Praces hałasavańnia na daterminovych vybarach u Viarchoŭnuju radu Ukrainy i padlik hałasoŭ byli prazrystymi, zajaviŭ 27 kastryčnika na pres-kanfierencyi ŭ Kijevie śpiecyjalny kaardynatar misii karotkaterminovych naziralnikaŭ ABSIE Kient Charšted.
Pavodle jaho słoŭ, vybarščyki adkazali na składanyja prablemy, što ź`iaŭlajecca faktyčnym paćviardžeńniem demakratyčnaha ruchu Ukrainy, paviedamlaje UNIAN.
Maskva taksama pryznała, što vybary ŭ Viarchoŭnuju radu adbylisia, niahledziačy «na šmatlikija parušeńni».
«Papiarednija vyniki ŭkrainskich vybaraŭ pakazvajuć, što ŭkrainski narod prahałasavaŭ. My pakidajem ubaku šmatlikija parušeńni, jakija byli na etapie padrychtoŭki da vybaraŭ, tyja prymusovyja mietady, jakija ŭžyvalisia da šerahu kandydataŭ, i zachady pa adchileńni ad palityčnaha pracesu, ad udziełu ŭ vybarach inšych palityčnych sił. Ale, tym nie mienš, hałasavańnie adbyłosia», — cytuje TASS ministra zamiežnych spraŭ RF Siarhieja Łaŭrova.
Pavodle apošnich danych, Centralnaja vybarčaja kamisija Ukrainy apracavała 55,28% elektronnych pratakołaŭ učastkovych vybarčych kamisij, padličana 8 młn. 72 tys. 452 hałasy vybarščykaŭ. Piacipracentny bar`ier pieraadolvajuć nastupnyja partyi: «Narodny front» prem`ier-ministra Arsienia Jacaniuka i śpikiera parłamienta Alaksandra Turčynava (21,6%), Błok Piatra Parašenki (21,45%,) ab`iadnańnie «Samadapamoha» mera Lvova Andreja Sadavoha (11,2%), Apazicyjny błok, jaki stvaryli byłyja paplečniki źbiehłaha ŭ Rasiju prezidenta Viktara Janukoviča pa Partyi rehijonaŭ (9,79%), Radykalnaja partyja Aleha Laško, jakoha častka ekśpiertaŭ ličyć prajektam Kramla (7,34%) i «Baćkiŭščyna» Julii Cimašenki (5,65%).
Kamientary