadta mała ŭśmichajucca, tamu ŭ ich ekanomika depresiŭnaja. A ŭśmichajučysia, i da Marsa pieški dojdzieš», — pierakanany lidar hurtu Gods tower.

• 0
• 0
• 0
• 0
• 0
• 0
• 0
• 0