Jak vyhladajuć minskija katedžy, jakija kupili za $500 tysiač i daražej? Eksterjery i interjery
U katałohach ahienctvaŭ nieruchomaści dziasiatki prapanovaŭ ab prodažy elitnych katedžaŭ. Haspadary prosiać za ich šalonyja hrošy — časam navat bolš za $2 miljony. Pradać žyllo za takija sumy małarealna, adnak niekatorym udajecca.
«Naša Niva» praanalizavała infarmacyju Nacyjanalnaha kadastravaha ahienctva za 2015 hod: jakija zaklučanyja ŭhody byli samymi darahimi?
1. Vulica Ržavieckaja, 32, rajon «Minsk-Areny» — $2,2 miljona
Płošča doma: 755 m2
Płošča nadzieła: 13 sotak.
Katedž u rajonie «Minsk-Areny» dastaŭsia «Kitajskaj karparacyi pa budaŭnictvie daroh i mastoŭ». Heta hienieralny padradčyk na rekanstrukcyi trasy Minsk—Homiel. Budynak vykarystoŭvajecca jak ofis kampanii, pra što śviedčyć šylda na varotach.
2. Vulica Krupieckaja, Drazdy — $1,3 miljona
Płošča doma: 316 m2
Płošča nadzieła: 7,6 sotki.
U Drazdach jość dva typy damoŭ. Pieršuju pałovu składajuć katedžy čynoŭnikaŭ na ziamli, atrymanaj ad dziaržavy. Druhuju — žyllo biznesoŭcaŭ, jakija vykuplali nadzieły sami. Na prodaž pieravažna vystaŭlajecca mienavita hetaja nieruchomaść.
Katedž na vulicy Krupieckaj pradavaŭsia za $1,8 miljona, ale raniejšy haspadar skinuŭ canu.
«Padłohi — naturalny kamień i dubovy parkiet. Kinazała. Ciopły haraž na dźvie mašyny», — havaryłasia ŭ abjavie ab prodažy. U dvary doma bonus — basiejn z padahrevam.
3. Vioska Juchnaŭka, 15 km ad Minska — $1 miljon
Płošča doma: 410 m2
Płošča nadzieła: 25 sotak.
Katedž u Juchnaŭcy — unikalny siarod pieraličanych katedžaŭ adrazu pa niekalkich pazicyjach.
Heta adziny dom na adlehłaści ad Minska. Jon taksama — adziny draŭlany.
Nu i ŭ dadatak, heta adziny ź pieraličanych katedžaŭ, ułaśnikam jakoha staŭ hramadzianin Rasii.
4. Załaty zavułak, 15, Drazdy — $980 tysiač
Płošča doma: 485 m2
Płošča nadzieła: 9,4 sotki.
Zdymkaŭ interjeraŭ niama, bo chvalicca pakul niama čym. Dom pradavaŭsia biez zroblenaha ramontu, prosta z čarnavoj adździełkaj. Tamu i cana nižejšaja, čym na susiedniaj Krupieckaj vulicy. Zrešty, startavy košt składaŭ $1,3 miljona.
Na Załatym zavułku možna zajmieć statusnych susiedziaŭ: pobač žyvuć były ministr zamiežnych spraŭ Siarhiej Martynaŭ i vialiki prychilnik stalinskaj ekanamičnaj palityki Siarhiej Tkačoŭ, były daradca Łukašenki.
5. Vulica Pastaŭskaja, 24, Cna — $560 tysiač
Płošča doma: 513 m2
Płošča nadzieła: 13 sotak
Katedž aryhinalnaha vyhladu, nabyty ŭ kastryčniku 2015 hoda, nie prynios radaści novaj haspadyni. Mienš čym praz dva miesiacy na jaje była zaviedzienaja kryminalnaja sprava, tamu na dom ciapier nakładzieny aryšt.
6. Vulica Ciapličnaja, 36a, rajon Nacyjanalnaj biblijateki — $550 000
Płošča doma: 378 m2
Płošča nadzieła: 7 sotak
Z hetym domam adbyłasia dziŭnaja historyja. U pačatku 2015 hoda jaho nabyli za $550 tysiač. A ŭ kancy hoda haspadar źmianiŭsia jašče raz, voś tolki košt katedža abvaliŭsia da $180 tysiač. Praŭda, pry rehistracyi damovy možna ŭkazvać advolnyja sumy.
7. Vulica Burštynavaja, 19, Zacań — $510 000
Płošča doma: 263,5 m2
Płošča nadzieła: 12,3 sotki
Dom ničym nie admietny siarod susiednich, dy jašče i samy maleńki pa pamiery. Aryhinalnaja sproba dadatkova abaranić majomaść: pavodle dakumientaŭ, haspadary doma — dvuch- i trochhadovyja dzieci.
Bonus: vulica Viaśninka, 3 — $450 tysiač
Płošča doma: pad znos
Płošča nadzieła: 11,4 sotki
Paćviardžeńnie rekordnych cen u «Drazdach-2». Draŭlanuju viaskovuju chatu ź niekalkimi pavietkami nabyli za $450 tysiač. Dom, viadoma ž, pojdzie pad znos. Vialikija hrošy płaciać za ziamlu.
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ79
Kamientary