U Biełarusi zaćvierdžany płan mierapryjemstvaŭ pa debiurakratyzacyi dziaržaparatu
U Biełarusi zaćvierdžany płan mierapryjemstvaŭ pa debiurakratyzacyi dziaržaŭnaha aparatu. Takoje rašeńnie źmieščana ŭ pastanovie Savieta Ministraŭ numar 584 ad 10 lipienia 2015 hoda «Ab zaćviardžeńni płana mierapryjemstvaŭ pa realizacyi Dyrektyvy Prezidenta Respubliki Biełaruś ad 27 śniežnia 2006 hoda numar 2 «Ab debiurakratyzacyi dziaržaŭnaha aparatu i pavyšeńni jakaści zabieśpiačeńnia žyćciadziejnaści nasielnictva», apublikavanaj siońnia na Nacyjanalnym pravavym partale.
Zhodna z dakumientam, z 1 studzienia 2016 hoda adziny partał elektronnych pasłuh źjaŭlajecca bazavym punktam dostupu dla zacikaŭlenych asob pry dystancyjnaj padačy zajaŭ ab ažyćciaŭleńni administracyjnych pracedur u elektronnym vyhladzie (zajavak na ich ažyćciaŭleńnie) i atrymańni adpaviedna vynikaŭ administracyjnych rašeńniaŭ dziaržaŭnych orhanaŭ i arhanizacyj u vyhladzie elektronnaha dakumienta.
Płan mierapryjemstvaŭ praduhledžvaje taksama pašyreńnie praktyki praviadzieńnia pres-kanfierencyj i inšych mierapryjemstvaŭ pa aktualnych dla nasielnictva pytańniach, u tym liku z pryciahnieńniem deputataŭ usich uzroŭniaŭ, pradstaŭnikoŭ srodkaŭ masavaj infarmacyi i hramadskich abjadnańniaŭ. Akramia taho, dziaržaŭnyja orhany i arhanizacyi pavinny apieratyŭna raźmiaščać na svaich sajtach infarmacyju ab źmianieńniach u zakanadaŭstvie, jakija zakranajuć pravy, abaviazki i zakonnyja intaresy hramadzian dla rastłumačeńnia nasielnictvu novych pałažeńniaŭ i norm.
Da 1 śniežnia 2015 hoda dziaržorhany i arhanizacyi pavinny padrychtavać i realizavać mierapryjemstvy, nakiravanyja na zabieśpiačeńnie svoječasovaha pierachodu na mižviedamasnaje elektronnaje ŭzajemadziejańnie dziaržaŭnych orhanaŭ i padparadkavanych im arhanizacyj. Taksama jany pavinny pryniać vyčarpalnyja miery pa skaračeńni papiarovaha dakumientaabarotu i zabiaśpiečyć vykarystańnie sistemy mižviedamasnaha elektronnaha dakumientaabarotu, dapracavać prahramny kompleks «Adno akno» z ulikam vyjaŭlenych na praktycy niedachopaŭ u jaho rabocie.
Piersanalnaja adkaznaść za vykanańnie płana mierapryjemstvaŭ uskładziena na kiraŭnikoŭ respublikanskich orhanaŭ dziaržaŭnaha kiravańnia i inšych dziaržaŭnych arhanizacyj, padparadkavanych Uradu Respubliki Biełaruś, staršyń abłvykankamaŭ i Minskaha harvykankama.
Heta pastanova ŭstupaje ŭ siłu paśla jaje aficyjnaha apublikavańnia.
Kamientary