Administracyja prezidenta adkazała na pytańni «Našaj Nivy», rastłumačyła asobnyja aśpiekty Dyrektyvy №3

Prezident Biełarusi ŭnios źmieny ŭ Dyrektyvu №3. Hetyja źmieny majuć važnaje značeńnie dla raźvićcia ekanomiki i hramadstva.

My paličyli patrebnym paprasić, kab raspracoŭniki dakumienta rastłumačyli niekatoryja jaho momanty.

Voś adkazy na našy pytańni, jakija my atrymali ad pres-słužby prezidenta Biełarusi. Vyłučeńni šryftam u adkazach — pres-słužby.

1. Cytata: «Zabiaśpiečyć płanamiernuju dyviersifikacyju ekspartu dla dasiahnieńnia roŭnaha raźmierkavańnia ekspartnych pastavak pamiž tryma rynkami: Jeŭrazijskaha ekanamičnaha sajuza, Jeŭrapiejskaha sajuza i inšych krain, u tym liku «dalokaj duhi», jakoje da 2020 hoda pavinna skłaści suadnosiny tracina—tracina—tracina». 
Pytańnie: jakija tavary i pasłuhi ź Biełarusi, pa-Vašamu, mohuć prabić sabie darohu na rynki ES i trecich krain?

Padzieł ekspartu tavaraŭ pamiž rynkami JEAES – ES — «dalokaja duha i inšyja krainy» źjaŭlajecca aryjenciram źniešnieekanamičnaj dziejnaści na bližejšuju piacihodku. Raŭnavažkaje raźmierkavańnie ekspartnych tavarapatokaŭ dazvolić dasiahnuć zbałansavanaści ŭpłyvu źniešniaha popytu na nacyjanalnuju ekanomiku. Uździejańnie źniešnich šokaŭ, ekanamičnych prablem asobnych dziaržaŭ (navat najbujniejšych handlovych partnioraŭ) na biełaruskuju ekanomiku ŭ takim vypadku stanie bolš ełastyčnym, što daść mahčymaść nivieliravać šoki dla našaj ekanomiki.

U dadzienym kantekście dziaržava (u asobie Urada) vykonvaje funkcyju metapakładańnia, vyznačajučy nieabchodnaść dasiahnieńnia raŭnavažkaha raźmierkavańnia ekspartu pamiž rynkami. Heta meta, dla dasiahnieńnia jakoj dziaržava raspracoŭvaje kompleks mier pa stvareńni nieabchodnych umoŭ: finansavych, administracyjnych, łahistyčnych i inšych, u tym liku i technałahičnych, raspracoŭvajučy i karektujučy svaju inviestycyjnuju prahramu. Bo nie sakret, što bolšaść stvoranych dziaržavaj pradpryjemstvaŭ maje ekspartaaryjentavanuju skiravanaść (u tym liku ŭ stvaranym industryjalnym parku «Vialiki kamień»).

Takim čynam, vyznačajučy metu, dziaržava stvaraje ŭmovy dla jaje dasiahnieńnia. Ale heta nie značyć, što jana paviadzie eksparcioraŭ za ruku na źniešni rynak. Svoj ekspartny šlach biełaruskija arhanizacyi pavinny vyznačyć sami. Było b niapravilna ŭ kabinietach ministerstvaŭ vyznačać tyja tavary, jakija ajčynnyja vytvorcy pavinny pastavić na toj ci inšy rynak. Vidavočna, što kampietencyi ŭ śfiery mižnarodnaha markietynhu skancentravanyja ŭ haspadarčych subjektach, a nie dziaržaŭnym aparacie.

2. Cytata: «Naładzić supracoŭnictva viadučych biełaruskich vytvorcaŭ z profilnymi transnacyjanalnymi karparacyjami ŭ metach pryciahnieńnia … sučasnych technałohij, abstalavańnia, patentaŭ…, atrymańnia dostupu da tavarapravodnaj sietki transnacyjanalnych karparacyj». 
Pytańnie: što treba razhladać jak udały prykład takoha supracoŭnictva? Jakim čynam tut budzie vykarystany vopyt raźvićcia ekanomiki Kitaja ŭ papiarednija dziesiacihodździ?

