Jeŭrasajuz 25 lutaha farmalna zaćvierdziŭ palityčnaje rašeńnie Rady ES ab źniaćci sankcyj z 170 fizičnych i troch jurydyčnych asob Biełarusi, paviedamlaje pres-słužba ES.
Paviedamlajecca, što rašeńnie budzie apublikavanaje ŭ Aficyjnym žurnale ES 27 lutaha.
U paviedamleńni havorycca, što rašeńnie ab źniaćci sankcyi pryniataje ŭ adkaz na vyzvaleńnie ŭ Biełarusi palitviaźniaŭ u žniŭni 2015 hoda, u kantekście palapšeńnia adnosin pamiž Biełaruśsiu i ES, a taksama praviadzieńnia prezidenckich vybaraŭ 11 kastryčnika 2015 hoda «ŭ atmaśfiery, svabodnaj ad hvałtu».
Nahadajem, u kastryčniku 2015 hoda Rada ES pryniała rašeńnie praciahnuć i adnačasova zamarozić sankcyi ŭ dačynieńni da 170 fizičnych i 10 jurydyčnych asobaŭ Biełarusi. Termin dziejańnia hetaha rašeńnia minaje 29 lutaha 2016 hoda. Sankcyi byli prypynienyja u tym liku ŭ dačynieńni da Alaksandra Łukašenki i jaho starejšych synoŭ Viktara i Dźmitryja, kiraŭnika Centrvybarkama Lidzii Jarmošynaj, ministra infarmacyi Lilii Ananič, staršyni KDB Valeryja Vakulčyka i jaho papiarednika Ściapana Sucharenki. U śpisie pradpryjemstvaŭ značacca «Biełtechekspart», «Biełtech Chołdynh», «Śpiecpryborsiervis», «Trajpł», «Rakaŭski brovar», futbolny kłub «Dynama», «Prastor-Trejd», «AkvaTrajpł», «KvarcMiełPram», Biarozaŭski kambinat silikatnych vyrabaŭ.
15 lutaha na pasiadžeńni ŭ Brusieli Rada ministraŭ zamiežnych spraŭ ES pryniała rašeńnie nie praciahvać sankcyi ŭ dačynieńni da 170 čałaviek i troch kampanij ź Biełarusi.
Pry hetym na 12 miesiacaŭ pradoŭžanaje embarha na pastaŭku ŭzbrajeńniaŭ u Biełaruś i abmiežavalnyja miery ŭ dačynieńni da čatyroch čałaviek, jakich ES ličyć datyčnymi da źniknieńnia ŭ 1999—2000 hadach apazicyjnych palitykaŭ i žurnalista. Havorka idzie pra Uładzimira Navumava (były ministr unutranych spraŭ), Viktara Šejmana (były kiraŭnik Administracyi prezidenta), Juryja Sivakova (u pieryjad źniknieńnia palitykaŭ zajmaŭ pasadu kiraŭnika MUS) i Dźmitryja Paŭličenku (kamandzir bryhady śpiecnaza ŭnutranych vojskaŭ MUS).
Kamientary