Plažny adpačynak: kolki što kaštuje hetym letam

Sioleta ŭ raniejšuju Miekku plažnaha adpačynku biełarusaŭ — Krym — nichto nie pajedzie. Adnak žadańnie pravieści adpačynak na mory nie źnikaje. «Naša Niva» zrabiła padborku samych papularnych kirunkaŭ dla adpačynku.

Ceny pryvodziacca z raźliku za adnaho čałavieka za tydzień.

1. Turcyja

Hetaja kraina stała samym papularnym miescam adpačynku siarod biełarusaŭ. Dziasiatki turfirm zasypajuć sotniami prapanoŭ. U siarednim adpačynak u Turcyi abydziecca prykładna ŭ 7—8 młn za try, radziej čatyry zorki. Tur z vyletam z Maskvy ci Kijeva možna nabyć tańniej. Taksama mocna aščadzić možna, nabyŭšy «haračy tur». Adnak treba źviartać uvahu na praciahłaść tura — za padobnyja summy možna atrymać i tydzień, i dva adpačynku na mory ŭ zaležnaści ad miesca i hatela. Samyja častyja nakirunki tureckaha adpačynku — Ałańja, Kušadasy, Kiemier, Bielek, Side, Antalja. U asnoŭnym «usio uklučana» — kaniok plažnaha adpačynku ŭ Turcyi.

2. Bałharyja

Haračyja tury ŭ Bałharyju prapanoŭvajuć užo za 3,5 miljony. Adnak bolš realistyčnaja suma — ad 6,5 młn rubloŭ za 7 ci 8 načej u trochzorkavym hateli. Treba adznačyć, što prapanovy «ŭsio ŭklučana» sustrakajucca ŭ bałharskich hatelach niačasta. Asnoŭnyja prapanovy turahienctvaŭ — śniadanki ŭ hateli ci paŭpansijon. Jość varyjanty turaŭ biez uklučanaha ŭ košt charčavańnia. Laciać u Bałharyju ŭ asnoŭnym ź Minska. Ale nie zabudźciesia, što akramia apłaty tura spatrebicca jašče 60 jeŭra na afarmleńnie šenhienskaj vizy.

3. Jehipiet

Ceny na haračyja tury ŭ Jehipiet pačynajucca ŭžo ad 4,5 młn rubloŭ. Adnak bolšaja kolkaść turaŭ lažyć u cenavym dyjapazonie ad 6,5 da 7,5—8 młn rubloŭ. Za hetyja hrošy možna pravieści 7—10 načej u 4 ci 5-zorkavym hateli. Viadoma, «usio ŭklučana». Na žal, vylatać u Jehipiet, chutčej za ŭsio, daviadziecca z Maskvy ci Kijeva — prapanoŭ z vyletam ź Minska niašmat. Biełarusam dla ŭjezdu ŭ Jehipiet patrebnaja viza, adnak jaje staviać adrazu ŭ aeraporcie pa prylocie. Vizavy zbor — 25 dalaraŭ.

 4. Italija

U hetaj krainie plažny adpačynak možna sumiaščać z ahladam słavutaściaŭ — u Italii ich chopić na niekalki žyćciaŭ. Dy i kurortny adpačynak nadzvyčaj raznastajny: možna vybirać Adryjatyčnaje, Tyrenskaje, Ianičnaje mora, kantynientalnuju Italiju, Sicyliju, Sardziniju… Što tyčycca biełaruskich turapierataraŭ, bolšaść ź ich hatovaja pasłać klijentaŭ u rajon Rymini — vializny kurort na paŭnočnym uschodzie Italii. Za 9—11-dzionny adpačynak na italjanskich uźbiarežžach pryjdziecca vykłaści kala 9—11 miljonaŭ ci bolš. Pražyvańnie — u 2—3-zorkavych hatelach. U canu pucioŭki zvyčajna ŭklučanyja śniadanki, radziej prapanujecca paŭpansijon.

5. Hrecyja

Hrecyja sa svaimi praciahłaj bierahavoj linijaj, sotniami vyspaŭ i adnosna nievysokimi cenami nie pierastaje pryciahvać turystaŭ, jakija chočuć płavać u mory, zaharać i smačna jeści. Za tydzień adpačynku ŭ Hrecyi pa pucioŭcy biełaruskaha turapieratara daviadziecca zapłacić 8—10 miljonaŭ rubloŭ. U hetuju sumu ŭvachodzić pražyvańnie ŭ trochzorkavym hateli sa śniadankami ci paŭpansijonam. Samyja častyja kirunki — Rodas, Kryt, Korfu.

• 0
• 0
• 0
• 0
• 0
• 0
• 0
• 0