U liku važniejšych zadač pa raźvićci biełaruskaj ekanomiki na bližejšuju pierśpiektyvu — pryciahnieńnie pramych zamiežnych inviestycyj. Heta źviazana nie tolki z mahčymaściu pryciahnieńnia finansavych resursaŭ, ale i prychodam adnačasova ź imi pieradavych vytvorčych i kiraŭnickich technałohij.

Hałoŭnymi instrumientami aktyvizacyi inviestycyjnaj dziejnaści i prytoku zamiežnych inviestycyj pavinny stać farmiravańnie efiektyŭnaha instytucyjnaha asiarodździa, spryjalnaha dla viadzieńnia biznesu, źnižeńnie rehulatyŭnych ryzyk, padtrymka spraviadlivaj kankurencyi i zabieśpiačeńnie biezumoŭnych harantyj pravoŭ pryvatnaj ułasnaści.

U raźvićci supracoŭnictva brendavych vytvorcaŭ z adnaprofilnymi transnacyjanalnymi karparacyjami akcent budzie zrobleny na stvareńnie na terytoryi krainy vytvorčaściaŭ, jakija dapaŭniajuć užo isnujučyja ŭ formie sumiesnych pradpryjemstvaŭ, pryciahnieńnie pramych zamiežnych inviestycyj transnacyjanalnych karparacyj ŭ brendavyja biełaruskija vytvorčaści ŭ formie sučasnych technałohij, abstalavańnia, patentaŭ na vytvorčaść pradukcyi rynkavaj navizny, atrymańnie dostupu da tavarapravodnaj sietki transnacyjanalnych karparacyj. Ekanamičnyja miechanizmy stymulavańnia supracoŭnictva z transnacyjanalnymi karparacyjami buduć vyznačany ŭ ramkach narmatyŭnych pravavych aktaŭ, jakija rehłamientujuć pryciahnieńnie zamiežnych inviestycyj.

Za košt pryciahnieńnia zamiežnych kredytnych resursaŭ, u tym liku KNR, płanujecca raźvićcio vytvorčaści kamplektujučych i aŭtakampanientaŭ (chołdynhi «BiełaŭtaMAZ», «Amkador», «Minski matorny zavod» i «Aŭtakampanienty» i inšyja ajčynnyja pradpryjemstvy), a taksama raźvićcio naftachimičnaha kompleksu (AAT «Hrodna Azot» i ajčynnyja naftapierapracoŭčyja pradpryjemstvy).

U ciapierašni čas u jakaści prykładu efiektyŭnaha supracoŭnictva možna pryvieści ZZAT «Brovary Chajnekien».

Na biełaruskim rynku kampanija Heineken pracuje sa śniežnia 2007 hoda i źjaŭlajecca najbujniejšym vytvorcam piva i kvasu ŭ krainie, u tym liku ažyćciaŭlajučy vytvorčaść impartnych brendaŭ pa licenzii. Vytvorčaść raźmieščana ŭ Babrujsku. Z momantu ŭvachodžańnia ŭ skład niderłandskaha kancerna Heineken zavod prajšoŭ intehracyjny etap i siońnia ŭjaŭlaje saboj technałahična daskanałuju vytvorčuju placoŭku, abstalavanuju sučasnym abstalavańniem. Dystrybucyja ažyćciaŭlajecca praz ułasnyja adździeły zbytu, raźmieščanyja pa ŭsioj krainie.

Akramia taho, u respubliku pryciahnutyja viadučyja suśvietnyja kampanii ŭ śfiery drevaapracoŭki i meblevaj pramysłovaści: ZTAA «VMH Industry» i ZTAA «Miebiełain» (abodva — partniory IKIEA) u SEZ «Mahiloŭ».

