Apošnija apytańni pierad druhim turam prezidenckich vybaraŭ u Polščy zaśviedčyli skaračeńnie i tak niaznačnaj roźnicy pamiž kandydatami. Analityki źviartajuć uvahu na najbolš imaviernyja scenaryi raźvićcia padziej i padkreślivajuć asabliva važnuju rolu hałasoŭ palakaŭ, addadzienych za miažoj.
Partał Onet.pl daŭ prahnoz adnosna vynikaŭ druhoha tura prezidenckich vybaraŭ u Polščy. Adpaviedna ź im, Rafał Tšaskoŭski atrymlivaje 50,1% hałasoŭ, a jahony apanient Karal Naŭrocki — 49,9%. Takaja minimalnaja roźnica aznačaje, što pieramohu vyznačać litaralna niekalki dziasiatkaŭ tysiač hałasoŭ z bolš jak 20 miljonaŭ.
U madeli mer Varšavy Tšaskoŭski maje 52% šancaŭ na pieramohu. Heta aznačaje, što vierahodnaść zahadzia pradkazać pieramožcu amal takaja ž, jak i pry padkidvańni maniety.
Vynikovy prahnoz Onet pakazvaje, što Tšaskoŭski moža pieramahčy ŭ 10 vajavodstvach, a Naŭrocki — u 6. Asablivuju ŭvahu varta źviarnuć na Łodźskaje i Mazavieckaje vajavodstvy, dzie roźnica pamiž kandydatami minimalnaja. Pieramoha ŭ adnym ź ich moža vyznačyć ahulny vynik. Na finišy kampanii Naŭrocki nie stanie pieramožcam biez Łodźskaha vajavodstva, a Tšaskoŭski — nie ŭmacavaŭšy svaich pazicyj u Mazavieckim.
Madel Onet prahnazuje jaŭku ŭ 70%, što amal na 3% bolš, čym u pieršym tury. Heta aznačaje, što da vybarčych urnaŭ pryjdzie amal na miljon vybarcaŭ bolš, čym 18 maja. Adnak kolkaść novych udzielnikaŭ budzie jašče bolšaj, bo, pavodle prahnozaŭ, amal miljon tych, chto hałasavaŭ u pieršym tury, nie voźmie ŭdziełu ŭ druhim.
Pavodle madeli, čym vyšejšaja jaŭka, tym lepš dla Tšaskoŭskaha, bo jahony patencyjny elektarat uklučaje bolš tych, chto nie hałasavaŭ u pieršym tury. Nizkaja jaŭka, naadvarot, budzie spryjać Naŭrockamu.
Hałasy z-za miažy — mahčymy faktar pieramohi
Pierad druhim turam za miažoj zarehistravalisia 686 tysiač palakaŭ. Z ulikam tych, chto budzie hałasavać na padstavie śpiecyjalnaha paśviedčańnia, jakoje dazvalaje prahałasavać na lubym učastku, — ahulnaja kolkaść vybarščykaŭ za miažoj moža pieravysić 700 tysiač čałaviek.
Pavodle raźlikaŭ analitykaŭ, hałasy z-za miažy mohuć dać Rafału Tšaskoŭskamu da 160 tysiač pieravahi — choć i mienš, čym u 2020 hodzie, ale heta ŭsio jašče vielmi značny rezierv.
Cikava, što ažno ŭ 13% usich madelavanych scenaryjaŭ mienavita hałasy z-za miažy vyrašyli vynik vybaraŭ. U hetych scenaryjach Karal Naŭrocki pieramahaje ŭ miežach krainy, ale hałasy palakaŭ, addadzienyja za miažoj, zabiaśpiečvajuć pieramohu Tšaskoŭskamu.
To-bok pryblizna ŭ čverci scenaryjaŭ, u jakich Tšaskoŭski vyjhraje vybary, jon prajhraje ŭ Polščy, ale vynik za miažoj daje jamu pieravahu ŭ ahulnym padliku.
U 60% madelavanych scenaryjaŭ roźnica pamiž kandydatami składaje mienš za 2 pracentnyja punkty. U astatnich 40% roźnica bolš značnaja — u niekatorych scenaryjach adzin z kandydataŭ atrymlivaje pieravahu ŭ bolš jak 400 tysiač hałasoŭ.
Ale jak časta kandydaty iduć praktyčna na roŭnych? Tolki ŭ 17% scenaryjaŭ roźnica pamiž pieramožcam i prajhraŭšym była mienšaj za pałovu pracentnaha punkta.
Heta značyć, što vierahodnaść vielmi roŭnaha vyniku nievialikaja — chutčej za ŭsio, pieramožca ŭsio ž budzie mieć prykmietnuju pieravahu.
Šmatlikija nieviadomyja i faktar niečakanaści
Vyniki madeli Onet.pl hruntujucca na danych pieršaha tura i apytańniach hramadskaj dumki, ale, jak pakazaŭ pieršy tur, usio jašče moža źmianicca. Vybarščykaŭ, jakija nie vyznačylisia, šmat, i mnohija prymajuć rašeńnie litaralna na ŭčastku.
Vynik mocna zaležyć ad jaŭki, a taksama ad taho, kolki vybarščykaŭ ad Mencena i Braŭna pryjduć i za kaho prahałasujuć — za Naŭrockaha ci Tšaskoŭskaha.
Navat apytańni na vychadzie z učastkaŭ (exit polls) mohuć nie dać dakładnaha adkazu, chto pieramoh. Pry amal roŭnym vyniku daviadziecca čakać aficyjnaha padliku da poźniaj nočy.
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary