Minhandlu pakul što admoviłasia ad padatkaŭ na pasyłki z zamiežnych kramaŭ

Biełaruś adkłała razhlad padatku na pasyłki z zamiežnych internet-kramaŭ i ŭskłała adkaznaść za takoje rašeńnie na Eŭrazijskuju ekanamičnuju kamisiju, pieradaje tut.by słovy namieśnicy ministra handlu Iryny Narkievič. Ale Biełaruś moža pajści chutčej za EEK, kali taja budzie «tarmazić praces», papiaredžvaje Narkievič.

Namieśnica ministra adznačyła, što za 2014 hod kolkaść pasyłak z zamiežnych internet-kramaŭ u Biełaruś vyrasła ŭ 2,7 raza (z Kitaju — u 18 razoŭ), ale pry hetym 80% pakupak kaštujuć mienš za 10 eŭra. Pakul biełarusy mohuć atrymlivać pasyłki biez padatkaŭ na sumu da 200 eŭra na miesiac, a za daražejšyja pasyłki płacić 30% ad sumy pieravyšeńnia.

Ad 1 studzienia internet-kramy Biełarusi buduć abaviazanyja mieć terminały dla bieznajaŭnaj apłaty, ale ŭžo nia buduć (jak i ŭsie pradprymalniki) mieć prava na sproščanuju systemu spłaty padatkaŭ. Ale mohuć atrymać prava pradavać u internecie spartovaje charčavańnie i juvelirnyja vyraby pry najaŭnaści punktu stacyjanarnaha handlu, kali Minhandlu prymie adpaviednaje rašeńnie.

Nastupnym etapam stanie źjaŭleńnie «tajemnaha pakupnika», dadaje onliner.by słovy hieneralnaha dyrektara Asacyjacyi kampanijaŭ infarmacyjnych technalohijaŭ.

Supracoŭniki farmalna niezaležnaj asacyjacyi buduć fiksavać fakty prodažy elektroniki i bytavoj techniki ŭ Bajnecie z parušeńniami zakanadaŭstva dy pieradavać źviestki ŭ orhany kantrolu.

Biełaruś tym časam pracuje nad prasoŭvańniem ajčynnych tavaraŭ na najbujniejšyja placoŭki anłajn-handlu, kitajskija Alibaba (handlovaja placoŭka dla arhanizacyjaŭ) i AliExpress (dzie handlujuć drobnyja pradprymalniki i pryvatnyja asoby), pieradaje sb.by.

U lik tavaraŭ, jakija źbirajucca «prasoŭvać», trapić u tym liku pradukcyja «Biellehpramu».

«U Kitaj niekalki miesiacaŭ tamu jeździli pradstaŭniki našaj Biełaruskaj universalnaj tavarnaj biržy, — kazała Lilija Ananič. — Placoŭka ŭ ich jość, jość i damoŭlenaści z bujnymi kitajskimi placoŭkami, kab jany ŭ nastupnym hodzie pryjechali da nas i abmierkavali pytańnie prasoŭvańnia biełaruskich tavaraŭ. U hetym zacikaŭlenyja i my, i jany: paśla peŭnaha času aktyŭnaj ekspansii kitajskich tavaraŭ na suśvietnyja rynki im patrebnyja navinki, jakasny zamiežny tavar siaredniaha cenavaha sehmentu. Naš tavar padychodzić pad hetyja krytery».

Za 2014 hod Biełaruś ekspartavała ŭ inšyja krainy tavaraŭ na sumu 36 młrd dalaraŭ, a abarot Alibaba Group (uładalniki Alibaba, AliExpress i šerahu inšych placovak anłajn-handlu) za adzin tolki dzień rasprodažaŭ 11 listapada skłaŭ 14 młrd dalaraŭ.

• 0
• 0
• 0
• 0
• 0
• 0
• 0
• 0