Hurt «Krama» pradstaviła na Tuzin.fm klip na pieśniu «Dziaŭčynka». Muzyki nazyvajuć jaho pieršym surjoznym klipam za ŭsiu historyju isnavańnia kamandy.
Videa źniaŭ małady režysior Andrej Laŭkovič.
«Ja abraŭ «Dziaŭčynku» biez vahańniaŭ, bo jana bolš mieładyčnaja i dobra padychodzić dla vizualizacyi, — kaža režysior. — Pakolki hetaja pieśnia źviazana z asabistymi pieražyvańniami, to ja pastaraŭsia stvaryć atmaśfierny kinamatahrafičny emacyjny videaklip».
Materyjał dla videa zdymali ŭ dva dni. «My padyšli hruntoŭna, jak nikoli: uziali ŭ arendu na noč Teatr biełaruskaj dramaturhii, pastavili śviatło i huk i zdymali da ranicy. Siužetnuju liniju ź dziaŭčynaj Andrej zdymaŭ užo biez nas na vulicach Minska», –apaviadaje hitaryst «Kramy» Siarhiej Truchanovič.
Pieśnia «Dziaŭčynka» uvojdzie ŭ novy albom «Kramy» pad nazvaju «Biełaja vada», praca nad jakim praktyčna zavieršanaja. Lidar «Kramy» Ihar Varaškievič z zadavalnieńniem apaviadaje pra budučy reliz: «Albom abiacaje być vielmi mocnym i surjoznym, bo jon užo prajšoŭ pravierku časam. Anivodnaj prachadnoj pieśni ŭ im nie budzie. Jak nie dziŭna, u dysk uvojdzie niamała liryčnych tvoraŭ. Jon pačaŭ stvaracca ŭ niaprosty čas (paśla śniežnia 2010 hoda), ale pieśni buduć nie pra heta. Jak u «Okieana Jelzi», jakija śpiavajuć pra kachańnie, ale źjaŭlajucca pry hetym simvałam svabody va Ukrainie. Žartuju, kaniečnie, ale mušu skazać dakładna: albom budzie dobry!».
Reliz albomu «Biełaja vada» zapłanavany na vosień.
Kamientary