ZTAA «VMH Industry» — adna z kampanij mižnarodnaha drevaapracoŭčaha chołdynhu «VMG», z centralnym ofisam u h.Kłajpieda (Litva). Chołdynh «VMG» abjadnoŭvaje niekalki pradpryjemstvaŭ na terytoryi Litvy, Biełarusi i Ukrainy, a taksama źjaŭlajecca adnym z najbujniejšych vytvorcaŭ i eksparcioraŭ mebli, plit DSP u krainach Bałtyi.

Razam z tym, my razumiejem, što patencyjał supracoŭnictva z TNK nie vykarystoŭvajecca ŭ poŭnaj miery. Mienavita tamu ŭ abnoŭlenuju Dyrektyvu i byŭ uklučany dadzieny tezis jak demanstracyja ćviordaści našych namieraŭ u budučyni aktyvizavać pracu ajčynnych pradpryjemstvaŭ u hetym napramku.

3. Cytata: «Zachavać dolu na rynku Rasijskaj Fiederacyi pa pastaŭkach … pradukcyi, pry prodažy jakoj dasiahajecca maksimalnaja efiektyŭnaść».
Pytańnie: jakija krytery ekanamičnaj efiektyŭnaści buduć uličvacca?

Rasija pa-raniejšamu zastajecca najbujniejšym handlovym partnioram Biełarusi, i dla asobnych biełaruskich tavaraŭ rasijski rynak zastajecca premijalnym. Pry hetym tolki sami eksparciory na asnovie dakładnych ekanamičnych raźlikaŭ mohuć vyznačać abhruntavanaść ekspartu pradukcyi na toj ci inšy rynak.

U źniešnieekanamičnaj dziejnaści, jak i ŭ luboj inšaj śfiery, efiektyŭnaść prajaŭlajecca ŭ maksimizacyi prybytku pry minimalnych vydatkach. Adnak u dadzienym vypadku havorka idzie nie stolki ab kolkasnych pakazčykach, kolki pra pakazčyki efiektyŭnaści, i kiravacca tut, pierš za ŭsio, nieabchodna patrebami rynku.

Na siońniašni dzień na rynku Rasii skłałasia ŭnikalnaja situacyja dla naroščvańnia biełaruskaha ekspartu: sankcyi ŭ dačynieńni da jeŭrapiejskaha charčavańnia, zabarona na ŭvoz praduktaŭ z Ukrainy, ciapier jašče i tureckich tavaraŭ i pasłuh.

Na rasijskim rynku vyzvalajecca šerah niš, dzie naša pradukcyja zapatrabavana, tak naprykład ŭ 2015 h. dola ŭ rasijskim imparcie miasa ptuški pavialičyłasia da 53% (ŭ 2014 hodzie — 33%), masła da 78% (2014 h. — 47% ). Pry hetym nie treba dumać, što karystajucca popytam tolki pradukty charčavańnia, našy hruzavyja aŭtamabili, traktary, siedłavyja ciahačy značna pavialičyli ŭdzielnuju vahu ŭ rasijskim imparcie, paciaśniŭšy mnohich suśvietnych vytvorcaŭ.

U bližejšyja hady biełaruskim vytvorcam treba budzie pravieści jašče šmat pracy dla ŭtrymańnia zavajavanych siehmientaŭ rasijskaha rynku i pa vychadzie na novyja i pierśpiektyŭnyja, u suviazi z hetym u ciapierašni čas va ŭradzie idzie praca nad prajektam Nacyjanalnaj prahramy raźvićcia ekspartu na 2016—2020 hh., u ramkach jakoj raspracoŭvajucca ekspartnyja stratehii i «darožnyja karty».

4. Cytata: «Pavysić jakaść padrychtoŭki kiraŭničych i inžynierna-techničnych kadraŭ …».
Pytańnie: jakim čynam budzie arhanizavana pavyšeńnie jakaści? Havorka pra biełaruskija VNU ci pra nakiravańnie na vučobu za miažu?

