Kazać, nakolki žyćcio i spravy Franciška Skaryny dazvalajuć raspačać praces kananizacyi biełaruskaha pieršadrukara, pakul zanadta rana. Takoje mierkavańnie ŭ intervju biełaruskaj redakcyi Vatykanskaha radyjo vykazaŭ apostalski vizitatar dla hreka-katolikaŭ Biełarusi archimandryt Siarhiej Hajek.
Vysoki śviatar raspavioŭ, što tema kananizacyi Skaryny abmiarkoŭvajecca ŭ Biełaruskaj hreka-katalickaj carkvie ciaham apošniaha dziesiacihodździa. Hetaje pytańnie, adznačyŭ jon, nie abminuła taksama inšyja chryścijanskija kanfiesii, pradstaŭlenyja ŭ Biełarusi, i siońnia «jość peŭnyja koły, jakija pačynajuć nanova asensoŭvać kaštoŭnaści spravy Skaryny».
«Mienš, na žal, vyvučana bijahrafija pieršadrukara. Jość šmat nieviadomych momantaŭ, nie da kanca vyvučanych», — padkreśliŭ archimandryt Hajek.
Nahadajem, na pačatku listapada stała viadoma, što ŭ Biełarusi byŭ stvorany mižnarodny hramadski arhkamitet pa kananizacyi Francyska Skaryny, jaki ŭznačaliŭ były ministr zamiežnych spraŭ kandydat histaryčnych navuk Piotr Kraŭčanka. Sakratarom arhkamiteta staŭ viadomy litaraturaznaŭca, historyk, piśmieńnik i žurnalist, doktar fiłałahičnych navuk Adam Maldzis. Siońnia mižnarodny hramadski arhkamitet pa kananizacyi Skaryny rychtuje arhumientacyju na karyść taho, kab hety praces byŭ raspačaty.
Pavodle słoŭ apostalskaha vizitatara dla hreka-katolikaŭ Biełarusi, kali źjaviŭsia hety hramadski kamitet, u skład jakoha ŭvajšli surjoznyja historyki, «paŭstała spadziavańnie na ich vielmi salidnuju pracu, zasnavanuju na krynicach».
«Jany viedajuć pra našu duchoŭnuju simpatyju da asoby Franciška Skaryny i śviadomaść kaštoŭnaści hetaj asoby dla ŭsioj Biełarusi. Tamu kamitet i zajaviŭ pra svaje spadziavańni adnosna padtrymki z boku Hreka-katalickaj carkvy», — skazaŭ jon.
«My sa svajho boku čakajem na ich salidnuju pracu nad bijahrafijaj i vyvučeńniem niekatorych momantaŭ, tamu što hety čałaviek patrabuje taho, kab śćvierdzili, što jon byŭ hłybokavierujučym, — adznačyŭ archimandryt Hajek. — I heta ŭ dadzienym kantekście samaje važnaje. Pytańnie kananizacyi — heta zusim inšaja historyja. I tut hramadski kamitet nie da kanca kampietentny, choć moža malicca ŭ intencyi kananizacyi. Ale heta sprava carkvy i kananičnaha pracesu, pryčym vielmi składanaha, i siońnia zanadta rana kazać, nakolki žyćcio i spravy Skaryny dazvalajuć naohuł raspačać hety kananičny praces».
Takim čynam, siońnia relihijnaja i hramadskaja supolnaść Biełarusi, skazaŭ śviatar, znachodzicca na etapie asensavańnia bijahrafii Skaryny, i «tut jość peŭnyja pytańni, na jakija pakul što niaviedama jak adkazać».
Ciapier čytajuć
Trend siarod biełaruskich zumieraŭ i milenijałaŭ: usio bolš moładzi viartajecca žyć da baćkoŭ3
Kamientary