Pavyšeńnie jakaści padrychtoŭki kiraŭnickich i inžynierna-techničnych kadraŭ budzie zabiaśpiečvacca ŭ dźviuch płoskaściach.

Pa-pieršaje, farmiravańnie i raźvićcio sučasnaj sistemy biznes-adukacyi na asnovie vykarystańnia pieradavych mietodyk i technałohij kiravańnia. U 2015 hodzie pryniaty Kancepcyja farmiravańnia i raźvićcia sistemy biznes-adukacyi ŭ Respublicy Biełaruś i płan mierapryjemstvaŭ pa jaje realizacyi (dalej — Kancepcyja biznes-adukacyi), u ramkach jakich namiačajecca praviadzieńnie ŭ 2016—2020 hh. raboty pa madernizacyi sacyjalnaha instytuta adukacyi.

Daviedačna. Płanujecca stvareńnie biznes-škoł, u jakich buduć realizoŭvacca prahramy MVA. Zhodna z Kancepcyjaj biznes-adukacyi, da 2020 hoda płanujecca dasiahnuć nastupnych pakazčykaŭ:

hadavy abjom rynku biznes-adukacyi — 50 młn dalaraŭ ZŠA;

hadavy abjom śpiecyjalistaŭ, jakija prachodziać navučańnie pa prahramach MVA, — 1500 słuchačoŭ;

kolkaść biznes-škoł — 25.

Pa-druhoje, arhanizacyja navučańnia metavych hrup śpiecyjalistaŭ mietodykam inžynierna-techničnaj tvorčaści (TRVZ) i funkcyjanalna-vartasnaha analizu (FSA) u ramkach Dziaržaŭnaj prahramy inavacyjnaha raźvićcia Respubliki Biełaruś na 2016—2020 hh. U jakaści takich metavych hrup vystupajuć jak vykładčyki techničnych VNU, tak i śpiecyjalisty kanstruktarskich biuro, sistemaŭtvaralnych pradpryjemstvaŭ realnaha siektara ekanomiki. Takoje navučańnie budzie arhanizavana jak na bazie biełaruskich VNU, tak i kamiercyjnych arhanizacyj, jakija atrymajuć u adpaviednaści z Kancepcyjaj biznes-adukacyi status biznes-škoły. Akramia taho, «kropkava» budzie ažyćciaŭlacca stažyroŭka asobnych metavych hrup za miažoj.

5. Cytata: «Vyznačyć u jakaści pryjarytetu dziaržaŭnaj inavacyjnaj palityki raźvićcio vysokatechnałahičnych napramkaŭ nacyjanalnaj ekanomiki, zasnavanych na vykarystańni bija- i nanatechnałohij, infarmacyjnych technałohij, novych materyjałaŭ …». 
Pytańnie: ci mahli b Vy pryvieści najaŭnyja prykłady pośpiechaŭ u hetych halinach, na jakija možna aryjentavacca?

Možna pryvieści nastupnyja prykłady dasiahnieńniaŭ u nazvanych vysokatechnałahičnych kirunkach.

U dačynieńni da IT-industryi — funkcyjanavańnie Parku vysokich technałohij (PVT), dzie zaniata bolš za 150 kampanij, u jakich pracuje bolš čym 20 tys. čał.

U dačynieńni da nana- i bijaindustryi. Raspracoŭki ŭ śfiery nanatechnałohij ažyćciaŭlajuć 7 navukovych arhanizacyj NAN Biełarusi, a taksama viadučyja VNU krainy. Vytvorčaść pryboraŭ, jakija mohuć być vykarystany ŭ dadzienaj śfiery, ažyćciaŭlajuć 15 arhanizacyj, u tym liku 9 subjektaŭ małoha pradprymalnictva. Akramia pradpryjemstvaŭ nanaelektroniki, jašče 21 arhanizacyja zaniataja vytvorčaściu nanatechnałahičnaj pradukcyi. Pierśpiektyŭnymi z punktu hledžańnia kamiercyjnaha vykarystańnia źjaŭlajucca 27 najmieńniaŭ nanatechnałohij i nanatechnałahičnaj pradukcyi, stvoranych u Respublicy Biełaruś.

Vytvorčaść farmaceŭtyčnaj pradukcyi ažyćciaŭlajuć 26 jurydyčnych asob, 10 ź jakich — sistemaŭtvaralnyja dla biełaruskaha rynku. Dola lekavych srodkaŭ ajčynnaj vytvorčaści — 52,7% u ahulnym abjomie lekaŭ, pradstaŭlenych na biełaruskim rynku (u vartasnym vyražeńni). U ramkach Dziaržaŭnaj prahramy «Inavacyjnyja bijatechnałohii» za pieryjad 2010—2015 hh. stvorana 8 novych arhanizacyj, 28 vytvorčaściej, 10 arhanizacyjnych struktur (centry, łabaratoryi, palihony, učastki), stvorany rehistr donaraŭ kaściavoha mozhu, bank štamaŭ pramysłova kaštoŭnych mikraarhanizmaŭ.

6. Cytata: «… zabieśpiačeńniu paskoranaha raźvićcia Parka vysokich technałohij, Kitajska-Biełaruskaha industryjalnaha parka «Industryjalny park «Vialiki kamień», navukova-technałahičnych parkaŭ u jakaści placovak dla arhanizacyi inavacyjnych i vysokatechnałahičnych vytvorčaściej, zasnavanych na technałohijach V i VI technałahičnych układaŭ…»
Pytańni: ci nie adabjecca na hetych płanach zapavolvańnie rostu ekanomiki Kitaja? Ci mohuć źjavicca adpaviedniki Parka vysokich technałohij u inšych haradach Biełarusi?

U dačynieńni da ŭpłyvu dynamiki raźvićcia ekanomiki KNR na tempy budaŭnictva Kitajska-Biełaruskaha industryjalnaha parka pytańnie stavicca niekarektna, pakolki rezidentami parka ŭ adpaviednaści z zakanadaŭstvam Respubliki Biełaruś mohuć być jak kitajskija kampanii, tak i pradpryjemstvy kampanij inšych krain. Zychodziačy z hetaha, raźvićcio parka ŭ peŭnaj stupieni budzie zaležać ad terminaŭ zaviaršeńnia budaŭnictva abjektaŭ infrastruktury parka i farmiravańnia jaho pazityŭnaha imidžu dla patencyjnych inviestaraŭ u mižnarodnaj dziełavoj supolnaści.

Što datyčycca raźvićcia PVT, to ŭžo ŭ 2016 hodzie płanujecca adkryćcio filijała PVT u Hrodnie.

7. Cytata: «Biełaruś pa pradukcyjnaści pracy adstaje ad uzroŭniu Jeŭrapiejskaha Sajuza amal u 4—5 razoŭ, što abumoŭlena nie tolki technika-technałahičnymi pryčynami, ale i prablemami nieefiektyŭnaj zaniataści, jakija patrabujuć jaje restrukturyzacyi z ulikam raźvićcia małoha i siaredniaha pradprymalnictva».
Pytańnie: jakija miery buduć pryniatyja? Ci niama niebiaśpieki, što pavyšeńnie kankurencyi na rynku pracy moža vyklikać sacyjalnaje napružańnie?

Ciapier rašeńni, jakija prymajucca Uradam, nakiravany na stymulavańnie raźvićcia efiektyŭnaj pramysłovaj vytvorčaści, u tym liku za košt rostu pradukcyjnaści pracy.

Dasiahnieńnie pastaŭlenych metaŭ budzie zabiaśpiečvacca za košt:

— techničnaha pieraŭzbrajeńnia dziejnych vytvorčaściej, jakoje zabiaśpiečvaje palapšeńnie technałahičnych pracesaŭ;

— praviadzieńnia ekanamičnaj madernizacyi, u ramkach jakoj realizujucca mierapryjemstvy pa aptymizacyi dapamožnych słužbaŭ pramysłovych arhanizacyj i pieradačy hetych funkcyj praz aŭtsorsinh śpiecyjalizavanym kampanijam i małomu biznesu, a taksama ŭkaranieńnia aŭtamatyzavanych sistem kiravańnia resursami i inš.

— budaŭnictva novych vytvorčaściej, u tym liku nakiravanych na stvareńnie vysokapradukcyjnych pracoŭnych miescaŭ.

Pryjarytetnaj zadačaj dla pramysłovaści źjaŭlajecca farmiravańnie ŭmoŭ dla stvareńnia novych vysokaefiektyŭnych vytvorčaściaŭ z uzroŭniem pradukcyjnaści pracy, jakaja nie sastupaje suśvietnym anałaham.

U 2011—2014 hadach vysoka- i siarednietechnałahičnymi (vysokaha ŭzroŭniu) apracoŭnymi vytvorčaściami zabiaśpiečany pryrost abjomaŭ na ŭzroŭni 7,6%. Pry hetym vysokatechnałahičny siektar pramysłovaści demanstruje bolš vysokija tempy raźvićcia ŭ paraŭnańni z astatnimi halinami.

U 2015 hodzie zabiaśpiečana zbałansavanaje raźvićcio pramysłovaści: nievysokija tempy pramysłovaj vytvorčaści (93,4% da 2014 hoda) na fonie skaračeńnia zapasaŭ hatovaj pradukcyi na składach pradpryjemstvaŭ (68,7% da siaredniamiesiačnaha abjomu vytvorčaści — minimalny ŭzrovień za 3 hady) i rostu rentabielnaści prodažaŭ u pramysłovaści (9%).

U novaj piacihodcy z metaj jakasnaha raźvićcia pramysłovaści asnoŭnaja ŭvaha budzie nadadziena refarmavańniu jaje struktury, u tym liku za košt:

— farmiravańnia vysokatechnałahičnaha siektara;

— naroščvańnia ekspartnaha patencyjału pramysłovaj pradukcyi;

— pahłybleńnia vytvorčaj kaapieracyi i pramysłovaha supracoŭnictva ŭ ramkach JEAES, vykarystańnia patencyjału supolnaha rynku i stymulavańnia ekspartu sumiesna vyrablenaj pradukcyi ŭ trecija krainy;

— paskoranaha raźvićcia vytvorčaściej, jakija bazujucca na pierapracoŭcy miascovych syravinnych resursaŭ (drevaapracoŭka, vytvorčaść charčovych praduktaŭ, pierapracoŭka sielskahaspadarčaj pradukcyi) z pavieličeńniem hłybini pierapracoŭki resursaŭ i minimizacyjaj technahiennaha ŭździejańnia na navakolnaje asiarodździe i inš.

Važki rezierv skancentravany ŭ śfiery małoha i siaredniaha biznesu. Stvareńniu novych pracoŭnych miescaŭ u hetaj śfiery buduć sadziejničać farmiravańnie spryjalnaha instytucyjnaha asiarodździa, padtrymka raźvićcia novych vidaŭ biznesu.

U metach zabieśpiačeńnia realizacyi pałažeńniaŭ Dyrektyvy № 3 u ciapierašni čas Uradam Respubliki Biełaruś arhanizavana rabota pa padrychtoŭcy płana mierapryjemstvaŭ, u jakim budzie vyznačany kankretny płan dziejańniaŭ pa kožnym z čatyroch jaje kirunkaŭ. Dadzieny płan mierapryjemstvaŭ pavinien być zaćvierdžany Savietam Ministraŭ Respubliki Biełaruś nie paźniej za 26 krasavika 2016.

• 0
• 0
• 0
• 0
• 0
• 0
• 0
• 0